૫૦૬. ચમ્પેય્યજાતકં (૧૦)

૨૪૦. કા નુ વિજ્જુરિવાભાસિ, ઓસધી વિય તારકા;

દેવતા નુસિ ગન્ધબ્બી, ન તં મઞ્ઞામિ માનુસિં [માનુસી (સ્યા. ક.)].

૨૪૧. નમ્હિ દેવી ન ગન્ધબ્બી, ન મહારાજ માનુસી;

નાગકઞ્ઞાસ્મિ ભદ્દન્તે, અત્થેનમ્હિ ઇધાગતા.

૨૪૨. વિબ્ભન્તચિત્તા કુપિતિન્દ્રિયાસિ, નેત્તેહિ તે વારિગણા સવન્તિ;

કિં તે નટ્ઠં કિં પન પત્થયાના, ઇધાગતા નારિ તદિઙ્ઘ બ્રૂહિ.

૨૪૩. યમુગ્ગતેજો ઉરગોતિ ચાહુ, નાગોતિ નં આહુ જના જનિન્દ;

તમગ્ગહી પુરિસો જીવિકત્થો, તં બન્ધના મુઞ્ચ પતી મમેસો.

૨૪૪. કથં ન્વયં બલવિરિયૂપપન્નો, હત્થત્ત [હત્થત્થ (સી. સ્યા. પી.)] માગચ્છિ વનિબ્બકસ્સ;

અક્ખાહિ મે નાગકઞ્ઞે તમત્થં, કથં વિજાનેમુ ગહીતનાગં.

૨૪૫. નગરમ્પિ નાગો ભસ્મં કરેય્ય, તથા હિ સો બલવિરિયૂપપન્નો;

ધમ્મઞ્ચ નાગો અપચાયમાનો, તસ્મા પરક્કમ્મ તપો કરોતિ.

૨૪૬. ચાતુદ્દસિં પઞ્ચદસિં [પન્નરસિં (સી. સ્યા. પી.)] ચ રાજ, ચતુપ્પથે સમ્મતિ નાગરાજા;

તમગ્ગહી પુરિસો જીવિકત્થો, તં બન્ધના મુઞ્ચ પતી મમેસો.

૨૪૭. સોળસિત્થિસહસ્સાનિ, આમુત્તમણિકુણ્ડલા;

વારિગેહસયા નારી [નારિયો (પી.)], તાપિ તં સરણં ગતા.

૨૪૮. ધમ્મેન મોચેહિ અસાહસેન, ગામેન નિક્ખેન ગવં સતેન;

ઓસ્સટ્ઠકાયો ઉરગો ચરાતુ, પુઞ્ઞત્થિકો મુઞ્ચતુ બન્ધનસ્મા.

૨૪૯. ધમ્મેન મોચેમિ અસાહસેન, ગામેન નિક્ખેન ગવં સતેન;

ઓસ્સટ્ઠકાયો ઉરગો ચરાતુ, પુઞ્ઞત્થિકો મુઞ્ચતુ બન્ધનસ્મા.

૨૫૦. દમ્મિ નિક્ખસતં લુદ્દ, થૂલઞ્ચ મણિકુણ્ડલં;

ચતુસ્સદઞ્ચ પલ્લઙ્કં, ઉમાપુપ્ફસરિન્નિભં.

૨૫૧. દ્વે ચ સાદિસિયો ભરિયા, ઉસભઞ્ચ ગવં સતં;

ઓસ્સટ્ઠકાયો ઉરગો ચરાતુ, પુઞ્ઞત્થિકો મુઞ્ચતુ બન્ધનસ્મા.

૨૫૨. વિનાપિ દાના તવ વચનં જનિન્દ, મુઞ્ચેમુ નં ઉરગં બન્ધનસ્મા;

ઓસ્સટ્ઠકાયો ઉરગો ચરાતુ, પુઞ્ઞત્થિકો મુઞ્ચતુ બન્ધનસ્મા.

૨૫૩. મુત્તો ચમ્પેય્યકો નાગો, રાજાનં એતદબ્રવિ;

નમો તે કાસિરાજત્થુ, નમો તે કાસિવડ્ઢન;

અઞ્જલિં તે પગ્ગણ્હામિ, પસ્સેય્યં મે નિવેસનં.

૨૫૪. અદ્ધા હિ દુબ્બિસ્સસમેતમાહુ, યં માનુસો વિસ્સસે અમાનુસમ્હિ;

સચે ચ મં યાચસિ એતમત્થં, દક્ખેમુ તે નાગ નિવેસનાનિ.

૨૫૫. સચેપિ [સચે હિ (સી. પી. અટ્ઠ.)] વાતો ગિરિમાવહેય્ય, ચન્દો ચ સુરિયો ચ છમા પતેય્યું;

સબ્બા ચ નજ્જો પટિસોતં વજેય્યું, ન ત્વેવહં રાજ મુસા ભણેય્યં.

