૫૦૭. મહાપલોભનજાતકં (૧૧)

૨૮૪. બ્રહ્મલોકા ચવિત્વાન, દેવપુત્તો મહિદ્ધિકો;

રઞ્ઞો પુત્તો ઉદપાદિ, સબ્બકામસમિદ્ધિસુ.

૨૮૫. કામા વા કામસઞ્ઞા વા, બ્રહ્મલોકે ન વિજ્જતિ;

સ્વાસ્સુ [ય્વાસ્સ (સી.)] તાયેવ સઞ્ઞાય, કામેહિ વિજિગુચ્છથ.

૨૮૬. તસ્સ ચન્તેપુરે આસિ, ઝાનાગારં સુમાપિતં;

સો તત્થ પટિસલ્લીનો [પટિસલ્લાનો (ક.)], એકો રહસિ ઝાયથ.

૨૮૭. સ રાજા પરિદેવેસિ, પુત્તસોકેન અટ્ટિતો;

એકપુત્તો ચયં મય્હં, ન ચ કામાનિ ભુઞ્જતિ.

૨૮૮. કો નુ ખ્વેત્થ [ખેત્થ (સી. પી.)] ઉપાયો સો, કો વા જાનાતિ કિઞ્ચનં;

યો [કો (સી. પી.)] મે પુત્તં પલોભેય્ય, યથા કામાનિ પત્થયે.

૨૮૯. અહુ કુમારી તત્થેવ, વણ્ણરૂપસમાહિતા;

કુસલા નચ્ચગીતસ્સ, વાદિતે ચ પદક્ખિણા.

૨૯૦. સા તત્થ ઉપસઙ્કમ્મ, રાજાનં એતદબ્રવિ;

અહં ખો નં પલોભેય્યં, સચે ભત્તા ભવિસ્સતિ.

૨૯૧. તં તથાવાદિનિં રાજા, કુમારિં એતદબ્રવિ;

ત્વઞ્ઞેવ નં પલોભેહિ, તવ ભત્તા ભવિસ્સતિ.

૨૯૨. સા ચ અન્તેપુરં ગન્ત્વા, બહું કામુપસંહિતં;

હદયઙ્ગમા પેમનીયા, ચિત્રા ગાથા અભાસથ.

૨૯૩. તસ્સા ચ ગાયમાનાય, સદ્દં સુત્વાન નારિયા;

કામચ્છન્દસ્સ ઉપ્પજ્જિ, જનં સો પરિપુચ્છથ.

૨૯૪. કસ્સેસો સદ્દો કો વા સો, ભણતિ ઉચ્ચાવચં બહું;

હદયઙ્ગમં પેમનીયં, અહો [અથો (સી. પી.)] કણ્ણસુખં મમ.

૨૯૫. એસા ખો પમદા દેવ, ખિડ્ડા એસા અનપ્પિકા [અનપ્પકા (ક.)];

સચે ત્વં કામે ભુઞ્જેય્ય, ભિય્યો ભિય્યો છાદેય્યુ તં.

૨૯૬. ઇઙ્ઘ આગચ્છતોરેન [આગચ્છતોરેનં (ક.) આગચ્છતુ + ઓરેન], અવિદૂરમ્હિ ગાયતુ;

અસ્સમસ્સ સમીપમ્હિ, સન્તિકે મય્હં ગાયતુ.

૨૯૭. તિરોકુટ્ટમ્હિ ગાયિત્વા, ઝાનાગારમ્હિ પાવિસિ;

બન્ધિ નં [ભન્ધિતું (સ્યા. ક.)] અનુપુબ્બેન, આરઞ્ઞમિવ કુઞ્જરં.

૨૯૮. તસ્સ [તસ્સા (સ્યા.)] કામરસં ઞત્વા, ઇસ્સાધમ્મો અજાયથ;

‘‘અહમેવ કામે ભુઞ્જેય્યં, મા અઞ્ઞો પુરિસો અહુ’’.

