૫૧૪. છદ્દન્તજાતકં (૪)

૯૭. કિં નુ સોચસિનુચ્ચઙ્ગિ, પણ્ડૂસિ વરવણ્ણિનિ;

મિલાયસિ વિસાલક્ખિ, માલાવ પરિમદ્દિતા.

૯૮. દોહળો મે મહારાજ, સુપિનન્તેનુપજ્ઝગા [નુ’પચ્ચગા (સી. સ્યા. પી.)];

ન સો સુલભરૂપોવ, યાદિસો મમ દોહળો.

૯૯. યે કેચિ માનુસા કામા, ઇધ લોકસ્મિ નન્દને;

સબ્બે તે પચુરા મય્હં, અહં તે દમ્મિ દોહળં.

૧૦૦. લુદ્દા દેવ સમાયન્તુ, યે કેચિ વિજિતે તવ;

એતેસં અહમક્ખિસ્સં, યાદિસો મમ દોહળો.

૧૦૧. ઇમે તે લુદ્દકા દેવિ, કતહત્થા વિસારદા;

વનઞ્ઞૂ ચ મિગઞ્ઞૂ ચ, મમત્થે [મમ તે (પી.)] ચત્તજીવિતા.

૧૦૨. લુદ્દપુત્તા નિસામેથ, યાવન્તેત્થ સમાગતા;

છબ્બિસાણં ગજં સેતં, અદ્દસં સુપિને અહં;

તસ્સ દન્તેહિ મે અત્થો, અલાભે નત્થિ જીવિતં.

૧૦૩. ન નો પિતૂનં ન પિતામહાનં, દિટ્ઠો સુતો કુઞ્જરો છબ્બિસાણો;

યમદ્દસા સુપિને રાજપુત્તી, અક્ખાહિ નો યાદિસો હત્થિનાગો.

૧૦૪. દિસા ચતસ્સો વિદિસા ચતસ્સો, ઉદ્ધં અધો દસ દિસા ઇમાયો;

કતમં દિસં તિટ્ઠતિ નાગરાજા, યમદ્દસા સુપિને છબ્બિસાણં.

૧૦૫. ઇતો ઉજું ઉત્તરિયં દિસાયં, અતિક્કમ્મ સો સત્તગિરી બ્રહન્તે;

સુવણ્ણપસ્સો નામ ગિરી ઉળારો, સુપુપ્ફિતો [સમ્પુપ્ફિતો (સ્યા.)] કિમ્પુરિસાનુચિણ્ણો.

૧૦૬. આરુય્હ સેલં ભવનં કિન્નરાનં, ઓલોકય પબ્બતપાદમૂલં;

અથ દક્ખસી મેઘસમાનવણ્ણં, નિગ્રોધરાજં અથ સહસ્સપાદં [પોરં (ક.)].

૧૦૭. તત્થચ્છતી કુઞ્જરો છબ્બિસાણો, સબ્બસેતો દુપ્પસહો પરેભિ;

રક્ખન્તિ નં અટ્ઠસહસ્સનાગા, ઈસાદન્તા વાતજવપ્પહારિનો.

૧૦૮. તિટ્ઠન્તિ તે તુમૂલં [તુમૂલ (સ્યા.), ભિમૂલ (પી. ક.)] પસ્સસન્તા, કુપ્પન્તિ વાતસ્સપિ એરિતસ્સ;

મનુસ્સભૂતં પન તત્થ દિસ્વા, ભસ્મં કરેય્યું નાસ્સ રજોપિ તસ્સ.

૧૦૯. બહૂ હિમે રાજકુલમ્હિ સન્તિ, પિળન્ધના જાતરૂપસ્સ દેવી;

મુત્તામણીવેળુરિયામયા ચ, કિં કાહસિ દન્તપિળન્ધનેન;

મારેતુકામા કુઞ્જરં છબ્બિસાણં, ઉદાહુ ઘાતેસ્સસિ લુદ્દપુત્તે.

૧૧૦. સા ઇસ્સિતા દુક્ખિતા ચસ્મિ લુદ્દ, ઉદ્ધઞ્ચ સુસ્સામિ અનુસ્સરન્તી;

કરોહિ મે લુદ્દક એતમત્થં, દસ્સામિ તે ગામવરાનિ પઞ્ચ.

૧૧૧. કત્થચ્છતી કત્થમુપેતિ ઠાનં, વીથિસ્સ કા ન્હાન [નહાન (સી. પી.)] ગતસ્સ હોતિ;

કથઞ્હિ સો ન્હાયતિ [નહાયતિ (સી. પી.)] નાગરાજા, કથં વિજાનેમુ ગતિં ગજસ્સ.

