૫૧૭. દકરક્ખસજાતકં (૭)

૨૨૪. સચે વો વુય્હમાનાનં, સત્તન્નં ઉદકણ્ણવે;

મનુસ્સબલિમેસાનો, નાવં ગણ્હેય્ય રક્ખસો;

અનુપુબ્બં કથં દત્વા, મુઞ્ચેસિ દકરક્ખસા [દકરક્ખતો (પી.)].

૨૨૫. માતરં પઠમં દજ્જં, ભરિયં દત્વાન ભાતરં;

તતો સહાયં દત્વાન, પઞ્ચમં દજ્જં [દજ્જ (સ્યા.)] બ્રાહ્મણં;

છટ્ઠાહં દજ્જમત્તાનં, નેવ દજ્જં મહોસધં.

૨૨૬. પોસેતા તે જનેત્તી ચ, દીઘરત્તાનુકમ્પિકા;

છબ્ભી તયિ પદુસ્સતિ [પદુટ્ઠસ્મિં (સી. સ્યા.)], પણ્ડિતા અત્થદસ્સિની;

અઞ્ઞં ઉપનિસં કત્વા, વધા તં પરિમોચયિ.

૨૨૭. તં તાદિસિં [તાદિસં (ક.)] પાણદદિં, ઓરસં ગબ્ભધારિનિં [ગબ્ભધારિણિં (સી. સ્યા.)];

માતરં કેન દોસેન, દજ્જાસિ દકરક્ખિનો [દકરક્ખતો (પી.)].

૨૨૮. દહરા વિયલઙ્કારં, ધારેતિ અપિળન્ધનં;

દોવારિકે અનીકટ્ઠે, અતિવેલં પજગ્ઘતિ [સઞ્જગ્ઘતિ (ક.)].

૨૨૯. અથોપિ પટિરાજૂનં, સયં દૂતાનિ સાસતિ;

માતરં તેન દોસેન, દજ્જાહં દકરક્ખિનો.

૨૩૦. ઇત્થિગુમ્બસ્સ પવરા, અચ્ચન્તં પિયભાણિની [અચ્ચન્તપિયવાદિની (સી. પી.)];

અનુગ્ગતા [અનુબ્બતા (સ્યા.), અનુપુબ્બતા (ક.)] સીલવતી, છાયાવ અનપાયિની.

૨૩૧. અક્કોધના પુઞ્ઞવતી [પઞ્ઞવતી (સી. પી.)], પણ્ડિતા અત્થદસ્સિની;

ઉબ્બરિં [ઉપ્પરિં (સી.)] કેન દોસેન, દજ્જાસિ દકરક્ખિનો.

૨૩૨. ખિડ્ડારતિસમાપન્નં, અનત્થવસમાગતં;

સા મં સકાન પુત્તાનં, અયાચં યાચતે ધનં.

૨૩૩. સોહં દદામિ સારત્તો [સારતો (સ્યા.)], બહું ઉચ્ચાવચં ધનં;

સુદુચ્ચજં ચજિત્વાન, પચ્છા સોચામિ દુમ્મનો;

ઉબ્બરિં તેન દોસેન, દજ્જાહં દકરક્ખિનો.

૨૩૪. યેનોચિતા જનપદા [જાનપદા (સી. સ્યા. પી.)], આનીતા ચ પટિગ્ગહં;

આભતં પરરજ્જેભિ, અભિટ્ઠાય બહું ધનં.

૨૩૫. ધનુગ્ગહાનં પવરં, સૂરં તિખિણમન્તિનં;

ભાતરં કેન દોસેન, દજ્જાસિ દકરક્ખિનો.

૨૩૬. યેનોચિતા [મયોચિતા (સી.), મયાચિતા (પી.)] જનપદા, આનીતા ચ પટિગ્ગહં;

આભતં પરરજ્જેભિ, અભિટ્ઠાય બહું ધનં.

૨૩૭. ધનુગ્ગહાનં પવરો, સૂરો તિખિણમન્તિ ચ [તિખિણમન્તિનો (ક.)];

મયાયં [મયા સો (સી. પી.)] સુખિતો રાજા, અતિમઞ્ઞતિ દારકો.

૨૩૮. ઉપટ્ઠાનમ્પિ મે અય્યે, ન સો એતિ યથા પુરે;

ભાતરં તેન દોસેન, દજ્જાહં દકરક્ખિનો.

૨૩૯. એકરત્તેન ઉભયો, ત્વઞ્ચેવ ધનુસેખ ચ [ધનુસેખવા (સી. સ્યા. પી.)];

ઉભો જાતેત્થ પઞ્ચાલા, સહાયા સુસમાવયા.

