૫. રુહકવગ્ગો

૧૯૧. રુહકજાતકં (૨-૫-૧)

૮૧. અપિ [અમ્ભો (સ્યા. ક. સી.)] રુહક છિન્નાપિ, જિયા સન્ધીયતે પુન;

સન્ધીયસ્સુ પુરાણિયા, મા કોધસ્સ વસં ગમિ.

૮૨. વિજ્જમાનેસુ વાકેસુ [વિજ્જમાનાસુ મરુવાસુ (સી.), વિજ્જમાનાસુ મરૂદ્વાસુ (પી.)], વિજ્જમાનેસુ કારિસુ;

અઞ્ઞં જિયં કરિસ્સામિ, અલઞ્ઞેવ પુરાણિયાતિ.

રુહકજાતકં પઠમં.

૧૯૨. સિરિકાળકણ્ણિજાતકં (૨-૫-૨)

૮૩. ઇત્થી સિયા રૂપવતી, સા ચ સીલવતી સિયા;

પુરિસો તં ન ઇચ્છેય્ય, સદ્દહાસિ મહોસધ.

૮૪. સદ્દહામિ મહારાજ, પુરિસો દુબ્ભગો સિયા;

સિરી ચ કાળકણ્ણી ચ, ન સમેન્તિ કુદાચનન્તિ.

સિરિકાળકણ્ણિજાતકં દુતિયં.

૧૯૩. ચૂળપદુમજાતકં (૨-૫-૩)

૮૫. અયમેવ સા અહમપિ [અહમ્પિ (સી. સ્યા. પી.), અહસ્મિ (ક.)] સો અનઞ્ઞો, અયમેવ સો હત્થચ્છિન્નો અનઞ્ઞો;

યમાહ ‘‘કોમારપતી મમ’’ન્તિ, વજ્ઝિત્થિયો નત્થિ ઇત્થીસુ સચ્ચં.

૮૬. ઇમઞ્ચ જમ્મં મુસલેન હન્ત્વા, લુદ્દં છવં પરદારૂપસેવિં;

ઇમિસ્સા ચ નં પાપપતિબ્બતાય, જીવન્તિયા છિન્દથ કણ્ણનાસન્તિ.

ચૂળપદુમજાતકં તતિયં.

૧૯૪. મણિચોરજાતકં (૨-૫-૪)

૮૭. ન સન્તિ દેવા પવસન્તિ નૂન, ન હિ નૂન સન્તિ ઇધ લોકપાલા;

સહસા કરોન્તાનમસઞ્ઞતાનં, ન હિ નૂન સન્તી પટિસેધિતારો.

૮૮. અકાલે વસ્સતી તસ્સ, કાલે તસ્સ ન વસ્સતિ;

સગ્ગા ચ ચવતિ ઠાના, નનુ સો તાવતા હતોતિ.

મણિચોરજાતકં ચતુત્થં.

૧૯૫. પબ્બતૂપત્થરજાતકં (૨-૫-૫)

૮૯. પબ્બતૂપત્થરે [પબ્બતપત્થરે (સી. સ્યા. પી.)] રમ્મે, જાતા પોક્ખરણી સિવા;

તં સિઙ્ગાલો અપાપાયિ [અપાપાસિ (સી. સ્યા. પી.)], જાનં સીહેન રક્ખિતં.

૯૦. પિવન્તિ ચે [પિવન્તિ વે (સી.), પિવન્તિવ (પી.), પિવન્તેવ (?)] મહારાજ, સાપદાનિ મહાનદિં;

ન તેન અનદી હોતિ, ખમસ્સુ યદિ તે પિયાતિ.

પબ્બતૂપત્થર [પબ્બતપત્થર (સી. સ્યા. પી.)] જાતકં પઞ્ચમં.