૨૯૯. તતો અસિં ગહેત્વાન, પુરિસે હન્તું ઉપક્કમિ;

અહમેવેકો ભુઞ્જિસ્સં, મા અઞ્ઞો પુરિસો સિયા.

૩૦૦. તતો જાનપદા સબ્બે, વિક્કન્દિંસુ સમાગતા;

પુત્તો ત્યાયં મહારાજ, જનં હેઠેત્યદૂસકં.

૩૦૧. તઞ્ચ રાજા વિવાહેસિ [નિવાહેસિ (સ્યા.), વિહાહેસિ (પી.)], સમ્હા રટ્ઠા ચ [રટ્ઠાતો (સી. પી.), રટ્ઠતો (ક.)] ખત્તિયો;

યાવતા વિજિતં મય્હં, ન તે વત્થબ્બ [વત્તબ્બ (સી. પી.)] તાવદે.

૩૦૨. તતો સો ભરિયમાદાય, સમુદ્દં ઉપસઙ્કમિ;

પણ્ણસાલં કરિત્વાન, વનમુઞ્છાય પાવિસિ.

૩૦૩. અથેત્થ ઇસિ માગચ્છિ, સમુદ્દં ઉપરૂપરિ;

સો તસ્સ ગેહં પાવેક્ખિ, ભત્તકાલે ઉપટ્ઠિતે.

૩૦૪. તઞ્ચ ભરિયા પલોભેસિ, પસ્સ યાવ સુદારુણં;

ચુતો સો બ્રહ્મચરિયમ્હા, ઇદ્ધિયા પરિહાયથ.

૩૦૫. રાજપુત્તો ચ ઉઞ્છાતો, વનમૂલફલં બહું;

સાયં કાજેન [કાચેન (પી.)] આદાય, અસ્સમં ઉપસઙ્કમિ.

૩૦૬. ઇસી ચ ખત્તિયં દિસ્વા, સમુદ્દં ઉપસઙ્કમિ;

‘‘વેહાયસં ગમિસ્સ’’ન્તિ, સીદતે સો મહણ્ણવે.

૩૦૭. ખત્તિયો ચ ઇસિં દિસ્વા, સીદમાનં મહણ્ણવે;

તસ્સેવ અનુકમ્પાય, ઇમા ગાથા અભાસથ.

૩૦૮. અભિજ્જમાને વારિસ્મિં, સયં આગમ્મ ઇદ્ધિયા;

મિસ્સીભાવિત્થિયા ગન્ત્વા, સંસીદસિ મહણ્ણવે.

૩૦૯. આવટ્ટની મહામાયા, બ્રહ્મચરિયવિકોપના;

સીદન્તિ નં વિદિત્વાન, આરકા પરિવજ્જયે.

૩૧૦. અનલા મુદુસમ્ભાસા, દુપ્પૂરા તા નદીસમા;

સીદન્તિ નં વિદિત્વાન, આરકા પરિવજ્જયે.

૩૧૧. યં એતા ઉપસેવન્તિ, છન્દસા વા ધનેન વા;

જાતવેદોવ સં ઠાનં, ખિપ્પં અનુદહન્તિ નં.

૩૧૨. ખત્તિયસ્સ વચો સુત્વા, ઇસિસ્સ નિબ્બિદા અહુ;

લદ્ધા પોરાણકં મગ્ગં, ગચ્છતે સો વિહાયસં.

૩૧૩. ખત્તિયો ચ ઇસિં દિસ્વા, ગચ્છમાનં વિહાયસં;

સંવેગં અલભી ધીરો, પબ્બજ્જં સમરોચયિ.

૩૧૪. તતો સો પબ્બજિત્વાન, કામરાગં વિરાજયિ;

કામરાગં વિરાજેત્વા, બ્રહ્મલોકૂપગો અહૂતિ.

મહાપલોભનજાતકં એકાદસમં.