૪. અસદિસવગ્ગો

૧૮૧. અસદિસજાતકં (૨-૪-૧)

૬૧. ધનુગ્ગહો અસદિસો, રાજપુત્તો મહબ્બલો;

દૂરેપાતી અક્ખણવેધી, મહાકાયપ્પદાલનો.

૬૨. સબ્બામિત્તે રણં કત્વા, ન ચ કઞ્ચિ વિહેઠયિ;

ભાતરં સોત્થિં કત્વાન, સંયમં અજ્ઝુપાગમીતિ.

અસદિસજાતકં પઠમં.

૧૮૨. સઙ્ગામાવચરજાતકં (૨-૪-૨)

૬૩. સઙ્ગામાવચરો સૂરો, બલવા ઇતિ વિસ્સુતો;

કિં નુ તોરણમાસજ્જ, પટિક્કમસિ કુઞ્જર.

૬૪. ઓમદ્દ ખિપ્પં પલિઘં, એસિકાનિ ચ અબ્બહ [ઉબ્બહ (સ્યા.), અબ્ભુહ (ક.)];

તોરણાનિ ચ મદ્દિત્વા, ખિપ્પં પવિસ કુઞ્જરાતિ.

સઙ્ગામાવચરજાતકં દુતિયં.

૧૮૩. વાલોદકજાતકં (૨-૪-૩)

૬૫. વાલોદકં અપ્પરસં નિહીનં, પિત્વા [પીત્વા (સી. પી.)] મદો જાયતિ ગદ્રભાનં;

ઇમઞ્ચ પિત્વાન રસં પણીતં, મદો ન સઞ્જાયતિ સિન્ધવાનં.

૬૬. અપ્પં પિવિત્વાન નિહીનજચ્ચો, સો મજ્જતી તેન જનિન્દ પુટ્ઠો [ફુટ્ઠો (સી. સ્યા.), મુટ્ઠો (ક.)];

ધોરય્હસીલી ચ કુલમ્હિ જાતો, ન મજ્જતી અગ્ગરસં પિવિત્વાતિ.

વાલોદકજાતકં તતિયં.

૧૮૪. ગિરિદત્તજાતકં (૨-૪-૪)

૬૭. દૂસિતો ગિરિદત્તેન [ગિરિદન્તેન (પી.)], હયો સામસ્સ પણ્ડવો;

પોરાણં પકતિં હિત્વા, તસ્સેવાનુવિધિય્યતિ [નુવિધીયતિ (સી. પી.)].

૬૮. સચે ચ તનુજો પોસો, સિખરાકાર [સિઙ્ગારાકાર (સ્યા.)] કપ્પિતો;

આનને નં [તં (સી. સ્યા. પી.)] ગહેત્વાન, મણ્ડલે પરિવત્તયે;

ખિપ્પમેવ પહન્ત્વાન, તસ્સેવાનુવિધિય્યતીતિ.

ગિરિદત્તજાતકં ચતુત્થં.

૧૮૫. અનભિરતિજાતકં (૨-૪-૫)

૬૯. યથોદકે આવિલે અપ્પસન્ને, ન પસ્સતિ સિપ્પિકસમ્બુકઞ્ચ;

સક્ખરં વાલુકં મચ્છગુમ્બં, એવં આવિલમ્હિ [આવિલે હિ (સી.)] ચિત્તે;

ન પસ્સતિ અત્તદત્થં પરત્થં.

૭૦. યથોદકે અચ્છે વિપ્પસન્ને, સો પસ્સતિ સિપ્પિકસમ્બુકઞ્ચ;

સક્ખરં વાલુકં મચ્છગુમ્બં, એવં અનાવિલમ્હિ ચિત્તે;

સો પસ્સતિ અત્તદત્થં પરત્થન્તિ.

અનભિરતિજાતકં પઞ્ચમં.

૧૮૬. દધિવાહનજાતકં (૨-૪-૬)

૭૧. વણ્ણગન્ધરસૂપેતો, અમ્બોયં અહુવા પુરે;

તમેવ પૂજં લભમાનો, કેનમ્બો કટુકપ્ફલો.

૭૨. પુચિમન્દપરિવારો, અમ્બો તે દધિવાહન;

મૂલં મૂલેન સંસટ્ઠં, સાખા સાખા [સાખં (સ્યા. ક.)] નિસેવરે [નિવીસરે (ક.)];

અસાતસન્નિવાસેન, તેનમ્બો કટુકપ્ફલોતિ.

દધિવાહનજાતકં છટ્ઠં.

૧૮૭. ચતુમટ્ઠજાતકં (૨-૪-૭)

૭૩. ઉચ્ચે વિટભિમારુય્હ, મન્તયવ્હો રહોગતા;

નીચે ઓરુય્હ મન્તવ્હો, મિગરાજાપિ સોસ્સતિ.

૭૪. યં સુવણ્ણો સુવણ્ણેન [યં સુપણ્ણો સુપણ્ણેન (સી. સ્યા. પી.)], દેવો દેવેન મન્તયે;

કિં તેત્થ ચતુમટ્ઠસ્સ, બિલં પવિસ જમ્બુકાતિ.

ચતુમટ્ઠજાતકં સત્તમં.

૧૮૮. સીહકોત્થુજાતકં (૨-૪-૮)

૭૫. સીહઙ્ગુલી સીહનખો, સીહપાદપતિટ્ઠિતો;

સો સીહો સીહસઙ્ઘમ્હિ, એકો નદતિ અઞ્ઞથા.

૭૬. મા ત્વં નદિ રાજપુત્ત, અપ્પસદ્દો વને વસ;

સરેન ખો [મા (ક.)] તં જાનેય્યું, ન હિ તે પેત્તિકો સરોતિ.

સીહકોત્થુજાતકં અટ્ઠમં.

૧૮૯. સીહચમ્મજાતકં (૨-૪-૯)

૭૭. નેતં સીહસ્સ નદિતં, ન બ્યગ્ઘસ્સ ન [બ્યગ્ઘસ્સ ન ચ (ક.)] દીપિનો;

પારુતો સીહચમ્મેન, જમ્મો નદતિ ગદ્રભો.

૭૮. ચિરમ્પિ ખો તં ખાદેય્ય, ગદ્રભો હરિતં યવં;

પારુતો સીહચમ્મેન, રવમાનોવ દૂસયીતિ.

સીહચમ્મજાતકં નવમં.

૧૯૦. સીલાનિસંસજાતકં (૨-૪-૧૦)

૭૯. પસ્સ સદ્ધાય સીલસ્સ, ચાગસ્સ ચ અયં ફલં;

નાગો નાવાય વણ્ણેન, સદ્ધં વહતુપાસકં.

૮૦. સબ્ભિરેવ સમાસેથ, સબ્ભિ કુબ્બેથ સન્થવં;

સતઞ્હિ સન્નિવાસેન, સોત્થિં ગચ્છતિ ન્હાપિતોતિ.

સીલાનિસંસજાતકં દસમં.

અસદિસવગ્ગો ચતુત્થો.

તસ્સુદ્દાનં –

ધનુગ્ગહ કુઞ્જર અપ્પરસો, ગિરિદત્તમનાવિલચિત્તવરં;

દધિવાહન જમ્બૂક સીહનખો, હરિતયવ નાગવરેન દસાતિ.