૧૯૬. વલાહકસ્સજાતકં (૨-૫-૬)

૯૧. યે ન કાહન્તિ ઓવાદં, નરા બુદ્ધેન દેસિતં;

બ્યસનં તે ગમિસ્સન્તિ, રક્ખસીહિવ વાણિજા.

૯૨. યે ચ કાહન્તિ ઓવાદં, નરા બુદ્ધેન દેસિતં;

સોત્થિં પારં ગમિસ્સન્તિ, વલાહેનેવ [વાલાહેનેવ (સી. પી.)] વાણિજાતિ.

વલાહકસ્સ [વાલાહસ્સ (સી. પી.)] જાતકં છટ્ઠં.

૧૯૭. મિત્તામિત્તજાતકં (૨-૫-૭)

૯૩. ન નં ઉમ્હયતે દિસ્વા, ન ચ નં પટિનન્દતિ;

ચક્ખૂનિ ચસ્સ ન દદાતિ, પટિલોમઞ્ચ વત્તતિ.

૯૪. એતે ભવન્તિ આકારા, અમિત્તસ્મિં પતિટ્ઠિતા;

યેહિ અમિત્તં જાનેય્ય, દિસ્વા સુત્વા ચ પણ્ડિતોતિ.

મિત્તામિત્તજાતકં સત્તમં.

૧૯૮. રાધજાતકં (૨-૫-૮)

૯૫. પવાસા આગતો તાત, ઇદાનિ નચિરાગતો;

કચ્ચિન્નુ તાત તે માતા, ન અઞ્ઞમુપસેવતિ.

૯૬. ન ખો પનેતં સુભણં, ગિરં સચ્ચુપસંહિતં;

સયેથ પોટ્ઠપાદોવ, મુમ્મુરે [મુમ્મુરે (સ્યા.), મં પુરે (ક.) મુમ્મુરસદ્દો થુસગ્ગિમ્હિ કુક્કુળે ચ વત્તતીતિ સક્કતાભિધાનેસુ] ઉપકૂથિતોતિ [ઉપકૂસિતોતિ (સી. સ્યા. પી.), ઉપકૂલિતો (ક.)].

રાધજાતકં અટ્ઠમં.

૧૯૯. ગહપતિજાતકં (૨-૫-૯)

૯૭. ઉભયં મે ન ખમતિ, ઉભયં મે ન રુચ્ચતિ;

યાચાયં કોટ્ઠમોતિણ્ણા, નાદ્દસં ઇતિ ભાસતિ.

૯૮. તં તં ગામપતિ બ્રૂમિ, કદરે અપ્પસ્મિ જીવિતે;

દ્વે માસે સઙ્ગરં કત્વા [કારં કત્વાન (સી. પી.), સંકરં કત્વા (ક.)], મંસં જરગ્ગવં કિસં;

અપ્પત્તકાલે ચોદેસિ, તમ્પિ મય્હં ન રુચ્ચતીતિ.

ગહપતિજાતકં નવમં.

૨૦૦. સાધુસીલજાતકં (૨-૫-૧૦)

૯૯. સરીરદબ્યં વુડ્ઢબ્યં [વદ્ધબ્યં (સી. પી.)], સોજચ્ચં સાધુસીલિયં;

બ્રાહ્મણં તેવ પુચ્છામ, કન્નુ તેસં વનિમ્હસે [વણિમ્હસે (સી. પી.)].

૧૦૦. અત્થો અત્થિ સરીરસ્મિં, વુડ્ઢબ્યસ્સ નમો કરે;

અત્થો અત્થિ સુજાતસ્મિં, સીલં અસ્માક રુચ્ચતીતિ.

સાધુસીલજાતકં દસમં.

રુહકવગ્ગો પઞ્ચમો.

તસ્સુદ્દાનં –

અપિરુહક રૂપવતી મુસલો, પવસન્તિ સપઞ્ચમપોક્ખરણી;

અથ મુત્તિમવાણિજ ઉમ્હયતે, ચિરઆગત કોટ્ઠ સરીર દસાતિ.