૨૫૬. નભં ફલેય્ય ઉદધીપિ સુસ્સે, સંવટ્ટયે [સંવટ્ટેયં (સી. પી.), સંવટ્ટેય્ય (સ્યા. ક.)] ભૂતધરા વસુન્ધરા;

સિલુચ્ચયો મેરુ સમૂલમુપ્પતે [મુબ્બહે (સી. સ્યા. પી. ક. અટ્ઠ.), મુટ્ઠહે (ક.)], ન ત્વેવહં રાજ મુસા ભણેય્યં.

૨૫૭. અદ્ધા હિ દુબ્બિસ્સસમેતમાહુ, યં માનુસો વિસ્સસે અમાનુસમ્હિ;

સચે ચ મં યાચસિ એતમત્થં, દક્ખેમુ તે નાગ નિવેસનાનિ.

૨૫૮. તુમ્હે ખોત્થ ઘોરવિસા ઉળારા, મહાતેજા ખિપ્પકોપી ચ હોથ;

મંકારણા [મમ કારણા (સી. સ્યા. પી.)] બન્ધનસ્મા પમુત્તો, અરહસિ નો જાનિતુયે [જાનિતાયે (સી.), જાનિતવે (સ્યા.), જાનિતયે (પી.)] કતાનિ.

૨૫૯. સો પચ્ચતં નિરયે ઘોરરૂપે, મા કાયિકં સાતમલત્થ કિઞ્ચિ;

પેળાય બદ્ધો મરણં ઉપેતુ, યો તાદિસં કમ્મકતં ન જાને.

૨૬૦. સચ્ચપ્પટિઞ્ઞા તવમેસ હોતુ, અક્કોધનો હોહિ અનુપનાહી;

સબ્બઞ્ચ તે નાગકુલં સુપણ્ણા, અગ્ગિંવ ગિમ્હેસુ [ગિમ્હાસુ (સી. સ્યા. પી.)] વિવજ્જયન્તુ.

૨૬૧. અનુકમ્પસી નાગકુલં જનિન્દ, માતા યથા સુપ્પિયં એકપુત્તં;

અહઞ્ચ તે નાગકુલેન સદ્ધિં, કાહામિ વેય્યાવટિકં ઉળારં.

૨૬૨. યોજેન્તુ વે રાજરથે સુચિત્તે, કમ્બોજકે અસ્સતરે સુદન્તે;

નાગે ચ યોજેન્તુ સુવણ્ણકપ્પને, દક્ખેમુ નાગસ્સ નિવેસનાનિ.

૨૬૩. ભેરી મુદિઙ્ગા [મુતિઙ્ગા (સી. પી.)] પણવા ચ સઙ્ખા, અવજ્જયિંસુ ઉગ્ગસેનસ્સ રઞ્ઞો;

પાયાસિ રાજા બહુસોભમાનો, પુરક્ખતો નારિગણસ્સ મજ્ઝે.

૨૬૪. સુવણ્ણચિતકં ભૂમિં, અદ્દક્ખિ કાસિવડ્ઢનો;

સોવણ્ણમયપાસાદે, વેળુરિયફલકત્થતે.

૨૬૫. સ રાજા પાવિસિ બ્યમ્હં, ચમ્પેય્યસ્સ નિવેસનં;

આદિચ્ચવણ્ણસન્નિભં, કંસવિજ્જુ પભસ્સરં.

૨૬૬. નાનારુક્ખેહિ સઞ્છન્નં, નાનાગન્ધસમીરિતં;

સો પાવેક્ખિ કાસિરાજા, ચમ્પેય્યસ્સ નિવેસનં.

૨૬૭. પવિટ્ઠસ્મિં કાસિરઞ્ઞે, ચમ્પેય્યસ્સ નિવેસનં;

દિબ્બા તૂરિયા પવજ્જિંસુ, નાગકઞ્ઞા ચ નચ્ચિસું [નચ્ચયું (સી. પી. ક.)].

૨૬૮. તં નાગકઞ્ઞા ચરિતં ગણેન, અન્વારુહી કાસિરાજા પસન્નો;

નિસીદિ સોવણ્ણમયમ્હિ પીઠે, સાપસ્સયે [સોપસ્સયે (ક.)] ચન્દનસારલિત્તે.

૨૬૯. સો તત્થ ભુત્વા ચ અથો રમિત્વા, ચમ્પેય્યકં કાસિરાજા અવોચ;

વિમાનસેટ્ઠાનિ ઇમાનિ તુય્હં, આદિચ્ચવણ્ણાનિ પભસ્સરાનિ;

નેતાદિસં અત્થિ મનુસ્સલોકે, કિં પત્થયં [કિમત્થિયં (સી. સ્યા. પી.)] નાગ તપો કરોસિ.

૨૭૦. તા કમ્બુકાયૂરધરા સુવત્થા, વટ્ટઙ્ગુલી તમ્બતલૂપપન્ના;

પગ્ગય્હ પાયેન્તિ અનોમવણ્ણા, નેતાદિસં અત્થિ મનુસ્સલોકે;

કિં પત્થયં નાગ તપો કરોસિ.

