૬. નતંદળ્હવગ્ગો

૨૦૧. બન્ધનાગારજાતકં (૨-૬-૧)

૧૦૧. ન તં દળ્હં બન્ધનમાહુ ધીરા, યદાયસં દારુજપબ્બજઞ્ચ [બબ્બજઞ્ચ (સી.)];

સારત્તરત્તા મણિકુણ્ડલેસુ, પુત્તેસુ દારેસુ ચ યા અપેક્ખા.

૧૦૨. એતં દળ્હં બન્ધનમાહુ ધીરા, ઓહારિનં સિથિલં દુપ્પમુઞ્ચં;

એતમ્પિ છેત્વાન વજન્તિ ધીરા, અનપેક્ખિનો કામસુખં પહાયાતિ.

બન્ધનાગારજાતકં પઠમં.

૨૦૨. કેળિસીલજાતકં (૨-૬-૨)

૧૦૩. હંસા કોઞ્ચા મયૂરા ચ, હત્થયો [હત્થિનો (સી.), હત્થિયો (સ્યા. પી.)] પસદા મિગા;

સબ્બે સીહસ્સ ભાયન્તિ, નત્થિ કાયસ્મિ તુલ્યતા.

૧૦૪. એવમેવ મનુસ્સેસુ, દહરો ચેપિ પઞ્ઞવા;

સો હિ તત્થ મહા હોતિ, નેવ બાલો સરીરવાતિ.

કેળિસીલજાતકં દુતિયં.

૨૦૩. ખણ્ડજાતકં (૨-૬-૩)

૧૦૫. વિરૂપક્ખેહિ મે મેત્તં, મેત્તં એરાપથેહિ મે;

છબ્યાપુત્તેહિ મે મેત્તં, મેત્તં કણ્હાગોતમકેહિ ચ.

અપાદકેહિ મે મેત્તં, મેત્તં દ્વિપાદકેહિ મે;

ચતુપ્પદેહિ મે મેત્તં, મેત્તં બહુપ્પદેહિ મે.

મા મં અપાદકો હિંસિ, મા મં હિંસિ દ્વિપાદકો;

મા મં ચતુપ્પદો હિંસિ, મા મં હિંસિ બહુપ્પદો.

સબ્બે સત્તા સબ્બે પાણા, સબ્બે ભૂતા ચ કેવલા;

સબ્બે ભદ્રાનિ પસ્સન્તુ, મા કઞ્ચિ [કિઞ્ચિ (સ્યા. ક.)] પાપમાગમા.

૧૦૬. અપ્પમાણો બુદ્ધો, અપ્પમાણો ધમ્મો;

અપ્પમાણો સઙ્ઘો, પમાણવન્તાનિ સરીસપાનિ [સિરિસપાનિ (સી. સ્યા. પી.)];

અહિવિચ્છિકસતપદી, ઉણ્ણનાભિ [ઉણ્ણાનાભિ (સી. સ્યા. પી.)] સરબૂમૂસિકા.

કતા મે રક્ખા કતા મે પરિત્તા, પટિક્કમન્તુ ભૂતાનિ;

સોહં નમો ભગવતો, નમો સત્તન્નં સમ્માસમ્બુદ્ધાનન્તિ.

ખણ્ડજાતકં તતિયં.

૨૦૪. વીરકજાતકં (૨-૬-૪)

૧૦૭. અપિ વીરક પસ્સેસિ, સકુણં મઞ્જુભાણકં;

મયૂરગીવસઙ્કાસં, પતિં મય્હં સવિટ્ઠકં.

૧૦૮. ઉદકથલચરસ્સ પક્ખિનો, નિચ્ચં આમકમચ્છભોજિનો;

તસ્સાનુકરં સવિટ્ઠકો, સેવાલે પલિગુણ્ઠિતો મતોતિ.

વીરકજાતકં ચતુત્થં.

૨૦૫. ગઙ્ગેય્યજાતકં (૨-૬-૫)

૧૦૯. સોભતિ મચ્છો ગઙ્ગેય્યો, અથો સોભતિ યામુનો [સોભન્તિ મચ્છા ગઙ્ગેય્યા, અથો સોભન્તિ યામુના (સ્યા. પી.)];

ચતુપ્પદોયં પુરિસો, નિગ્રોધપરિમણ્ડલો;

ઈસકાયત [ઈસમાયત (ક.)] ગીવો ચ, સબ્બેવ અતિરોચતિ.

