૫૧૩. જયદ્દિસજાતકં (૩)

૬૪. ચિરસ્સં વત મે ઉદપાદિ અજ્જ, ભક્ખો મહા સત્તમિભત્તકાલે;

કુતોસિ કો વાસિ તદિઙ્ઘ બ્રૂહિ, આચિક્ખ જાતિં વિદિતો યથાસિ.

૬૫. પઞ્ચાલરાજા મિગવં પવિટ્ઠો, જયદ્દિસો નામ યદિસ્સુતો તે;

ચરામિ કચ્છાનિ વનાનિ ચાહં, પસદં ઇમં ખાદ મમજ્જ મુઞ્ચ.

૬૬. સેનેવ ત્વં પણસિ સસ્સમાનો [સય્હમાનો (સ્યા. ક.)], મમેસ ભક્ખો પસદો યં વદેસિ;

તં ખાદિયાન પસદં જિઘઞ્ઞં [જિઘચ્છં (?)], ખાદિસ્સં પચ્છા ન વિલાપકાલો.

૬૭. ન ચત્થિ મોક્ખો મમ નિક્કયેન [વિક્કયેન (સી.)], ગન્ત્વાન પચ્ચાગમનાય પણ્હે;

તં સઙ્કરં [સઙ્ગરં (સી. સ્યા. પી.)] બ્રાહ્મણસ્સપ્પદાય, સચ્ચાનુરક્ખી પુનરાવજિસ્સં.

૬૮. કિં કમ્મજાતં અનુતપ્પતે ત્વં [અનુતપ્પતી તં (સી. પી.)], પત્તં સમીપં મરણસ્સ રાજ;

આચિક્ખ મે તં અપિ સક્કુણેમુ, અનુજાનિતું આગમનાય પણ્હે.

૬૯. કતા મયા બ્રાહ્મણસ્સ ધનાસા, તં સઙ્કરં પટિમુક્કં ન મુત્તં;

તં સઙ્કરં બ્રાહ્મણસ્સપ્પદાય, સચ્ચાનુરક્ખી પુનરાવજિસ્સં.

૭૦. યા તે કતા બ્રાહ્મણસ્સ ધનાસા, તં સઙ્કરં પટિમુક્કં ન મુત્તં;

તં સઙ્કરં બ્રાહ્મણસ્સપ્પદાય, સચ્ચાનુરક્ખી પુનરાવજસ્સુ.

૭૧. મુત્તો ચ સો પોરિસાદસ્સ [પુરિસાદસ્સ (પી.)] હત્થા, ગન્ત્વા સકં મન્દિરં કામકામી;

તં સઙ્કરં બ્રાહ્મણસ્સપ્પદાય, આમન્તયી પુત્તમલીનસત્તં [સત્તું (સ્યા. પી. ક.)].

૭૨. અજ્જેવ રજ્જં અભિસિઞ્ચયસ્સુ, ધમ્મં ચર સેસુ પરેસુ ચાપિ;

અધમ્મકારો ચ તે માહુ રટ્ઠે, ગચ્છામહં પોરિસાદસ્સ ઞત્તે [ઞન્તે (સ્યા.)].

૭૩. કિં કમ્મ કુબ્બં તવ દેવ પાવ [દેવપાદે (સી. સ્યા. પી.)], નારાધયી તં તદિચ્છામિ સોતું;

યમજ્જ રજ્જમ્હિ ઉદસ્સયે તુવં, રજ્જમ્પિ નિચ્છેય્યં તયા વિનાહં.

૭૪. ન કમ્મુના વા વચસા વ તાત, અપરાધિતોહં તુવિયં સરામિ;

સન્ધિઞ્ચ [સદ્ધિં ચ (ક.)] કત્વા પુરિસાદકેન, સચ્ચાનુરક્ખી પુનાહં ગમિસ્સં.

