૫૧૮. પણ્ડરનાગરાજજાતકં (૮)

૨૫૮. વિકિણ્ણવાચં અનિગુય્હ [અનિગૂળ્હ (પી.)] મન્તં, અસઞ્ઞતં અપરિચક્ખિતારં [અપરિરક્ખિતારં (ક.)];

ભયં તમન્વેતિ સયં અબોધં, નાગં યથા પણ્ડરકં સુપણ્ણો [સુવણ્ણો (ક.)].

૨૫૯. યો ગુય્હમન્તં પરિરક્ખનેય્યં, મોહા નરો સંસતિ હાસમાનો [ભાસમાનો (પી.)];

તં ભિન્નમન્તં ભયમન્વેતિ ખિપ્પં, નાગં યથા પણ્ડરકં સુપણ્ણો.

૨૬૦. નાનુમિત્તો ગરું અત્થં, ગુય્હં વેદિતુમરહતિ;

સુમિત્તો ચ અસમ્બુદ્ધં, સમ્બુદ્ધં વા અનત્થ વા.

૨૬૧. વિસ્સાસમાપજ્જિમહં અચેલં [અચેલો (સી. પી.)], સમણો અયં સમ્મતો ભાવિતત્તો;

તસ્સાહમક્ખિં વિવરિં [વિવરં (સી.)] ગુય્હમત્થં, અતીતમત્થો કપણં [કપણો (પી.)] રુદામિ.

૨૬૨. તસ્સાહં પરમં [પુરિમં (સી.)] બ્રહ્મે ગુય્હં, વાચઞ્હિ મં નાસક્ખિં [નાસક્ખિ (પી.)] સંયમેતું;

તપ્પક્ખતો હિ ભયમાગતં મમં, અતીતમત્થો કપણં રુદામિ.

૨૬૩. યો વે નરો સુહદં મઞ્ઞમાનો, ગુય્હમત્થં સંસતિ દુક્કુલીને;

દોસા ભયા અથવા રાગરત્તા [રાગરત્તો (સી. સ્યા. પી.)], પલ્લત્થિતો [પલ્લિત્થો (પી.), પલ્લત્તિતો (ક.)] બાલો અસંસયં સો.

૨૬૪. તિરોક્ખવાચો અસતં પવિટ્ઠો, યો સઙ્ગતીસુ મુદીરેતિ વાક્યં;

આસીવિસો દુમ્મુખોત્યાહુ તં નરં, આરા આરા [આરા અરા (પી.)] સંયમે તાદિસમ્હા.

૨૬૫. અન્નં પાનં કાસિક [કાસિકં (પી.)] ચન્દનઞ્ચ, મનાપિત્થિયો માલમુચ્છાદનઞ્ચ;

ઓહાય ગચ્છામસે સબ્બકામે, સુપણ્ણ પાણૂપગતાવ ત્યમ્હા.

૨૬૬. કો નીધ તિણ્ણં ગરહં ઉપેતિ, અસ્મિંધ લોકે પાણભૂ નાગરાજ;

સમણો સુપણ્ણો અથ વા ત્વમેવ, કિં કારણા પણ્ડરકગ્ગહીતો.

૨૬૭. સમણોતિ મે સમ્મતત્તો અહોસિ, પિયો ચ મે મનસા ભાવિતત્તો;

તસ્સાહમક્ખિં વિવરિં ગુય્હમત્થં, અતીતમત્થો કપણં રુદામિ.

૨૬૮. ન ચત્થિ સત્તો અમરો પથબ્યા, પઞ્ઞાવિધા નત્થિ ન નિન્દિતબ્બા;

સચ્ચેન ધમ્મેન ધિતિયા [ધિયા (સી. પી.)] દમેન, અલબ્ભમબ્યાહરતી નરો ઇધ.

૨૬૯. માતાપિતા પરમા બન્ધવાનં, નાસ્સ તતિયો અનુકમ્પકત્થિ;

તેસમ્પિ ગુય્હં પરમં ન સંસે, મન્તસ્સ ભેદં પરિસઙ્કમાનો.

૨૭૦. માતાપિતા ભગિની ભાતરો ચ, સહાયા વા યસ્સ હોન્તિ સપક્ખા;

તેસમ્પિ ગુય્હં પરમં ન સંસે, મન્તસ્સ ભેદં પરિસઙ્કમાનો.

