૫૦૯. હત્થિપાલજાતકં (૧૩)

૩૩૭. ચિરસ્સં વત પસ્સામ, બ્રાહ્મણં દેવવણ્ણિનં;

મહાજટં ખારિધરં [ભારધરં (પી.)], પઙ્કદન્તં રજસ્સિરં.

૩૩૮. ચિરસ્સં વત પસ્સામ, ઇસિં ધમ્મગુણે રતં;

કાસાયવત્થવસનં, વાકચીરં પટિચ્છદં.

૩૩૯. આસનં ઉદકં પજ્જં, પટિગણ્હાતુ નો ભવં;

અગ્ઘે ભવન્તં પુચ્છામ, અગ્ઘં કુરુતુ નો ભવં.

૩૪૦. અધિચ્ચ વેદે પરિયેસ વિત્તં, પુત્તે ગહે [ગેહે (સી. સ્યા. પી.)] તાત પતિટ્ઠપેત્વા;

ગન્ધે રસે પચ્ચનુભુય્ય [પચ્ચનુભોત્વ (સ્યા.), પચ્ચનુભુત્વ (પી.)] સબ્બં, અરઞ્ઞં સાધુ મુનિ સો પસત્થો.

૩૪૧. વેદા ન સચ્ચા ન ચ વિત્તલાભો, ન પુત્તલાભેન જરં વિહન્તિ;

ગન્ધે રસે મુચ્ચન [મુઞ્ચન (સી. ક.)] માહુ સન્તો, સકમ્મુના [સકમ્મના (સી. પી.)] હોતિ ફલૂપપત્તિ.

૩૪૨. અદ્ધા હિ સચ્ચં વચનં તવેતં, સકમ્મુના હોતિ ફલૂપપત્તિ;

જિણ્ણા ચ માતાપિતરો તવીમે [તવેમે (સી.), તવ યિમે (સ્યા. પી.)], પસ્સેય્યું તં વસ્સસતં અરોગં [અરોગ્યં (સ્યા. ક.)].

૩૪૩. યસ્સસ્સ સક્ખી મરણેન રાજ, જરાય મેત્તી નરવીરસેટ્ઠ;

યો ચાપિ જઞ્ઞા ન મરિસ્સં કદાચિ, પસ્સેય્યું તં વસ્સસતં અરોગં.

૩૪૪. યથાપિ નાવં પુરિસો દકમ્હિ, એરેતિ ચે નં ઉપનેતિ તીરં;

એવમ્પિ બ્યાધી સતતં જરા ચ, ઉપનેતિ મચ્ચં [મચ્ચુ (સ્યા. પી.)] વસમન્તકસ્સ.

૩૪૫. પઙ્કો ચ કામા પલિપો ચ કામા, મનોહરા દુત્તરા મચ્ચુધેય્યા;

એતસ્મિં પઙ્કે પલિપે બ્યસન્ના [વિસન્ના (સ્યા. ક.)], હીનત્તરૂપા ન તરન્તિ પારં.

૩૪૬. અયં પુરે લુદ્દમકાસિ કમ્મં, સ્વાયં ગહીતો ન હિ મોક્ખિતો મે;

ઓરુન્ધિયા નં પરિરક્ખિસ્સામિ, માયં પુન લુદ્દમકાસિ કમ્મં.

૩૪૭. ગવંવ [ગાવંવ (સી.)] નટ્ઠં પુરિસો યથા વને, અન્વેસતી [પરિયેસતી (સી. પી.)] રાજ અપસ્સમાનો;

એવં નટ્ઠો એસુકારી મમત્થો, સોહં કથં ન ગવેસેય્યં રાજ.

૩૪૮. હિય્યોતિ હિય્યતિ [હીયોતિ હીયતિ (સી.)] પોસો, પરેતિ પરિહાયતિ;

અનાગતં નેતમત્થીતિ ઞત્વા, ઉપ્પન્નછન્દં કો પનુદેય્ય ધીરો.

૩૪૯. પસ્સામિ વોહં દહરં [દહરી (સ્યા. પી. ક.)] કુમારિં, મત્તૂપમં કેતકપુપ્ફનેત્તં;

અભુત્તભોગે [અભુત્વ ભોગે (સ્યા. ક. અટ્ઠ.), અભુત્વ ભોગે (પી.), ભોગે અતુત્વા (ક.)] પઠમે વયસ્મિં, આદાય મચ્ચુ વજતે કુમારિં.