૭૫. અહં ગમિસ્સામિ ઇધેવ હોહિ, નત્થિ તતો જીવતો વિપ્પમોક્ખો;

સચે તુવં ગચ્છસિયેવ રાજ, અહમ્પિ ગચ્છામિ ઉભો ન હોમ.

૭૬. અદ્ધા હિ તાત સતાનેસ ધમ્મો, મરણા ચ મે દુક્ખતરં તદસ્સ;

કમ્માસપાદો તં યદા પચિત્વા, પસય્હ ખાદે ભિદા રુક્ખસૂલે.

૭૭. પાણેન તે પાણમહં નિમિસ્સં, મા ત્વં અગા પોરિસાદસ્સ ઞત્તે;

એતઞ્ચ તે પાણમહં નિમિસ્સં, તસ્મા મતં જીવિતસ્સ વણ્ણેમિ [વરેમિ (સી.)].

૭૮. તતો હવે ધિતિમા રાજપુત્તો, વન્દિત્વા માતુ ચ પિતુ ચ [વન્દિત્થ માતુચ્ચ પિતુચ્ચ (સી. પી.)] પાદે;

દુખિનિસ્સ માતા નિપતા [નિપતી (સી. પી.)] પથબ્યા, પિતાસ્સ પગ્ગય્હ ભુજાનિ કન્દતિ.

૭૯. તં ગચ્છન્તં તાવ પિતા વિદિત્વા, પરમ્મુખો વન્દતિ પઞ્જલીકો;

સોમો ચ રાજા વરુણો ચ રાજા, પજાપતી ચન્દિમા સૂરિયો ચ;

એતેહિ ગુત્તો પુરિસાદકમ્હા, અનુઞ્ઞાતો સોત્થિ પચ્ચેહિ તાત.

૮૦. યં દણ્ડકિરઞ્ઞો ગતસ્સ [યં દણ્ડકારઞ્ઞગતસ્સ (પી.)] માતા, રામસ્સકાસિ સોત્થાનં સુગુત્તા;

તં તે અહં સોત્થાનં કરોમિ, એતેન સચ્ચેન સરન્તુ દેવા;

અનુઞ્ઞાતો સોત્થિ પચ્ચેહિ પુત્ત.

૮૧. આવી રહો વાપી મનોપદોસં, નાહં સરે જાતુ મલીનસત્તે;

એતેન સચ્ચેન સરન્તુ દેવા, અનુઞ્ઞાતો સોત્થિ પચ્ચેહિ ભાતિક [ભાત (સી.), ભાતા (સ્યા. પી.)].

૮૨. યસ્મા ચ મે અનધિમનોસિ સામિ, ન ચાપિ મે મનસા અપ્પિયોસિ;

એતેન સચ્ચેન સરન્તુ દેવા, અનુઞ્ઞાતો સોત્થિ પચ્ચેહિ સામિ.

૮૩. બ્રહા ઉજૂ ચારુમુખો કુતોસિ, ન મં પજાનાસિ વને વસન્તં;

લુદ્દં મં ઞત્વા ‘‘પુરિસાદકો’’તિ, કો સોત્થિ માજાનમિધા’વજેય્ય.

૮૪. જાનામિ લુદ્દ પુરિસાદકો ત્વં, ન તં ન જાનામિ વને વસન્તં;

અહઞ્ચ પુત્તોસ્મિ જયદ્દિસસ્સ, મમજ્જ ખાદ પિતુનો પમોક્ખા.

૮૫. જાનામિ પુત્તોતિ [પુત્તોસિ (સ્યા. ક.)] જયદ્દિસસ્સ, તથા હિ વો મુખવણ્ણો ઉભિન્નં;

સુદુક્કરઞ્ઞેવ [સુદુક્કરઞ્ચેવ (સ્યા. પી. ક.)] કતં તવેદં, યો મત્તુમિચ્છે પિતુનો પમોક્ખા.