૨૭૧. ભરિયા ચે પુરિસં વજ્જા, કોમારી પિયભાણિની;

પુત્તરૂપયસૂપેતા, ઞાતિસઙ્ઘપુરક્ખતા, તસ્સાપિ ગુય્હં પરમં ન સંસે;

મન્તસ્સ ભેદં પરિસઙ્કમાનો.

૨૭૨. ન ગુય્હમત્થં [ગુય્હત્થં (ક.)] વિવરેય્ય, રક્ખેય્ય નં યથા નિધિં;

ન હિ પાતુકતો સાધુ, ગુય્હો અત્થો પજાનતા.

૨૭૩. થિયા ગુય્હં ન સંસેય્ય, અમિત્તસ્સ ચ પણ્ડિતો;

યો ચામિસેન સંહીરો, હદયત્થેનો ચ યો નરો.

૨૭૪. ગુય્હમત્થં અસમ્બુદ્ધં, સમ્બોધયતિ યો નરો;

મન્તભેદભયા તસ્સ, દાસભૂતો તિતિક્ખતિ.

૨૭૫. યાવન્તો પુરિસસ્સત્થં, ગુય્હં જાનન્તિ મન્તિનં;

તાવન્તો તસ્સ ઉબ્બેગા, તસ્મા ગુય્હં ન વિસ્સજે.

૨૭૬. વિવિચ્ચ ભાસેય્ય દિવા રહસ્સં, રત્તિં ગિરં નાતિવેલં પમુઞ્ચે;

ઉપસ્સુતિકા હિ સુણન્તિ મન્તં, તસ્મા મન્તો ખિપ્પમુપેતિ ભેદં.

૨૭૭. યથાપિ અસ્સ [અયો (સ્યા.), અય (ક.)] નગરં મહન્તં, અદ્વારકં [આળારકં (પી.)] આયસં ભદ્દસાલં;

સમન્તખાતાપરિખાઉપેતં, એવમ્પિ મે તે ઇધ ગુય્હમન્તા.

૨૭૮. યે ગુય્હમન્તા અવિકિણ્ણવાચા, દળ્હા સદત્થેસુ નરા દુજિવ્હ [દુજિવ્હા (સ્યા. પી.)];

આરા અમિત્તા બ્યવજન્તિ તેહિ, આસીવિસા વા રિવ સત્તુસઙ્ઘા [સત્તસઙ્ઘા (સી. સ્યા.)].

૨૭૯. હિત્વા ઘરં પબ્બજિતો અચેલો, નગ્ગો મુણ્ડો ચરતિ ઘાસહેતુ;

તમ્હિ [તમ્હી (પી.)] નુ ખો વિવરિં ગુય્હમત્થં, અત્થા ચ ધમ્મા ચ અપગ્ગતમ્હા [અપાગતમ્હા (સી.), અપગતમ્હા (સ્યા.), અવાગતમ્હા (પી.)].

૨૮૦. કથંકરો હોતિ સુપણ્ણરાજ, કિંસીલો કેન વતેન વત્તં;

સમણો ચરં હિત્વા મમાયિતાનિ, કથંકરો સગ્ગમુપેતિ ઠાનં.

૨૮૧. હિરિયા તિતિક્ખાય દમેનુપેતો [દમેન ખન્તિયા (સી. સ્યા. પી.)], અક્કોધનો પેસુણિયં પહાય;

સમણો ચરં હિત્વા મમાયિતાનિ, એવંકરો સગ્ગમુપેતિ ઠાનં.

૨૮૨. માતાવ પુત્તં તરુણં તનુજ્જં [તનૂજં (સી.)], સમ્ફસ્સતા [સમ્પસ્સ તં (સી. પી.)] સબ્બગત્તં ફરેતિ;

એવમ્પિ મે ત્વં પાતુરહુ દિજિન્દ, માતાવ પુત્તં અનુકમ્પમાનો.

૨૮૩. હન્દજ્જ ત્વં મુઞ્ચ [મુચ્ચ (સી.)] વધા દુજિવ્હ, તયો હિ પુત્તા ન હિ અઞ્ઞો અત્થિ;

અન્તેવાસી દિન્નકો અત્રજો ચ, રજ્જસ્સુ [રજસ્સુ (સી. સ્યા. પી.)] પુત્તઞ્ઞતરો મે અહોસિ.