૧૧૦. યં પુચ્છિતો ન તં અક્ખાસિ [અક્ખા (સી. સ્યા. પી.)], અઞ્ઞં અક્ખાસિ [અક્ખાતિ (સ્યા. પી.)] પુચ્છિતો;

અત્તપ્પસંસકો પોસો, નાયં અસ્માક રુચ્ચતીતિ.

ગઙ્ગેય્યજાતકં પઞ્ચમં.

૨૦૬. કુરુઙ્ગમિગજાતકં (૨-૬-૬)

૧૧૧. ઇઙ્ઘ વદ્ધમયં [વદ્ધમયં (સી. સ્યા. પી.)] પાસં, છિન્દ દન્તેહિ કચ્છપ;

અહં તથા કરિસ્સામિ, યથા નેહિતિ લુદ્દકો.

૧૧૨. કચ્છપો પાવિસી વારિં, કુરુઙ્ગો પાવિસી વનં;

સતપત્તો દુમગ્ગમ્હા, દૂરે પુત્તે અપાનયીતિ.

કુરુઙ્ગમિગજાતકં છટ્ઠં.

૨૦૭. અસ્સકજાતકં (૨-૬-૭)

૧૧૩. અયમસ્સકરાજેન, દેસો વિચરિતો મયા;

અનુકામય કામેન [અનુકામયવનુકામેન (સી. પી.)], પિયેન પતિના સહ.

૧૧૪. નવેન સુખદુક્ખેન, પોરાણં અપિધીયતિ [અપિથીયતિ (સી. પી.), અપિથિય્યતિ (સ્યા.)];

તસ્મા અસ્સકરઞ્ઞાવ, કીટો પિયતરો મમાતિ.

અસ્સકજાતકં સત્તમં.

૨૦૮. સુસુમારજાતકં (૨-૬-૮)

૧૧૫. અલં મેતેહિ અમ્બેહિ, જમ્બૂહિ પનસેહિ ચ;

યાનિ પારં સમુદ્દસ્સ, વરં મય્હં ઉદુમ્બરો.

૧૧૬. મહતી વત તે બોન્દિ, ન ચ પઞ્ઞા તદૂપિકા;

સુસુમાર [સુંસુમાર (સી. સ્યા. પી.)] વઞ્ચિતો મેસિ, ગચ્છ દાનિ યથાસુખન્તિ.

સુસુમારજાતકં અટ્ઠમં.

૨૦૯. કુક્કુટજાતકં (૨-૬-૯)

૧૧૭. દિટ્ઠા મયા વને રુક્ખા, અસ્સકણ્ણા વિભીટકા [વિભેદકા (સ્યા. ક.)];

ન તાનિ એવં સક્કન્તિ, યથા ત્વં રુક્ખ સક્કસિ.

૧૧૮. પુરાણકુક્કુટો [કક્કરો (સી. સ્યા. પી.)] અયં, ભેત્વા પઞ્જરમાગતો;

કુસલો વાળપાસાનં, અપક્કમતિ ભાસતીતિ.

કુક્કુટ [કક્કર (સી. સ્યા. પી.)] જાતકં નવમં.

૨૧૦. કન્દગલકજાતકં (૨-૬-૧૦)

૧૧૯. અમ્ભો કો નામ યં રુક્ખો, સિન્નપત્તો [સીનપત્તો (સી. પી.)] સકણ્ટકો;

યત્થ એકપ્પહારેન, ઉત્તમઙ્ગં વિભિજ્જિતં [વિસાટિકં (સી. સ્યા. પી.), વિઘાટિતં (સી. નિય્ય)].

૧૨૦. અચારિ વતાયં વિતુદં વનાનિ, કટ્ઠઙ્ગરુક્ખેસુ અસારકેસુ;

અથાસદા ખદિરં જાતસારં [જાતિસારં (ક.)], યત્થબ્ભિદા ગરુળો ઉત્તમઙ્ગન્તિ.

કન્દગલક [કન્દલક (ક.)] જાતકં દસમં.

નતંદળ્હવગ્ગો છટ્ઠો.

તસ્સુદ્દાનં –

દળ્હબન્ધન હંસવરો ચ પુન, વિરૂપક્ખ સવિટ્ઠક મચ્છવરો;

સકુરુઙ્ગ સઅસ્સક અમ્બવરો, પુન કુક્કુટકો ગરુળેન દસાતિ.