૨૪૦. ચરિયા તં અનુબન્ધિત્થો [અનુબન્ધો (ક.)], એકદુક્ખસુખો તવ;

ઉસ્સુક્કો તે દિવારત્તિં, સબ્બકિચ્ચેસુ બ્યાવટો;

સહાયં કેન દોસેન, દજ્જાસિ દકરક્ખિનો.

૨૪૧. ચરિયા મં અયં [ચરિયાય અયં (સી. પી.)] અય્યે, પજગ્ઘિત્થો [સઞ્જગ્ઘિત્થો (સ્યા.)] મયા સહ;

અજ્જાપિ તેન વણ્ણેન, અતિવેલં પજગ્ઘતિ.

૨૪૨. ઉબ્બરિયાપિહં અય્યે, મન્તયામિ રહોગતો;

અનામન્તો [અનામન્તા (સી.)] પવિસતિ, પુબ્બે અપ્પટિવેદિતો.

૨૪૩. લદ્ધદ્વારો [લદ્ધવારો (સી. પી.)] કતોકાસો, અહિરિકં અનાદરં;

સહાયં તેન દોસેન, દજ્જાહં દકરક્ખિનો.

૨૪૪. કુસલો સબ્બનિમિત્તાનં, રુતઞ્ઞૂ [રુદઞ્ઞૂ (સી. સ્યા. પી.)] આગતાગમો;

ઉપ્પાતે સુપિને યુત્તો, નિય્યાને ચ પવેસને.

૨૪૫. પટ્ઠો [પદ્ધો (સી. પી.)] ભૂમન્તલિક્ખસ્મિં, નક્ખત્તપદકોવિદો;

બ્રાહ્મણં કેન દોસેન, દજ્જાસિ દકરક્ખિનો.

૨૪૬. પરિસાયમ્પિ મે અય્યે, ઉમ્મીલિત્વા ઉદિક્ખતિ;

તસ્મા અચ્ચભમું લુદ્દં, દજ્જાહં દકરક્ખિનો.

૨૪૭. સસમુદ્દપરિયાયં, મહિં સાગરકુણ્ડલં;

વસુન્ધરં આવસસિ, અમચ્ચપરિવારિતો.

૨૪૮. ચાતુરન્તો મહારટ્ઠો, વિજિતાવી મહબ્બલો;

પથબ્યા એકરાજાસિ, યસો તે વિપુલં ગતો.

૨૪૯. સોળસિત્થિસહસ્સાનિ, આમુત્તમણિકુણ્ડલા;

નાનાજનપદા નારી, દેવકઞ્ઞૂપમા સુભા.

૨૫૦. એવં સબ્બઙ્ગસમ્પન્નં, સબ્બકામસમિદ્ધિનં;

સુખિતાનં પિયં દીઘં, જીવિતં આહુ ખત્તિય.

૨૫૧. અથ ત્વં કેન વણ્ણેન, કેન વા પન હેતુના;

પણ્ડિતં અનુરક્ખન્તો, પાણં ચજસિ દુચ્ચજં.

૨૫૨. યતોપિ આગતો અય્યે, મમ હત્થં મહોસધો;

નાભિજાનામિ ધીરસ્સ, અનુમત્તમ્પિ દુક્કટં.

૨૫૩. સચે ચ કિસ્મિચિ કાલે, મરણં મે પુરે સિયા;

સો મે પુત્તે [પુત્તે ચ મે (સી. સ્યા. પી.] પપુત્તે ચ, સુખાપેય્ય મહોસધો.

૨૫૪. અનાગતં પચ્ચુપ્પન્નં, સબ્બમત્થમ્પિ પસ્સતિ [સબ્બમત્થં વિપસ્સતિ (સી. સ્યા. પી.)];

અનાપરાધકમ્મન્તં, ન દજ્જં દકરક્ખિનો.

૨૫૫. ઇદં સુણાથ પઞ્ચાલા, ચૂળનેય્યસ્સ [ચૂળનીયસ્સ (સી.)] ભાસિતં;

પણ્ડિતં અનુરક્ખન્તો, પાણં ચજતિ દુચ્ચજં.

૨૫૬. માતુ ભરિયાય ભાતુચ્ચ, સખિનો બ્રાહ્મણસ્સ ચ;

અત્તનો ચાપિ પઞ્ચાલો, છન્નં ચજતિ જીવિતં.

૨૫૭. એવં મહત્થિકા [ખહિદ્ધિયા (સ્યા.), મહિદ્ધિકા (ક.)] પઞ્ઞા, નિપુણા સાધુચિન્તિની;

દિટ્ઠધમ્મહિતત્થાય, સમ્પરાયસુખાય ચાતિ.

દકરક્ખસજાતકં સત્તમં.