૨૮૪. ઇચ્ચેવ વાક્યં વિસજ્જી સુપણ્ણો, ભુમ્યં પતિટ્ઠાય દિજો દુજિવ્હં;

મુત્તજ્જ ત્વં સબ્બભયાતિવત્તો, થલૂદકે હોહિ મયાભિગુત્તો.

૨૮૫. આતઙ્કિનં યથા કુસલો ભિસક્કો, પિપાસિતાનં રહદોવ સીતો;

વેસ્મં યથા હિમસીતટ્ટિતાનં [હિમસિસિરટ્ટિતાનં (પી.)], એવમ્પિ તે સરણમહં ભવામિ.

૨૮૬. સન્ધિં કત્વા અમિત્તેન, અણ્ડજેન જલાબુજ;

વિવરિય દાઠં સેસિ, કુતો તં ભયમાગતં.

૨૮૭. સઙ્કેથેવ અમિત્તસ્મિં, મિત્તસ્મિમ્પિ ન વિસ્સસે;

અભયા ભયમુપ્પન્નં, અપિ મૂલાનિ કન્તતિ.

૨૮૮. કથં નુ વિસ્સસે ત્યમ્હિ, યેનાસિ કલહો કતો;

નિચ્ચયત્તેન ઠાતબ્બં, સો દિસબ્ભિ [સો દિસમ્હિ (પી.)] ન રજ્જતિ.

૨૮૯. વિસ્સાસયે ન ચ તં [નં (સી. સ્યા. પી.)] વિસ્સયેય્ય, અસઙ્કિતો સઙ્કિતો ચ [અસઙ્કિતો ચ સઙ્કિતો (સી. પી.)] ભવેય્ય;

તથા તથા વિઞ્ઞૂ પરક્કમેય્ય, યથા યથા ભાવં પરો ન જઞ્ઞા.

૨૯૦. તે દેવવણ્ણા [દેવવણ્ણી (પી.)] સુખુમાલરૂપા, ઉભો સમા સુજયા [સુજયો (સી. સ્યા. પી.)] પુઞ્ઞખન્ધા [પુઞ્ઞગન્ધા (પી.)];

ઉપાગમું કરમ્પિયં [કાદમ્બિયં (સી.), કારમ્બિયં (પી.)] અચેલં, મિસ્સીભૂતા અસ્સવાહાવ નાગા.

૨૯૧. તતો હવે પણ્ડરકો અચેલં, સયમેવુપાગમ્મ ઇદં અવોચ;

મુત્તજ્જહં સબ્બભયાતિવત્તો, ન હિ [હ (પી.)] નૂન તુય્હં મનસો પિયમ્હા.

૨૯૨. પિયો હિ મે આસિ સુપણ્ણરાજા, અસંસયં પણ્ડરકેન સચ્ચં;

સો રાગરત્તોવ અકાસિમેતં, પાપકમ્મં [પાપં કમ્મં (સી. પી.)] સમ્પજાનો ન મોહા.

૨૯૩. ન મે પિયં અપ્પિયં વાપિ હોતિ, સમ્પસ્સતો લોકમિમં પરઞ્ચ;

સુસઞ્ઞતાનઞ્હિ વિયઞ્જનેન, અસઞ્ઞતો લોકમિમં ચરાસિ.

૨૯૪. અરિયાવકાસોસિ અનરિયોવાસિ [અનરિયો ચાસિ (સી. પી.)], અસઞ્ઞતો સઞ્ઞતસન્નિકાસો;

કણ્હાભિજાતિકોસિ અનરિયરૂપો, પાપં બહું દુચ્ચરિતં અચારિ.

૨૯૫. અદુટ્ઠસ્સ તુવં દુબ્ભિ, દુબ્ભી [દૂભિ, દૂભી (પી.)] ચ પિસુણો ચસિ;

એતેન સચ્ચવજ્જેન, મુદ્ધા તે ફલતુ સત્તધા.

૨૯૬. તસ્મા હિ મિત્તાનં ન દુબ્ભિતબ્બં, મિત્તદુબ્ભા [મિત્તદુબ્ભા હિ (સ્યા.)] પાપિયો નત્થિ અઞ્ઞો;

આસિત્તસત્તો નિહતો પથબ્યા, ઇન્દસ્સ વાક્યેન હિ સંવરો હતોતિ.

પણ્ડરનાગરાજજાતકં [પણ્ડરકજાતકં (સી. સ્યા. પી.)] અટ્ઠમં.