૫૦૮. પઞ્ચપણ્ડિતજાતકં (૧૨)

૩૧૫. પઞ્ચ પણ્ડિતા સમાગતાત્થ, પઞ્હા મે પટિભાતિ તં સુણાથ;

નિન્દિયમત્થં પસંસિયં વા, કસ્સેવાવિકરેય્ય [કસ્સ વાવીકરેય્ય (ક.)] ગુય્હમત્થં.

૩૧૬. ત્વં આવિકરોહિ ભૂમિપાલ, ભત્તા ભારસહો તુવં વદે તં;

તવ છન્દરુચીનિ [છન્દઞ્ચ રુચિઞ્ચ (સી. પી.)] સમ્મસિત્વા, અથ વક્ખન્તિ જનિન્દ પઞ્ચ ધીરા.

૩૧૭. યા સીલવતી અનઞ્ઞથેય્યા [અનઞ્ઞધેય્યા (સી. પી.)], ભત્તુચ્છન્દવસાનુગા (પિયા) [( ) નત્થિ સી. પી. પોત્થકેસુ] મનાપા;

નિન્દિયમત્થં પસંસિયં વા, ભરિયાયાવિકરેય્ય [ભરિયાય વાવીકરેય્ય (ક.)] ગુય્હમત્થં.

૩૧૮. યો કિચ્છગતસ્સ આતુરસ્સ, સરણં હોતિ ગતી પરાયનઞ્ચ;

નિન્દિયમત્થં પસંસિયં વા, સખિનો વાવિકરેય્ય ગુય્હમત્થં.

૩૧૯. જેટ્ઠો [યો જેટ્ઠો (સ્યા.)] અથ મજ્ઝિમો કનિટ્ઠો, યો [સો (સી. સ્યા. પી.)] ચે સીલસમાહિતો ઠિતત્તો;

નિન્દિયમત્થં પસંસિયં વા, ભાતુ વાવીકરેય્ય ગુય્હમત્થં.

૩૨૦. યો વે પિતુહદયસ્સ પદ્ધગૂ [પત્થગૂ (સ્યા.), પત્તગૂ (ક.)], અનુજાતો પિતરં અનોમપઞ્ઞો;

નિન્દિયમત્થં પસંસિયં વા, પુત્તસ્સાવિકરેય્ય [પુત્તસ્સ વાવીકરેય્ય (ક.)] ગુય્હમત્થં.

૩૨૧. માતા દ્વિપદાજનિન્દસેટ્ઠ, યા નં [યો તં (સી. પી.)] પોસેતિ છન્દસા પિયેન;

નિન્દિયમત્થં પસંસિયં વા, માતુયાવીકરેય્ય [માતુયા વાવીકરેય્ય (ક.)] ગુય્હમત્થં.

૩૨૨. ગુય્હસ્સ હિ ગુય્હમેવ સાધુ, ન હિ ગુય્હસ્સ પસત્થમાવિકમ્મં;

અનિપ્ફન્નતા [અનિપ્ફાદાય (સી. પી.), અનિપ્ફન્નતાય (સ્યા.), આ નિપ્ફાદા (?)] સહેય્ય ધીરો, નિપ્ફન્નોવ [નિપ્ફન્નત્થો (સી. પી.), નિપ્ફન્નત્થોવ (સ્યા.)] યથાસુખં ભણેય્ય.

૩૨૩. કિં ત્વં વિમનોસિ રાજસેટ્ઠ, દ્વિપદજનિન્દ [દિપદિન્દ (સી. સ્યા. પી.)] વચનં સુણોમ મેતં [નેતં (સી. પી.), તેતં (સ્યા.)];

કિં ચિન્તયમાનો દુમ્મનોસિ, નૂન દેવ અપરાધો અત્થિ મય્હં.

