૫૨૦. ગન્ધતિન્દુકજાતકં (૧૦)

૩૩૨. અપ્પમાદો અમતં પદં [અમતપદં (સી. પી.)], પમાદો મચ્ચુનો પદં;

અપ્પમત્તા ન મીયન્તિ, યે પમત્તા યથા મતા.

૩૩૩. મદા પમાદો જાયેથ, પમાદા જાયતે ખયો;

ખયા પદોસા [ખયા ચ દોસા (સી.)] જાયન્તિ, મા પમાદો [મા મદો (સી. સ્યા. પી.)] ભરતૂસભ [ભારધૂસભ (ક.)].

૩૩૪. બહૂ હિ ખત્તિયા જીના, અત્થં રટ્ઠં પમાદિનો;

અથોપિ ગામિનો ગામા, અનગારા અગારિનો.

૩૩૫. ખત્તિયસ્સ પમત્તસ્સ, રટ્ઠસ્મિં રટ્ઠવડ્ઢન;

સબ્બે ભોગા વિનસ્સન્તિ, રઞ્ઞો તં વુચ્ચતે અઘં.

૩૩૬. નેસ ધમ્મો મહારાજ, અતિવેલં પમજ્જસિ;

ઇદ્ધં ફીતં જનપદં, ચોરા વિદ્ધંસયન્તિ નં.

૩૩૭. ન તે પુત્તા ભવિસ્સન્તિ, ન હિરઞ્ઞં ન ધાનિયં [ન હિરઞ્ઞનિધાનિયા (ક.)];

રટ્ઠે વિલુપ્પમાનમ્હિ, સબ્બભોગેહિ જિય્યસિ.

૩૩૮. સબ્બભોગા પરિજિણ્ણં, રાજાનં વાપિ ખત્તિયં [ખત્તિય (ક.)];

ઞાતિમિત્તા સુહજ્જા ચ, ન તં મઞ્ઞન્તિ માનિયં [મન્તિયં (સ્યા.)].

૩૩૯. હત્થારોહા અનીકટ્ઠા, રથિકા પત્તિકારકા;

તમેવમુપજીવન્તા, ન તં મઞ્ઞન્તિ માનિયં.

૩૪૦. અસંવિહિતકમ્મન્તં, બાલં દુમ્મન્તિમન્તિનં;

સિરી જહતિ દુમ્મેધં, જિણ્ણંવ ઉરગો તચં.

૩૪૧. સુસંવિહિતકમ્મન્તં, કાલુટ્ઠાયિં અતન્દિતં;

સબ્બે ભોગાભિવડ્ઢન્તિ, ગાવો સઉસભામિવ.

૩૪૨. ઉપસ્સુતિં મહારાજ, રટ્ઠે જનપદે ચર;

તત્થ દિસ્વા ચ સુત્વા ચ, તતો તં [ત્વં (ક.)] પટિપજ્જસિ.

૩૪૩. એવં વેદેતુ પઞ્ચાલો, સઙ્ગામે સરમપ્પિતો [સમપ્પિતો (સી. પી.)];

યથાહમજ્જ વેદેમિ, કણ્ટકેન સમપ્પિતો.

૩૪૪. જિણ્ણો દુબ્બલચક્ખૂસિ, ન રૂપં સાધુ પસ્સસિ;

કિં તત્થ બ્રહ્મદત્તસ્સ, યં તં મગ્ગેય્ય [મગ્ઘેય્ય (પી.)] કણ્ટકો [કણ્ડકો (સી. સ્યા. પી.)].

૩૪૫. બહ્વેત્થ બ્રહ્મદત્તસ્સ, સોહં [યોહં (સી. સ્યા. પી.)] મગ્ગસ્મિ [મગ્ગોસ્મિ (પી.)] બ્રાહ્મણ;

અરક્ખિતા જાનપદા, અધમ્મબલિના હતા.

૩૪૬. રત્તિઞ્હિ [રત્તિઞ્ચ (સી.)] ચોરા ખાદન્તિ, દિવા ખાદન્તિ તુણ્ડિયા;

રટ્ઠસ્મિં કૂટરાજસ્સ, બહુ અધમ્મિકો જનો.

૩૪૭. એતાદિસે ભયે જાતે [તાત (સી. પી.)], ભયટ્ટા તાત [તાવ (સી. પી.)] માણવા;

નિલ્લેનકાનિ કુબ્બન્તિ, વને આહત્વ કણ્ટકં.

૩૪૮. કદાસ્સુ નામયં રાજા, બ્રહ્મદત્તો મરિસ્સતિ;

યસ્સ રટ્ઠમ્હિ જિય્યન્તિ, અપ્પતિકા કુમારિકા.

૩૪૯. દુબ્ભાસિતઞ્હિ તે જમ્મિ, અનત્થપદકોવિદે;

કુહિં રાજા કુમારીનં, ભત્તારં પરિયેસતિ.

૩૫૦. ન મે દુબ્ભાસિતં બ્રહ્મે, કોવિદત્થપદા અહં;

અરક્ખિતા જાનપદા, અધમ્મબલિના હતા.

૩૫૧. રત્તિઞ્હિ ચોરા ખાદન્તિ, દિવા ખાદન્તિ તુણ્ડિયા;

રટ્ઠસ્મિં કૂટરાજસ્સ, બહુ અધમ્મિકો જનો;

દુજ્જીવે દુબ્ભરે દારે, કુતો ભત્તા કુમારિયો.