૧૧૨. તત્થેવ સા પોક્ખરણી અદૂરે [અવિદૂરે (સ્યા. ક.)], રમ્મા સુતિત્થા ચ મહોદિકા [મહોદકા (સ્યા. ક.)] ચ;

સમ્પુપ્ફિતા ભમરગણાનુચિણ્ણા [કિણ્ણા (કત્થચિ)], એત્થ હિ સો ન્હાયતિ નાગરાજા.

૧૧૩. સીસં નહાતુપ્પલ [નહાતો ઉપ્પલ (સી. સ્યા. પી.)] માલભારી, સબ્બસેતો પુણ્ડરીકત્તચઙ્ગી;

આમોદમાનો ગચ્છતિ સન્નિકેતં, પુરક્ખત્વા મહેસિં સબ્બભદ્દં.

૧૧૪. તત્થેવ સો ઉગ્ગહેત્વાન વાક્યં, આદાય તૂણિઞ્ચ ધનુઞ્ચ લુદ્દો;

વિતુરિયતિ [વિતુરિય સો (સી. અટ્ઠ.)] સત્તગિરી બ્રહન્તે, સુવણ્ણપસ્સં નામ ગિરિં ઉળારં.

૧૧૫. આરુય્હ સેલં ભવનં કિન્નરાનં, ઓલોકયી પબ્બતપાદમૂલં;

તત્થદ્દસા મેઘસમાનવણ્ણં, નિગ્રોધરાજં અટ્ઠસહસ્સપાદં.

૧૧૬. તત્થદ્દસા કુઞ્જરં છબ્બિસાણં, સબ્બસેતં દુપ્પસહં પરેભિ;

રક્ખન્તિ નં અટ્ઠસહસ્સનાગા, ઈસાદન્તા વાતજવપ્પહારિનો.

૧૧૭. તત્થદ્દસા પોક્ખરણિં અદૂરે, રમ્મં સુતિત્થઞ્ચ મહોદિકઞ્ચ;

સમ્પુપ્ફિતં ભમરગણાનુચિણ્ણં, યત્થ હિ સો ન્હાયતિ નાગરાજા.

૧૧૮. દિસ્વાન નાગસ્સ ગતિં ઠિતિઞ્ચ, વીથિસ્સ યા ન્હાનગતસ્સ હોતિ;

ઓપાતમાગચ્છિ અનરિયરૂપો, પયોજિતો ચિત્તવસાનુગાય.

૧૧૯. ખણિત્વાન કાસું ફલકેહિ છાદયિ, અત્તાનમોધાય ધનુઞ્ચ લુદ્દો;

પસ્સાગતં પુથુસલ્લેન નાગં, સમપ્પયી દુક્કટકમ્મકારી.

૧૨૦. વિદ્ધો ચ નાગો કોઞ્ચમનાદિ ઘોરં, સબ્બે ચ [સબ્બેવ (સી. સ્યા. પી.)] નાગા નિન્નદું [નિન્નાદુ (સ્યા.), નિન્નાદં (ક.)] ઘોરરૂપં;

તિણઞ્ચ કટ્ઠઞ્ચ રણં [ચુણ્ણં (ક. સી. પી.)] કરોન્તા, ધાવિંસુ તે અટ્ઠદિસા સમન્તતો.

૧૨૧. વધિસ્સમેતન્તિ [વધિસ્સમેનન્તિ (સ્યા.)] પરામસન્તો, કાસાવમદ્દક્ખિ ધજં ઇસીનં;

દુક્ખેન ફુટ્ઠસ્સુદપાદિ સઞ્ઞા, અરહદ્ધજો સબ્ભિ અવજ્ઝરૂપો.

૧૨૨. અનિક્કસાવો કાસાવં, યો વત્થં પરિદહિસ્સતિ [પરિદહેસ્સતિ (સી. પી.), પરિધસ્સતિ (કત્થચિ)];

અપેતો દમસચ્ચેન, ન સો કાસાવમરહતિ.

૧૨૩. યો ચ વન્તકસાવસ્સ, સીલેસુ સુસમાહિતો;

ઉપેતો દમસચ્ચેન, સ વે કાસાવમરહતિ.

૧૨૪. સમપ્પિતો પુથુસલ્લેન નાગો, અદુટ્ઠચિત્તો લુદ્દકમજ્ઝભાસિ;

કિમત્થયં કિસ્સ વા સમ્મ હેતુ, મમં વધી કસ્સ વાયં પયોગો.