૮૬. ન દુક્કરં કિઞ્ચિ મહેત્થ મઞ્ઞે, યો મત્તુમિચ્છે પિતુનો પમોક્ખા;

માતુ ચ [માતુચ્ચ (સી.)] હેતુ પરલોક ગન્ત્વા [ગમ્યા (સી. સ્યા.), ગમ્ય (પી.)], સુખેન સગ્ગેન ચ સમ્પયુત્તો.

૮૭. અહઞ્ચ ખો અત્તનો પાપકિરિયં, આવી રહો વાપિ સરે ન જાતુ;

સઙ્ખાતજાતીમરણોહમસ્મિ, યથેવ મે ઇધ તથા પરત્થ.

૮૮. ખાદજ્જ મં દાનિ મહાનુભાવ, કરસ્સુ કિચ્ચાનિ ઇમં સરીરં;

રુક્ખસ્સ વા તે પપતામિ અગ્ગા, છાદયમાનો મય્હં ત્વમદેસિ મંસં.

૮૯. ઇદઞ્ચ તે રુચ્ચતિ રાજપુત્ત, ચજેસિ [ચજાસિ (સી. પી.)] પાણં પિતુનો પમોક્ખા;

તસ્મા હિ સો [તસ્માતિહ (સી. સ્યા.)] ત્વં તરમાનરૂપો, સમ્ભઞ્જ કટ્ઠાનિ જલેહિ અગ્ગિં.

૯૦. તતો હવે ધિતિમા રાજપુત્તો, દારું સમાહત્વા મહન્તમગ્ગિં;

સન્દીપયિત્વા પટિવેદયિત્થ, આદીપિતો દાનિ મહાયમગ્ગિ [મયા યક્ખમગ્ગિ (ક.)].

૯૧. ખાદજ્જ મં દાનિ પસય્હકારી, કિં મં મુહું પેક્ખસિ હટ્ઠલોમો;

તથા તથા તુય્હમહં કરોમિ, યથા યથા મં છાદયમાનો અદેસિ.

૯૨. કો તાદિસં અરહતિ ખાદિતાયે, ધમ્મે ઠિતં સચ્ચવાદિં વદઞ્ઞું;

મુદ્ધાપિ તસ્સ વિફલેય્ય સત્તધા, યો તાદિસં સચ્ચવાદિં અદેય્ય.

૯૩. ઇદઞ્હિ સો બ્રાહ્મણં મઞ્ઞમાનો, સસો અવાસેસિ સકે સરીરે;

તેનેવ સો ચન્દિમા દેવપુત્તો, સસત્થુતો [સસટ્ઠકો (સ્યા.)] કામદુહજ્જ [કામરુહજ્જ (ક.)] યક્ખ.

૯૪. ચન્દો યથા રાહુમુખા પમુત્તો, વિરોચતે પન્નરસેવ ભાણુમા [ભાનુમા (સી. પી.)];

એવં તુવં પોરિસાદા પમુત્તો, વિરોચ કપિલે [કમ્પિલ્લ (સી. પી.), કપિલ્લે (સ્યા.)] મહાનુભાવ;

આમોદયં પિતરં માતરઞ્ચ, સબ્બો ચ તે નન્દતુ ઞાતિપક્ખો.

૯૫. તતો હવે ધિતિમા રાજપુત્તો, કતઞ્જલી પરિયાય [પરિયગા (સી.), પગ્ગય્હ (સ્યા. પી.)] પોરિસાદં;

અનુઞ્ઞાતો સોત્થિ સુખી અરોગો, પચ્ચાગમા [પચ્ચાગ (પી.)] કપિલમલીનસત્તા [કમ્પિલ્લ’મલીનસત્તો (સી. પી.), કપિલ’મલીનસત્તા (ક.)].

૯૬. તં નેગમા જાનપદા ચ સબ્બે, હત્થારોહા રથિકા પત્તિકા ચ;

નમસ્સમાના પઞ્જલિકા ઉપાગમું, નમત્થુ તે દુક્કરકારકોસીતિ.

જયદ્દિસજાતકં [જયદિસજાતકં (ક.)] તતિયં.