૫૦૫. સોમનસ્સજાતકં (૯)

૨૧૧. કો તં હિંસતિ હેઠેતિ, કિં [કિન્નુ (પી. ક.)] દુમ્મનો સોચસિ અપ્પતીતો;

કસ્સજ્જ માતાપિતરો રુદન્તુ, ક્વજ્જ સેતુ [કો ન્વેજ્જ સેતિ (ક.), કો અજ્જ સેતુ (?)] નિહતો પથબ્યા.

૨૧૨. તુટ્ઠોસ્મિ દેવ તવ દસ્સનેન, ચિરસ્સં પસ્સામિ તં ભૂમિપાલ;

અહિંસકો રેણુમનુપ્પવિસ્સ, પુત્તેન તે હેઠયિતોસ્મિ [પોથયિતોસ્મિ (ક.)] દેવ.

૨૧૩. આયન્તુ દોવારિકા ખગ્ગબન્ધા [ખગ્ગબદ્ધા (સી. પી.)], કાસાવિયા યન્તુ [હન્તુ (ક.)] અન્તેપુરન્તં;

હન્ત્વાન તં સોમનસ્સં કુમારં, છેત્વાન સીસં વરમાહરન્તુ.

૨૧૪. પેસિતા રાજિનો દૂતા, કુમારં એતદબ્રવું;

ઇસ્સરેન વિતિણ્ણોસિ, વધં પત્તોસિ ખત્તિય.

૨૧૫. સ રાજપુત્તો પરિદેવયન્તો, દસઙ્ગુલિં અઞ્જલિં પગ્ગહેત્વા;

અહમ્પિ ઇચ્છામિ જનિન્દ દટ્ઠું, જીવં મં નેત્વા [જીવં પનેત્વા (સી. પી.)] પટિદસ્સયેથ.

૨૧૬. તસ્સ તં વચનં સુત્વા, રઞ્ઞો પુત્તં અદસ્સયું;

પુત્તો ચ પિતરં દિસ્વા, દૂરતોવજ્ઝભાસથ.

૨૧૭. આગચ્છું [આગઞ્છું (સી.), આગઞ્છુ (પી.)] દોવારિકા ખગ્ગબન્ધા, કાસાવિયા હન્તુ મમં જનિન્દ;

અક્ખાહિ મે પુચ્છિતો એતમત્થં, અપરાધો કો નિધ મમજ્જ અત્થિ.

૨૧૮. સાયઞ્ચ પાતો ઉદકં સજાતિ, અગ્ગિં સદા પારિચરતપ્પમત્તો;

તં તાદિસં સંયતં બ્રહ્મચારિં, કસ્મા તુવં બ્રૂસિ ગહપ્પતીતિ.

૨૧૯. તાલા ચ મૂલા ચ ફલા ચ દેવ, પરિગ્ગહા વિવિધા સન્તિમસ્સ;

તે રક્ખતિ ગોપયતપ્પમત્તો, [બ્રાહ્મણો ગહપતિ તેન હોતિ (સી. સ્યા. પી.)] તસ્મા અહં બ્રૂમિ ગહપ્પતીતિ [બ્રાહ્મણો ગહપતિ તેન હોતિ (સી. સ્યા. પી.)].

૨૨૦. સચ્ચં ખો એતં વદસિ કુમાર, પરિગ્ગહા વિવિધા સન્તિમસ્સ;

તે રક્ખતિ ગોપયતપ્પમત્તો, સ [નત્થિ ઇદં સી. સ્યા. પી. પોત્થકેસુ] બ્રાહ્મણો ગહપતિ તેન હોતિ.

૨૨૧. સુણન્તુ મય્હં પરિસા સમાગતા, સનેગમા જાનપદા ચ સબ્બે;

બાલાયં બાલસ્સ વચો નિસમ્મ, અહેતુના ઘાતયતે મં [ઘાતયતે (સી. પી.)] જનિન્દો.

૨૨૨. દળ્હસ્મિ મૂલે વિસટે વિરૂળ્હે, દુન્નિક્કયો વેળુ પસાખજાતો;

વન્દામિ પાદાનિ તવ [તવં (સી. પી.)] જનિન્દ, અનુજાન મં પબ્બજિસ્સામિ દેવ.