૧૨૫. કાસિસ્સ રઞ્ઞો મહેસી ભદન્તે, સા પૂજિતા રાજકુલે સુભદ્દા;

તં અદ્દસા સા ચ મમં અસંસિ, દન્તેહિ અત્થોતિ ચ મં [અત્થોતિ મમં (સ્યા. ક.)] અવોચ.

૧૨૬. બહૂ હિ મે દન્તયુગા ઉળારા, યે મે પિતૂનઞ્ચ [પિતુન્નમ્પિ (પી.)] પિતામહાનં;

જાનાતિ સા કોધના રાજપુત્તી, વધત્થિકા વેરમકાસિ બાલા.

૧૨૭. ઉટ્ઠેહિ ત્વં લુદ્દ ખરં ગહેત્વા, દન્તે ઇમે છિન્દ પુરા મરામિ;

વજ્જાસિ તં કોધનં રાજપુત્તિં, ‘‘નાગો હતો હન્દ ઇમસ્સ દન્તા’’.

૧૨૮. ઉટ્ઠાય સો લુદ્દો ખરં ગહેત્વા, છેત્વાન દન્તાનિ ગજુત્તમસ્સ;

વગ્ગૂ સુભે અપ્પટિમે પથબ્યા, આદાય પક્કામિ તતો હિ ખિપ્પં.

૧૨૯. ભયટ્ટિતા [ભયદ્દિતા (સી. પી.)] નાગવધેન અટ્ટા, યે તે નાગા અટ્ઠ દિસા વિધાવું;

અદિસ્વાન [અદિસ્વ (સી. પી.)] પોસં ગજપચ્ચમિત્તં, પચ્ચાગમું યેન સો નાગરાજા.

૧૩૦. તે તત્થ કન્દિત્વા રોદિત્વાન [રોદિત્વ (સી. પી.)] નાગા, સીસે સકે પંસુકં ઓકિરિત્વા;

અગમંસુ તે સબ્બે સકં નિકેતં, પુરક્ખત્વા મહેસિં સબ્બભદ્દં.

૧૩૧. આદાય દન્તાનિ ગજુત્તમસ્સ, વગ્ગૂ સુભે અપ્પટિમે પથબ્યા;

સુવણ્ણરાજીહિ સમન્તમોદરે, સો લુદ્દકો કાસિપુરં ઉપાગમિ;

ઉપનેસિ સો રાજકઞ્ઞાય દન્તે, નાગો હતો હન્દ ઇમસ્સ દન્તા.

૧૩૨. દિસ્વાન દન્તાનિ ગજુત્તમસ્સ, ભત્તુપ્પિયસ્સ પુરિમાય જાતિયા;

તત્થેવ તસ્સા હદયં અફાલિ, તેનેવ સા કાલમકાસિ બાલા.

૧૩૩. સમ્બોધિપત્તો સ [ચ (સી. સ્યા.), વ (પી.)] મહાનુભાવો, સિતં અકાસિ પરિસાય મજ્ઝે;

પુચ્છિંસુ ભિક્ખૂ સુવિમુત્તચિત્તા, નાકારણે પાતુકરોન્તિ બુદ્ધા.

૧૩૪. યમદ્દસાથ દહરિં કુમારિં, કાસાયવત્થં અનગારિયં ચરન્તિં;

સા ખો તદા રાજકઞ્ઞા અહોસિ, અહં તદા નાગરાજા અહોસિં.

૧૩૫. આદાય દન્તાનિ ગજુત્તમસ્સ, વગ્ગૂ સુભે અપ્પટિમે પથબ્યા;

યો લુદ્દકો કાસિપુરં ઉપાગમિ, સો ખો તદા દેવદત્તો અહોસિ.

૧૩૬. અનાવસૂરં ચિરરત્તસંસિતં, ઉચ્ચાવચં [ઉચં નીચં (સી. સ્યા. પી.)] ચરિતમિદં પુરાણં;

વીતદ્દરો વીતસોકો વિસલ્લો, સયં અભિઞ્ઞાય અભાસિ બુદ્ધો.

૧૩૭. અહં વો તેન કાલેન, અહોસિં તત્થ ભિક્ખવો;

નાગરાજા તદા હોમિ [હોસિં (સી. સ્યા. પી.)], એવં ધારેથ જાતકન્તિ.

છદ્દન્તજાતકં ચતુત્થં.