૨. સન્થવવગ્ગો

૧૬૧. ઇન્દસમાનગોત્તજાતકં (૨-૨-૧)

૨૧. ન સન્થવં [સન્ધવં (ક.)] કાપુરિસેન કયિરા, અરિયો અનરિયેન પજાનમત્થં;

ચિરાનુવુત્થોપિ કરોતિ પાપં, ગજો યથા ઇન્દસમાનગોત્તં.

૨૨. યં ત્વેવ જઞ્ઞા સદિસો મમન્તિ, સીલેન પઞ્ઞાય સુતેન ચાપિ;

તેનેવ મેત્તિં કયિરાથ સદ્ધિં, સુખો હવે સપ્પુરિસેન સઙ્ગમોતિ.

ઇન્દસમાનગોત્તજાતકં પઠમં.

૧૬૨. સન્થવજાતકં (૨-૨-૨)

૨૩. ન સન્થવસ્મા પરમત્થિ પાપિયો, યો સન્થવો [સન્ધવો (ક.)] કાપુરિસેન હોતિ;

સન્તપ્પિતો સપ્પિના પાયસેન [પાયાસેન (ક.)], કિચ્છાકતં પણ્ણકુટિં અદય્હિ [અદડ્ઢહિ (સી. સ્યા.), અદટ્ઠહિ (પી.), અદદ્દહિ (?)].

૨૪. ન સન્થવસ્મા પરમત્થિ સેય્યો, યો સન્થવો સપ્પુરિસેન હોતિ;

સીહસ્સ બ્યગ્ઘસ્સ ચ દીપિનો ચ, સામા મુખં લેહતિ સન્થવેનાતિ.

સન્થવજાતકં દુતિયં.

૧૬૩. સુસીમજાતકં (૨-૨-૩)

૨૫. કાળા મિગા સેતદન્તા તવીમે [તવ ઇમે (સી. સ્યા. પી.)], પરોસતં હેમજાલાભિછન્ના [હેમજાલાભિસઞ્છન્ના (સી.)];

તે તે દદામીતિ સુસીમ બ્રૂસિ, અનુસ્સરં પેત્તિપિતામહાનં.

૨૬. કાળા મિગા સેતદન્તા મમીમે [મમ ઇમે (સી. પી.)], પરોસતં હેમજાલાભિચ્છન્ના;

તે તે દદામીતિ વદામિ માણવ, અનુસ્સરં પેત્તિપિતામહાનન્તિ.

સુસીમજાતકં તતિયં.

૧૬૪. ગિજ્ઝજાતકં (૨-૨-૪)

૨૭. યં નુ ગિજ્ઝો યોજનસતં, કુણપાનિ અવેક્ખતિ;

કસ્મા જાલઞ્ચ પાસઞ્ચ, આસજ્જાપિ ન બુજ્ઝસિ.

૨૮. યદા પરાભવો હોતિ, પોસો જીવિતસઙ્ખયે;

અથ જાલઞ્ચ પાસઞ્ચ, આસજ્જાપિ ન બુજ્ઝતીતિ.

ગિજ્ઝજાતકં ચતુત્થં.

૧૬૫. નકુલજાતકં (૨-૨-૫)

૨૯. સન્ધિં કત્વા અમિત્તેન, અણ્ડજેન જલાબુજ;

વિવરિય દાઠં સેસિ [સયસિ (સી. સ્યા. પી.)], કુતો તે ભયમાગતં.

૩૦. સઙ્કેથેવ [સઙ્કતેવ (ક.)] અમિત્તસ્મિં, મિત્તસ્મિમ્પિ ન વિસ્સસે;

અભયા ભયમુપ્પન્નં, અપિ મૂલાનિ કન્તતીતિ [મૂલં નિકન્તતીતિ (સી.)].

નકુલજાતકં પઞ્ચમં.

૧૬૬. ઉપસાળકજાતકં (૨-૨-૬)

૩૧. ઉપસાળકનામાનિ [ઉપસાળ્હકનામાનં (સી. સ્યા. પી.)], સહસ્સાનિ ચતુદ્દસ;

અસ્મિં પદેસે દડ્ઢાનિ, નત્થિ લોકે અનામતં.

૩૨. યમ્હિ સચ્ચઞ્ચ ધમ્મો ચ, અહિંસા સંયમો દમો;

એતં અરિયા સેવન્તિ, એતં લોકે અનામતન્તિ.

ઉપસાળકજાતકં છટ્ઠં.

૧૬૭. સમિદ્ધિજાતકં (૨-૨-૭)

૩૩. અભુત્વા ભિક્ખસિ ભિક્ખુ, ન હિ ભુત્વાન ભિક્ખસિ;

ભુત્વાન ભિક્ખુ ભિક્ખસ્સુ, મા તં કાલો ઉપચ્ચગા.

૩૪. કાલં વોહં ન જાનામિ, છન્નો કાલો ન દિસ્સતિ;

તસ્મા અભુત્વા ભિક્ખામિ, મા મં કાલો ઉપચ્ચગાતિ.

સમિદ્ધિજાતકં સત્તમં.

૧૬૮. સકુણગ્ઘિજાતકં (૨-૨-૮)

૩૫. સેનો બલસા પતમાનો, લાપં ગોચરઠાયિનં;

સહસા અજ્ઝપ્પત્તોવ, મરણં તેનુપાગમિ.

૩૬. સોહં નયેન સમ્પન્નો, પેત્તિકે ગોચરે રતો;

અપેતસત્તુ મોદામિ, સમ્પસ્સં અત્થમત્તનોતિ.

સકુણગ્ઘિજાતકં અટ્ઠમં.

૧૬૯. અરકજાતકં (૨-૨-૯)

૩૭. યો વે મેત્તેન ચિત્તેન, સબ્બલોકાનુકમ્પતિ;

ઉદ્ધં અધો ચ તિરિયં, અપ્પમાણેન સબ્બસો.

૩૮. અપ્પમાણં હિતં ચિત્તં, પરિપુણ્ણં સુભાવિતં;

યં પમાણકતં કમ્મં, ન તં તત્રાવસિસ્સતીતિ.

અરકજાતકં નવમં.

૧૭૦. કકણ્ટકજાતકં (૨-૨-૧૦)

૩૯. નાયં પુરે ઉણ્ણમતિ [ઉન્નમતિ (સ્યા.)], તોરણગ્ગે કકણ્ટકો;

મહોસધ વિજાનાહિ, કેન થદ્ધો કકણ્ટકો.

૪૦. અલદ્ધપુબ્બં લદ્ધાન, અડ્ઢમાસં કકણ્ટકો;

અતિમઞ્ઞતિ રાજાનં, વેદેહં મિથિલગ્ગહન્તિ.

કકણ્ટકજાતકં દસમં.

સન્થવવગ્ગો દુતિયો.

તસ્સુદ્દાનં –

અથ ઇન્દસમાન સપણ્ણકુટિ, સુસિમુત્તમ ગિજ્ઝ જલાબુજકો;

ઉપસાળક ભિક્ખુ સલાપવરો, અથ મેત્તવરો દસપુણ્ણમતીતિ.