૩૫૦. યુવા સુજાતો સુમુખો સુદસ્સનો, સામો કુસુમ્ભપરિકિણ્ણમસ્સુ;

હિત્વાન કામે પટિકચ્ચ [પટિગચ્ચ (સી.), પટિગચ્છ (સ્યા. પી.)] ગેહં, અનુજાન મં પબ્બજિસ્સામિ દેવ.

૩૫૧. સાખાહિ રુક્ખો લભતે સમઞ્ઞં, પહીનસાખં પન ખાણુમાહુ;

પહીનપુત્તસ્સ મમજ્જ ભોતિ, વાસેટ્ઠિ ભિક્ખાચરિયાય કાલો.

૩૫૨. અઘસ્મિ કોઞ્ચાવ યથા હિમચ્ચયે, કતાનિ [તન્તાનિ (સી. પી.)] જાલાનિ પદાલિય [પદાલેય્ય (સી.)] હંસા;

ગચ્છન્તિ પુત્તા ચ પતી ચ મય્હં, સાહં કથં નાનુવજે પજાનં.

૩૫૩. એતે ભુત્વા વમિત્વા ચ, પક્કમન્તિ વિહઙ્ગમા;

યે ચ ભુત્વાન વમિંસુ, તે મે હત્થત્ત [હત્થત્થ (સી. સ્યા. પી.)] માગતા.

૩૫૪. અવમી બ્રાહ્મણો કામે, સો [તે (સી. પી.)] ત્વં પચ્ચાવમિસ્સસિ;

વન્તાદો પુરિસો રાજ, ન સો હોતિ પસંસિયો.

૩૫૫. પઙ્કે ચ [પઙ્કેવ (સી. પી.)] પોસં પલિપે બ્યસન્નં, બલી યથા દુબ્બલમુદ્ધરેય્ય;

એવમ્પિ મં ત્વં ઉદતારિ ભોતિ, પઞ્ચાલિ ગાથાહિ સુભાસિતાહિ.

૩૫૬. ઇદં વત્વા મહારાજા, એસુકારી દિસમ્પતિ;

રટ્ઠં હિત્વાન પબ્બજિ, નાગો છેત્વાવ બન્ધનં.

૩૫૭. રાજા ચ પબ્બજ્જમરોચયિત્થ, રટ્ઠં પહાય નરવીરસેટ્ઠો;

તુવમ્પિ નો હોતિ યથેવ રાજા, અમ્હેહિ ગુત્તા અનુસાસ રજ્જં.

૩૫૮. રાજા ચ પબ્બજ્જમરોચયિત્થ, રટ્ઠં પહાય નરવીરસેટ્ઠો;

અહમ્પિ એકા [એકાવ (સી.)] ચરિસ્સામિ લોકે, હિત્વાન કામાનિ મનોરમાનિ.

૩૫૯. રાજા ચ પબ્બજ્જમરોચયિત્થ, રટ્ઠં પહાય નરવીરસેટ્ઠો;

અહમ્પિ એકા ચરિસ્સામિ લોકે, હિત્વાન કામાનિ યથોધિકાનિ.

૩૬૦. અચ્ચેન્તિ કાલા તરયન્તિ રત્તિયો, વયોગુણા અનુપુબ્બં જહન્તિ;

અહમ્પિ એકા ચરિસ્સામિ લોકે, હિત્વાન કામાનિ મનોરમાનિ.

૩૬૧. અચ્ચેન્તિ કાલા તરયન્તિ રત્તિયો, વયોગુણા અનુપુબ્બં જહન્તિ;

અહમ્પિ એકા ચરિસ્સામિ લોકે, હિત્વાન કામાનિ યથોધિકાનિ.

૩૬૨. અચ્ચેન્તિ કાલા તરયન્તિ રત્તિયો, વયોગુણા અનુપુબ્બં જહન્તિ;

અહમ્પિ એકા ચરિસ્સામિ લોકે, સીતિભૂતા [સીતીભૂતા (સી.)] સબ્બમતિચ્ચ સઙ્ગન્તિ.

હત્થિપાલજાતકં તેરસમં.