૩૨૪. ‘‘પણ્હે [પઞ્ઞો (સી. પી.), પઞ્હે (સ્યા.), પન્હે (ક.)] વજ્ઝો મહોસધો’’તિ, આણત્તો મે વધાય ભૂરિપઞ્ઞો;

તં ચિન્તયમાનો દુમ્મનોસ્મિ, ન હિ દેવી અપરાધો અત્થિ તુય્હં.

૩૨૫. અભિદોસગતો દાનિ એહિસિ, કિં સુત્વા કિં સઙ્કતે મનો તે;

કો તે કિમવોચ ભૂરિપઞ્ઞ, ઇઙ્ઘ વચનં સુણોમ બ્રૂહિ મેતં.

૩૨૬. ‘‘પણ્હે વજ્ઝો મહોસધો’’તિ, યદિ તે મન્તયિતં જનિન્દ દોસં;

ભરિયાય રહોગતો અસંસિ, ગુય્હં પાતુકતં સુતં મમેતં.

૩૨૭. યં સાલવનસ્મિં સેનકો, પાપકમ્મં અકાસિ અસબ્ભિરૂપં;

સખિનોવ રહોગતો અસંસિ, ગુય્હં પાતુકતં સુતં મમેતં.

૩૨૮. પુક્કુસ [પક્કુસ (ક.) જા. ૧.૭.૪૧ પણ્ણજાતકે પસ્સિતબ્બં] પુરિસસ્સ તે જનિન્દ, ઉપ્પન્નો રોગો અરાજયુત્તો;

ભાતુઞ્ચ [ભાતુચ્ચ (સી. પી.), ભાતુવ (સ્યા.)] રહોગતો અસંસિ, ગુય્હં પાતુકતં સુતં મમેતં.

૩૨૯. આબાધોયં અસબ્ભિરૂપો, કામિન્દો [કાવિન્દો (સી. પી.)] નરદેવેન ફુટ્ઠો;

પુત્તસ્સ રહોગતો અસંસિ, ગુય્હં પાતુકતં સુતં મમેતં.

૩૩૦. અટ્ઠવઙ્કં મણિરતનં ઉળારં, સક્કો તે અદદા પિતામહસ્સ;

દેવિન્દસ્સ ગતં તદજ્જ હત્થં [દેવિન્દસ્સ તદજ્જ હત્થગતં (ક.)], માતુઞ્ચ રહોગતો અસંસિ;

ગુય્હં પાતુકતં સુતં મમેતં.

૩૩૧. ગુય્હસ્સ હિ ગુય્હમેવ સાધુ, ન હિ ગુય્હસ્સ પસત્થમાવિકમ્મં;

અનિપ્ફન્નતા સહેય્ય ધીરો, નિપ્ફન્નોવ યથાસુખં ભણેય્ય.

૩૩૨. ન ગુય્હમત્થં વિવરેય્ય, રક્ખેય્ય નં યથા નિધિં;

ન હિ પાતુકતો સાધુ, ગુય્હો અત્થો પજાનતા.

૩૩૩. થિયા ગુય્હં ન સંસેય્ય, અમિત્તસ્સ ચ પણ્ડિતો;

યો ચામિસેન સંહીરો, હદયત્થેનો ચ યો નરો.

૩૩૪. ગુય્હમત્થં અસમ્બુદ્ધં, સમ્બોધયતિ યો નરો;

મન્તભેદભયા તસ્સ, દાસભૂતો તિતિક્ખતિ.

૩૩૫. યાવન્તો પુરિસસ્સત્થં, ગુય્હં જાનન્તિ મન્તિનં;

તાવન્તો તસ્સ ઉબ્બેગા, તસ્મા ગુય્હં ન વિસ્સજે.

૩૩૬. વિવિચ્ચ ભાસેય્ય દિવા રહસ્સં, રત્તિં ગિરં નાતિવેલં પમુઞ્ચે;

ઉપસ્સુતિકા હિ સુણન્તિ મન્તં, તસ્મા મન્તો ખિપ્પમુપેતિ ભેદન્તિ.

પઞ્ચપણ્ડિતજાતકં દ્વાદસમં.