૩૫૨. એવં સયતુ પઞ્ચાલો, સઙ્ગામે સત્તિયા હતો;

યથાયં કપણો સેતિ, હતો ફાલેન સાલિયો.

૩૫૩. અધમ્મેન તુવં જમ્મ, બ્રહ્મદત્તસ્સ કુજ્ઝસિ;

યો ત્વં સપસિ રાજાનં, અપરજ્ઝિત્વાન અત્તનો [અત્તના (પી.)].

૩૫૪. ધમ્મેન બ્રહ્મદત્તસ્સ, અહં કુજ્ઝામિ બ્રાહ્મણ;

અરક્ખિતા જાનપદા, અધમ્મબલિના હતા.

૩૫૫. રત્તિઞ્હિ ચોરા ખાદન્તિ, દિવા ખાદન્તિ તુણ્ડિયા;

રટ્ઠસ્મિં કૂટરાજસ્સ, બહુ અધમ્મિકો જનો.

૩૫૬. સા નૂન પુન રે પક્કા, વિકાલે ભત્તમાહરિ;

ભત્તહારિં અપેક્ખન્તો, હતો ફાલેન સાલિયો.

૩૫૭. એવં હઞ્ઞતુ પઞ્ચાલો, સઙ્ગામે અસિના હતો [દળ્હં (પી.)];

યથાહમજ્જ પહતો, ખીરઞ્ચ મે પવટ્ટિતં.

૩૫૮. યં પસુ ખીરં છડ્ડેતિ, પસુપાલં વિહિંસતિ [પસુપાલઞ્ચ હિંસતિ (સી.), પસુ ફાલઞ્ચ હિંસતિ (પી.)];

કિં તત્થ બ્રહ્મદત્તસ્સ, યં નો ગરહતે [ગરહતો (પી.)] ભવં.

૩૫૯. ગારય્હો બ્રહ્મે પઞ્ચાલો, બ્રહ્મદત્તસ્સ રાજિનો;

અરક્ખિતા જાનપદા, અધમ્મબલિના હતા.

૩૬૦. રત્તિઞ્હિ ચોરા ખાદન્તિ, દિવા ખાદન્તિ તુણ્ડિયા;

રટ્ઠસ્મિં કૂટરાજસ્સ, બહુ અધમ્મિકો જનો.

૩૬૧. ચણ્ડા અટનકા [અટનક (પી.), અકટના (ક.)] ગાવી, યં પુરે ન દુહામસે;

તં દાનિ અજ્જ દોહામ, ખીરકામેહુપદ્દુતા.

૩૬૨. એવં કન્દતુ પઞ્ચાલો, વિપુત્તો વિપ્પસુક્ખતુ;

યથાયં કપણા ગાવી, વિપુત્તા પરિધાવતિ.

૩૬૩. યં પસુ પસુપાલસ્સ, સમ્ભમેય્ય [પબ્ભમેય્ય (સી. પી.)] રવેય્ય વા;

કો નીધ અપરાધત્થિ, બ્રહ્મદત્તસ્સ રાજિનો.

૩૬૪. અપરાધો મહાબ્રહ્મે, બ્રહ્મદત્તસ્સ રાજિનો;

અરક્ખિતા જાનપદા, અધમ્મબલિના હતા.

૩૬૫. રત્તિઞ્હિ ચોરા ખાદન્તિ, દિવા ખાદન્તિ તુણ્ડિયા;

રટ્ઠસ્મિં કૂટરાજસ્સ, બહુ અધમ્મિકો જનો;

કથં નો અસિકોસત્થા, ખીરપા હઞ્ઞતે પજા.

૩૬૬. એવં ખજ્જતુ પઞ્ચાલો, હતો યુદ્ધે સપુત્તકો;

યથાહમજ્જ ખજ્જામિ, ગામિકેહિ [ગામકેહિ (સી. પી.)] અરઞ્ઞજો.

૩૬૭. ન સબ્બભૂતેસુ વિધેન્તિ [વિધન્તિ (ક.)] રક્ખં, રાજાનો મણ્ડૂક મનુસ્સલોકે;

નેત્તાવતા રાજા અધમ્મચારી, યં તાદિસં જીવમદેય્યુ ધઙ્કા.

૩૬૮. અધમ્મરૂપો વત બ્રહ્મચારી, અનુપ્પિયં ભાસસિ ખત્તિયસ્સ;

વિલુપ્પમાનાય પુથુપ્પજાય, પૂજેસિ રાજં પરમપ્પમાદં [રાજં પરમપ્પવાદં (સી.), રાજા પરમપ્પવાદિં (સ્યા.)].

૩૬૯. સચે ઇમં બ્રહ્મે સુરજ્જકં સિયા, ફીતં રટ્ઠં મુદિતં [પૂરિતં (ક.)] વિપ્પસન્નં;

ભુત્વા બલિં અગ્ગપિણ્ડઞ્ચ કાકા, ન માદિસં જીવમદેય્યુ ધઙ્કાતિ.

ગન્ધતિન્દુકજાતકં દસમં.

તસ્સુદ્દાનં –

કિંછન્દ કુમ્ભ જયદ્દિસ છદ્દન્ત, અથ પણ્ડિતસમ્ભવ સિરકપિ;

દકરક્ખસ પણ્ડરનાગવરો, અથ સમ્બુલ તિન્દુકદેવસુતોતિ.

તિંસનિપાતં નિટ્ઠિતં.