૫૧૯. સમ્બુલાજાતકં (૯)

૨૯૭. કા વેધમાના ગિરિકન્દરાયં, એકા તુવં તિટ્ઠસિ સંહિતૂરુ [સઞ્ઞતૂર (સી. પી.), સઞ્ચિતૂરુ (સ્યા.)];

પુટ્ઠાસિ મે પાણિપમેય્યમજ્ઝે, અક્ખાહિ મે નામઞ્ચ બન્ધવે ચ.

૨૯૮. ઓભાસયં વનં રમ્મં, સીહબ્યગ્ઘનિસેવિતં;

કા વા ત્વમસિ કલ્યાણિ, કસ્સ વા ત્વં સુમજ્ઝિમે;

અભિવાદેમિ તં ભદ્દે, દાનવાહં નમત્થુ તે.

૨૯૯. યો પુત્તો કાસિરાજસ્સ, સોત્થિસેનોતિ તં વિદૂ;

તસ્સાહં સમ્બુલા ભરિયા, એવં જાનાહિ દાનવ;

અભિવાદેમિ તં ભન્તે [ભદ્દન્તે (સી. સ્યા.)], સમ્બુલાહં નમત્થુ તે.

૩૦૦. વેદેહપુત્તો ભદ્દન્તે, વને વસતિ આતુરો;

તમહં રોગસમ્મત્તં, એકા એકં ઉપટ્ઠહં [ઉપટ્ઠહિં (સી.)].

૩૦૧. અહઞ્ચ વનમુઞ્છાય, મધુમંસં મિગાબિલં [મિગાવિલં (સી.)];

યદા હરામિ તં ભક્ખો, તસ્સ નૂનજ્જ નાધતિ [નાથતિ (ક.)].

૩૦૨. કિં વને રાજપુત્તેન, આતુરેન કરિસ્સસિ;

સમ્બુલે પરિચિણ્ણેન, અહં ભત્તા ભવામિ તે.

૩૦૩. સોકટ્ટાય દુરત્તાય, કિં રૂપં વિજ્જતે મમ;

અઞ્ઞં પરિયેસ ભદ્દન્તે, અભિરૂપતરં મયા.

૩૦૪. એહિમં ગિરિમારુય્હ, ભરિયા મે [મય્હં (સી. સ્યા. પી.)] ચતુસ્સતા;

તાસં ત્વં પવરા હોહિ, સબ્બકામસમિદ્ધિની.

૩૦૫. નૂન [નનુ (સી. સ્યા. પી. ક.)] તારકવણ્ણાભે [હાટકવણ્ણાભે (પી.)], યં કિઞ્ચિ મનસિચ્છસિ;

સબ્બં તં પચુરં મય્હં, રમસ્સ્વજ્જ [રમસુજ્જ (સી. સ્યા.)] મયા સહ.

૩૦૬. નો ચે તુવં મહેસેય્યં, સમ્બુલે કારયિસ્સસિ;

અલં ત્વં પાતરાસાય, પણ્હે [મઞ્ઞે (સી. પી.)] ભક્ખા ભવિસ્સસિ.

૩૦૭. તઞ્ચ સત્તજટો લુદ્દો, કળારો પુરિસાદકો;

વને નાથં અપસ્સન્તિં, સમ્બુલં અગ્ગહી ભુજે.

૩૦૮. અધિપન્ના પિસાચેન, લુદ્દેનામિસચક્ખુના;

સા ચ સત્તુવસમ્પત્તા, પતિમેવાનુસોચતિ.

૩૦૯. ન મે ઇદં તથા દુક્ખં, યં મં ખાદેય્ય રક્ખસો;

યઞ્ચ મે અય્યપુત્તસ્સ, મનો હેસ્સતિ અઞ્ઞથા.

૩૧૦. ન સન્તિ દેવા પવસન્તિ નૂન, ન હિ નૂન સન્તિ ઇધ લોકપાલા;

સહસા કરોન્તાનમસઞ્ઞતાનં, ન હિ નૂન સન્તિ પટિસેધિતારો.

૩૧૧. ઇત્થીનમેસા પવરા યસસ્સિની, સન્તા સમા અગ્ગિરિવુગ્ગતેજા;

તઞ્ચે તુવં રક્ખસાદેસિ કઞ્ઞં, મુદ્ધા ચ હિ સત્તધા તે ફલેય્ય;

મા ત્વં દહી [જહી (પી.)] મુઞ્ચ પતિબ્બતાય [પતિબ્બતા સા (સી.), પતિબ્બતા યા (પી.)].

૩૧૨. સા ચ અસ્સમમાગચ્છિ, પમુત્તા પુરિસાદકા;

નીળં [નિડ્ડં (સ્યા. ક.)] પળિનં સકુણીવ [ફલિનસકુણીવ (સી. સ્યા. પી.)], ગતસિઙ્ગંવ આલયં.

૩૧૩. સા તત્થ પરિદેવેસિ, રાજપુત્તી યસસ્સિની;

સમ્બુલા ઉતુમત્તક્ખા, વને નાથં અપસ્સન્તી [અપસ્સતી (સી.)].

૩૧૪. સમણે બ્રાહ્મણે વન્દે, સમ્પન્નચરણે ઇસે;

રાજપુત્તં અપસ્સન્તી, તુમ્હંમ્હિ [તુમ્હં હિ (પી.)] સરણં ગતા.

૩૧૫. વન્દે સીહે ચ બ્યગ્ઘે ચ, યે ચ અઞ્ઞે વને મિગા;