૩. કલ્યાણવગ્ગો

૧૭૧. કલ્યાણધમ્મજાતકં (૨-૩-૧)

૪૧. કલ્યાણધમ્મોતિ યદા જનિન્દ, લોકે સમઞ્ઞં અનુપાપુણાતિ;

તસ્મા ન હિય્યેથ [હીયેથ (સી.)] નરો સપઞ્ઞો, હિરિયાપિ સન્તો ધુરમાદિયન્તિ.

૪૨. સાયં સમઞ્ઞા ઇધ મજ્જ પત્તા, કલ્યાણધમ્મોતિ જનિન્દ લોકે;

તાહં સમેક્ખં ઇધ પબ્બજિસ્સં, ન હિ મત્થિ છન્દો ઇધ કામભોગેતિ.

કલ્યાણધમ્મજાતકં પઠમં.

૧૭૨. દદ્દરજાતકં (૨-૩-૨)

૪૩. કો નુ સદ્દેન મહતા, અભિનાદેતિ દદ્દરં;

તં સીહા નપ્પટિનદન્તિ [કિં સીહા નપ્પટિનદન્તિ (સી. પી.), ન સીહા પટિનદન્તિ (ક.)], કો નામેસો મિગાધિભૂ.

૪૪. અધમો મિગજાતાનં, સિઙ્ગાલો તાત વસ્સતિ;

જાતિમસ્સ જિગુચ્છન્તા, તુણ્હી સીહા સમચ્છરેતિ.

દદ્દરજાતકં દુતિયં.

૧૭૩. મક્કટજાતકં (૨-૩-૩)

૪૫. તાત માણવકો એસો, તાલમૂલં અપસ્સિતો;

અગારકઞ્ચિદં અત્થિ, હન્દ દેમસ્સગારકં.

૪૬. મા ખો ત્વં તાત પક્કોસિ, દૂસેય્ય નો અગારકં;

નેતાદિસં મુખં હોતિ, બ્રાહ્મણસ્સ સુસીલિનોતિ.

મક્કટજાતકં તતિયં.

૧૭૪. દુબ્ભિયમક્કટજાતકં (૨-૩-૪)

૪૭. અદમ્હ તે વારિ પહૂતરૂપં, ઘમ્માભિતત્તસ્સ પિપાસિતસ્સ;

સો દાનિ પિત્વાન [પીત્વાન (સી. પી.)] કિરિઙ્કરોસિ [કિકિંકરોસિ (સી. સ્યા. પી.)], અસઙ્ગમો પાપજનેન સેય્યો.

૪૮. કો તે સુતો વા દિટ્ઠો વા, સીલવા નામ મક્કટો;

ઇદાનિ ખો તં ઓહચ્છં [ઊહચ્ચ (સી. પી.), ઓહચ્ચં (સ્યા.), ઉહજ્જં (ક.)], એસા અસ્માક ધમ્મતાતિ.

દુબ્ભિયમક્કટજાતકં ચતુત્થં.

૧૭૫. આદિચ્ચુપટ્ઠાનજાતકં (૨-૩-૫)

૪૯. સબ્બેસુ કિર ભૂતેસુ, સન્તિ સીલસમાહિતા;

પસ્સ સાખામિગં જમ્મં, આદિચ્ચમુપતિટ્ઠતિ.

૫૦. નાસ્સ સીલં વિજાનાથ, અનઞ્ઞાય પસંસથ;

અગ્ગિહુત્તઞ્ચ ઉહન્નં [ઊહન્તં (સી.), ઊહનં (સ્યા.), ઊહન્તિ (પી.), ઉહદં (ક.)], દ્વે ચ ભિન્ના કમણ્ડલૂતિ.

આદિચ્ચુપટ્ઠાનજાતકં પઞ્ચમં.

૧૭૬. કળાયમુટ્ઠિજાતકં (૨-૩-૬)

૫૧. બાલો વતાયં દુમસાખગોચરો, પઞ્ઞા જનિન્દ નયિમસ્સ વિજ્જતિ;

કળાયમુટ્ઠિં [કલાયમુટ્ઠિં (સી. પી.)] અવકિરિય કેવલં, એકં કળાયં પતિતં ગવેસતિ.

૫૨. એવમેવ મયં રાજ, યે ચઞ્ઞે અતિલોભિનો;

અપ્પેન બહું જિય્યામ, કળાયેનેવ વાનરોતિ.

કળાયમુટ્ઠિજાતકં છટ્ઠં.

૧૭૭. તિન્દુકજાતકં (૨-૩-૭)

૫૩. ધનુહત્થકલાપેહિ, નેત્તિં સવરધારિભિ;

સમન્તા પરિકિણ્ણમ્હ, કથં મોક્ખો ભવિસ્સતિ.

૫૪. અપ્પેવ બહુકિચ્ચાનં, અત્થો જાયેથ કોચિ નં;

અત્થિ રુક્ખસ્સ અચ્છિન્નં, ખજ્જથઞ્ઞેવ તિન્દુકન્તિ.

તિન્દુકજાતકં સત્તમં.

૧૭૮. કચ્છપજાતકં (૨-૩-૮)

૫૫. જનિત્તં મે ભવિત્તં મે, ઇતિ પઙ્કે અવસ્સયિં;

તં મં પઙ્કો અજ્ઝભવિ, યથા દુબ્બલકં તથા;

તં તં વદામિ ભગ્ગવ, સુણોહિ વચનં મમ.

૫૬. ગામે વા યદિ વા રઞ્ઞે, સુખં યત્રાધિગચ્છતિ;

તં જનિત્તં ભવિત્તઞ્ચ, પુરિસસ્સ પજાનતો;

યમ્હિ જીવે તમ્હિ ગચ્છે, ન નિકેતહતો સિયાતિ.

કચ્છપજાતકં અટ્ઠમં.

૧૭૯. સતધમ્મજાતકં (૨-૩-૯)

૫૭. તઞ્ચ અપ્પઞ્ચ ઉચ્છિટ્ઠં, તઞ્ચ કિચ્છેન નો અદા;

સોહં બ્રાહ્મણજાતિકો, યં ભુત્તં તમ્પિ ઉગ્ગતં.

૫૮. એવં ધમ્મં નિરંકત્વા [નિરાકત્વા (?) નિ + આ + કર + ત્વા], યો અધમ્મેન જીવતિ;

સતધમ્મોવ લાભેન, લદ્ધેનપિ ન નન્દતીતિ.

સતધમ્મજાતકં નવમં.

૧૮૦. દુદ્દદજાતકં (૨-૩-૧૦)

૫૯. દુદ્દદં દદમાનાનં, દુક્કરં કમ્મ કુબ્બતં;

અસન્તો નાનુકુબ્બન્તિ, સતં ધમ્મો દુરન્નયો.

૬૦. તસ્મા સતઞ્ચ અસતં, નાના હોતિ ઇતો ગતિ;

અસન્તો નિરયં યન્તિ, સન્તો સગ્ગપરાયણાતિ [પરાયના (સ્યા. ક.)].

દુદ્દદજાતકં દસમં.

કલ્યાણવગ્ગો તતિયો.

તસ્સુદ્દાનં –

સુસમઞ્ઞમિગાધિભૂ માણવકો, વારિપહૂતરૂપાદિચ્ચુપટ્ઠાના;

સકળાયસતિન્દુકપઙ્ક પુન, સતધમ્મ સુદુદ્દદકેન દસાતિ.