૨૭૧. નજ્જો ચ તેમા પુથુલોમમચ્છા, આટા [આદા (સ્યા.), અદા (પી.)] સકુન્તાભિરુદા સુતિત્થા;

નેતાદિસં અત્થિ મનુસ્સલોકે, કિં પત્થયં નાગ તપો કરોસિ.

૨૭૨. કોઞ્ચા મયૂરા દિવિયા ચ હંસા, વગ્ગુસ્સરા કોકિલા સમ્પતન્તિ;

નેતાદિસં અત્થિ મનુસ્સલોકે, કિં પત્થયં નાગ તપો કરોસિ.

૨૭૩. અમ્બા ચ સાલા તિલકા ચ જમ્બુયો, ઉદ્દાલકા પાટલિયો ચ ફુલ્લા;

નેતાદિસં અત્થિ મનુસ્સલોકે, કિં પત્થયં નાગ તપો કરોસિ.

૨૭૪. ઇમા ચ તે પોક્ખરઞ્ઞો સમન્તતો, દિબ્બા [દિબ્યા (સ્યા.), દિવિયા (પી.)] ચ ગન્ધા સતતં પવાયન્તિ;

નેતાદિસં અત્થિ મનુસ્સલોકે, કિં પત્થયં નાગ તપો કરોસિ.

૨૭૫. ન પુત્તહેતુ ન ધનસ્સ હેતુ, ન આયુનો ચાપિ [વાપિ (સી. પી.)] જનિન્દ હેતુ;

મનુસ્સયોનિં અભિપત્થયાનો, તસ્મા પરક્કમ્મ તપો કરોમિ.

૨૭૬. ત્વં લોહિતક્ખો વિહતન્તરંસો, અલઙ્કતો કપ્પિતકેસમસ્સુ;

સુરોસિતો લોહિતચન્દનેન, ગન્ધબ્બરાજાવ દિસા પભાસસિ.

૨૭૭. દેવિદ્ધિપત્તોસિ મહાનુભાવો, સબ્બેહિ કામેહિ સમઙ્ગિભૂતો;

પુચ્છામિ તં નાગરાજેતમત્થં, સેય્યો ઇતો કેન મનુસ્સલોકો.

૨૭૮. જનિન્દ નાઞ્ઞત્ર મનુસ્સલોકા, સુદ્ધી વ સંવિજ્જતિ સંયમો વા;

અહઞ્ચ લદ્ધાન મનુસ્સયોનિં, કાહામિ જાતિમરણસ્સ અન્તં.

૨૭૯. અદ્ધા હવે સેવિતબ્બા સપઞ્ઞા, બહુસ્સુતા યે બહુઠાનચિન્તિનો;

નારિયો ચ દિસ્વાન તુવઞ્ચ નાગ, કાહામિ પુઞ્ઞાનિ અનપ્પકાનિ.

૨૮૦. અદ્ધા હવે સેવિતબ્બા સપઞ્ઞા, બહુસ્સુતા યે બહુઠાનચિન્તિનો;

નારિયો ચ દિસ્વાન મમઞ્ચ રાજ, કરોહિ પુઞ્ઞાનિ અનપ્પકાનિ.

૨૮૧. ઇદઞ્ચ મે જાતરૂપં પહૂતં, રાસી સુવણ્ણસ્સ ચ તાલમત્તા;

[ઇતો હરિત્વા સોવણ્ણઘરાનિ કારય, રૂપિયસ્સ ચ પાકારં કરોન્તુ (સી. સ્યા.) ઇતો હરિત્વા સોવણ્ણઘરાનિ, [કારય] રૂપિયસ્સ ચ પાકારં કરોન્તુ (પી.)] ઇતો હરિત્વાન સુવણ્ણઘરાનિ, કરસ્સુ રૂપિયપાકારં કરોન્તુ [ઇતો હરિત્વા સોવણ્ણઘરાનિ કારય, રૂપિયસ્સ ચ પાકારં કરોન્તુ (સી. સ્યા.) ઇતો હરિત્વા સોવણ્ણઘરાનિ, [કારય] રૂપિયસ્સ ચ પાકારં કરોન્તુ (પી.)].

૨૮૨. મુત્તા ચ [મુત્તાનઞ્ચ (સી. સ્યા.)] વાહસહસ્સાનિ પઞ્ચ, વેળુરિયમિસ્સાનિ ઇતો હરિત્વા;

અન્તેપુરે ભૂમિયં સન્થરન્તુ, નિક્કદ્દમા હેહિતિ નીરજા ચ.

૨૮૩. એતાદિસં આવસ રાજસેટ્ઠ, વિમાનસેટ્ઠં બહુ સોભમાનં;

બારાણસિં નગરં ઇદ્ધં ફીતં, રજ્જઞ્ચ કારેહિ અનોમપઞ્ઞાતિ.

ચમ્પેય્યજાતકં દસમં.