૫૧૦. અયોઘરજાતકં (૧૪)

૩૬૩. યમેકરત્તિં પઠમં, ગબ્ભે વસતિ માણવો;

અબ્ભુટ્ઠિતોવ સો યાતિ [સયતિ (સી. પી.), સ યાતિ (કત્થચિ)], સગચ્છં ન નિવત્તતિ.

૩૬૪. ન યુજ્ઝમાના ન બલેનવસ્સિતા, નરા ન જીરન્તિ ન ચાપિ મિય્યરે;

સબ્બં હિદં [હિ તં (સી. પી.)] જાતિજરાયુપદ્દુતં, તં મે મતી હોતિ ચરામિ ધમ્મં.

૩૬૫. ચતુરઙ્ગિનિં સેનં સુભિંસરૂપં, જયન્તિ રટ્ઠાધિપતી પસય્હ;

ન મચ્ચુનો જયિતુમુસ્સહન્તિ, તં મે મતી હોતિ ચરામિ ધમ્મં.

૩૬૬. હત્થીહિ અસ્સેહિ રથેહિ પત્તિભિ, પરિવારિતા મુચ્ચરે એકચ્ચેય્યા [એકચેય્યા (સી. પી.)];

ન મચ્ચુનો [ન મચ્ચુતો (સી.)] મુચ્ચિતુમુસ્સહન્તિ, તં મે મતી હોતિ ચરામિ ધમ્મં.

૩૬૭. હત્થીહિ અસ્સેહિ રથેહિ પત્તિભિ, સૂરા [પુરા (ક.)] પભઞ્જન્તિ પધંસયન્તિ;

ન મચ્ચુનો ભઞ્જિતુમુસ્સહન્તિ, તં મે મતી હોતિ ચરામિ ધમ્મં.

૩૬૮. મત્તા ગજા ભિન્નગળા [પભિન્નગલા (સી.)] પભિન્ના, નગરાનિ મદ્દન્તિ જનં હનન્તિ;

ન મચ્ચુનો મદ્દિતુમુસ્સહન્તિ, તં મે મતી હોતિ ચરામિ ધમ્મં.

૩૬૯. ઇસ્સાસિનો કતહત્થાપિ વીરા [વીરા (સી. પી.)], દૂરેપાતી [પતી (ક.)] અક્ખણવેધિનોપિ;

ન મચ્ચુનો વિજ્ઝિતુમુસ્સહન્તિ, તં મે મતી હોતિ ચરામિ ધમ્મં.

૩૭૦. સરાનિ ખીયન્તિ સસેલકાનના, સબ્બં હિદં [હિ તં (સી. પી.), પિતં (સ્યા.)] ખીયતિ દીઘમન્તરં;

સબ્બં હિદં [હિ તં (સી. પી.), પિતં (સ્યા.)] ભઞ્જરે કાલપરિયાયં, તં મે મતી હોતિ ચરામિ ધમ્મં.

૩૭૧. સબ્બે સમેવં હિ નરાનનારિનં [નરાનરીનં (પી.), નારી નરાનં (સ્યા.), નરનારીનં (ક.)], ચલાચલં પાણભુનોધ જીવિતં;

પટોવ ધુત્તસ્સ દુમોવ કૂલજો, તં મે મતી હોતિ ચરામિ ધમ્મં.

૩૭૨. દુમપ્ફલાનેવ પતન્તિ માણવા, દહરા ચ વુદ્ધા ચ સરીરભેદા;

નારિયો નરા મજ્ઝિમપોરિસા ચ, તં મે મતી હોતિ ચરામિ ધમ્મં.

૩૭૩. નાયં વયો તારકરાજસન્નિભો, યદબ્ભતીતં ગતમેવ દાનિ તં;

જિણ્ણસ્સ હી નત્થિ રતી કુતો સુખં, તં મે મતી હોતિ ચરામિ ધમ્મં.

૩૭૪. યક્ખા પિસાચા અથવાપિ પેતા, કુપિતાતે [કુપિતાપિ તે (સી. પી.)] અસ્સસન્તિ મનુસ્સે;

ન મચ્ચુનો અસ્સસિતુસ્સહન્તિ, તં મે મતી હોતિ ચરામિ ધમ્મં.

૩૭૫. યક્ખે પિસાચે અથવાપિ પેતે, કુપિતેપિ તે નિજ્ઝપનં કરોન્તિ;

ન મચ્ચુનો નિજ્ઝપનં કરોન્તિ, તં મે મતી હોતિ ચરામિ ધમ્મં.

૩૭૬. અપરાધકે દૂસકે હેઠકે ચ, રાજાનો દણ્ડેન્તિ વિદિત્વાન દોસં;

ન મચ્ચુનો દણ્ડયિતુસ્સહન્તિ, તં મે મતી હોતિ ચરામિ ધમ્મં.

૩૭૭. અપરાધકા દૂસકા હેટ્ઠકા ચ, લભન્તિ તે રાજિનો નિજ્ઝપેતું;

ન મચ્ચુનો નિજ્ઝપનં કરોન્તિ, તં મે મતી હોતિ ચરામિ ધમ્મં.

૩૭૮. ન ખત્તિયોતિ ન ચ બ્રાહ્મણોતિ, ન અડ્ઢકા બલવા તેજવાપિ;

ન મચ્ચુરાજસ્સ અપેક્ખમત્થિ, તં મે મતી હોતિ ચરામિ ધમ્મં.

૩૭૯. સીહા ચ બ્યગ્ઘા ચ અથોપિ દીપિયો, પસય્હ ખાદન્તિ વિપ્ફન્દમાનં;

ન મચ્ચુનો ખાદિતુમુસ્સહન્તિ, તં મે મતી હોતિ ચરામિ ધમ્મં.

૩૮૦. માયાકારા રઙ્ગમજ્ઝે કરોન્તા, મોહેન્તિ ચક્ખૂનિ જનસ્સ તાવદે;

ન મચ્ચુનો મોહયિતુસ્સહન્તિ, તં મે મતી હોતિ ચરામિ ધમ્મં.

૩૮૧. આસીવિસા કુપિતા ઉગ્ગતેજા, ડંસન્તિ મારેન્તિપિ તે મનુસ્સે;

ન મચ્ચુનો ડંસિતુમુસ્સહન્તિ, તં મે મતી હોતિ ચરામિ ધમ્મં.

૩૮૨. આસીવિસા કુપિતા યં ડંસન્તિ, તિકિચ્છકા તેસ વિસં હનન્તિ;

ન મચ્ચુનો દટ્ઠવિસં [દટ્ઠસ્સ વિસં (ક.)] હનન્તિ, તં મે મતી હોતિ ચરામિ ધમ્મં.

૩૮૩. ધમ્મન્તરી વેત્તરણી [વેતરણી (સી. પી.)] ચ ભોજો, વિસાનિ હન્ત્વાન ભુજઙ્ગમાનં;

સુય્યન્તિ તે કાલકતા તથેવ, તં મે મતી હોતિ ચરામિ ધમ્મં.

૩૮૪. વિજ્જાધરા ઘોરમધીયમાના, અદસ્સનં ઓસધેહિ વજન્તિ;

ન મચ્ચુરાજસ્સ વજન્તદસ્સનં [વજન્તિ અદસ્સનં (સ્યા. ક.)], તં મે મતી હોતિ ચરામિ ધમ્મં.

૩૮૫. ધમ્મો હવે રક્ખતિ ધમ્મચારિં, ધમ્મો સુચિણ્ણો સુખમાવહાતિ;

એસાનિસંસો ધમ્મે સુચિણ્ણે, ન દુગ્ગતિં ગચ્છતિ ધમ્મચારી.

૩૮૬. ન હિ ધમ્મો અધમ્મો ચ, ઉભો સમવિપાકિનો;

અધમ્મો નિરયં નેતિ, ધમ્મો પાપેતિ સુગ્ગતિન્તિ.

અયોઘરજાતકં ચુદ્દસમં.

તસ્સુદ્દાનં –

માતઙ્ગ સમ્ભૂત સિવિ સિરિમન્તો, રોહણ હંસ સત્તિગુમ્બો ભલ્લાતિય;

સોમનસ્સ ચમ્પેય્ય બ્રહ્મ પઞ્ચ-પણ્ડિત ચિરસ્સંવત અયોઘરાતિ.

વીસતિનિપાતં નિટ્ઠિતં.