૨૨૩. ભુઞ્જસ્સુ ભોગે વિપુલે કુમાર, સબ્બઞ્ચ તે ઇસ્સરિયં દદામિ;

અજ્જેવ ત્વં કુરૂનં હોહિ રાજા, મા પબ્બજી પબ્બજ્જા હિ દુક્ખા.

૨૨૪. કિન્નૂધ દેવ તવમત્થિ ભોગા, પુબ્બેવહં [પુબ્બે ચહં (ક.)] દેવલોકે રમિસ્સં;

રૂપેહિ સદ્દેહિ અથો રસેહિ, ગન્ધેહિ ફસ્સેહિ મનોરમેહિ.

૨૨૫. ભુત્તા ચ મે [ભુત્તા (સી. પી.)] ભોગા તિદિવસ્મિં દેવ, પરિવારિતા [પરિચારિતા (ક.)] અચ્છરાનં ગણેન [અચ્છરાસંગણેન (સ્યા. પી. ક.)];

તુવઞ્ચ [તવઞ્ચ (સી. પી.)] બાલં પરનેય્યં વિદિત્વા, ન તાદિસે રાજકુલે વસેય્યં.

૨૨૬. સચાહં બાલો પરનેય્યો અસ્મિ, એકાપરાધં [એતાપરાધં (ક.)] ખમ પુત્ત મય્હં;

પુનપિ ચે એદિસકં ભવેય્ય, યથામતિં સોમનસ્સ કરોહિ.

૨૨૭. અનિસમ્મ કતં કમ્મં, અનવત્થાય ચિન્તિતં;

ભેસજ્જસ્સેવ વેભઙ્ગો, વિપાકો હોતિ પાપકો.

૨૨૮. નિસમ્મ ચ કતં કમ્મં, સમ્માવત્થાય ચિન્તિતં;

ભેસજ્જસ્સેવ સમ્પત્તિ, વિપાકો હોતિ ભદ્રકો.

૨૨૯. અલસો ગિહી કામભોગી ન સાધુ, અસઞ્ઞતો પબ્બજિતો ન સાધુ;

રાજા ન સાધુ અનિસમ્મકારી, યો પણ્ડિતો કોધનો તં ન સાધુ.

૨૩૦. નિસમ્મ ખત્તિયો કયિરા, નાનિસમ્મ દિસમ્પતિ;

નિસમ્મકારિનો રાજ, યસો કિત્તિ ચ વડ્ઢતિ.

૨૩૧. નિસમ્મ દણ્ડં પણયેય્ય ઇસ્સરો, વેગા કતં તપ્પતિ ભૂમિપાલ;

સમ્માપણીધી ચ નરસ્સ અત્થા, અનાનુતપ્પા તે ભવન્તિ પચ્છા.

૨૩૨. અનાનુતપ્પાનિ હિ યે કરોન્તિ, વિભજ્જ કમ્માયતનાનિ લોકે;

વિઞ્ઞુપ્પસત્થાનિ સુખુદ્રયાનિ, ભવન્તિ બુદ્ધાનુમતાનિ [વદ્ધાનુમતાનિ (સી. પી.)] તાનિ.

૨૩૩. આગચ્છું દોવારિકા ખગ્ગબન્ધા, કાસાવિયા હન્તુ મમં જનિન્દ;

માતુઞ્ચ [માતુચ્ચ (પી.)] અઙ્કસ્મિમહં નિસિન્નો, આકડ્ઢિતો સહસા તેહિ દેવ.

૨૩૪. કટુકઞ્હિ સમ્બાધં સુકિચ્છં [સુકિચ્છ (સી. પી.)] પત્તો, મધુરમ્પિ યં જીવિતં લદ્ધ રાજ;

કિચ્છેનહં અજ્જ વધા પમુત્તો, પબ્બજ્જમેવાભિમનોહમસ્મિ.

૨૩૫. પુત્તો તવાયં તરુણો સુધમ્મે, અનુકમ્પકો સોમનસ્સો કુમારો;

તં યાચમાનો ન લભામિ સ્વજ્જ [સજ્જ (સી. પી.)], અરહસિ નં યાચિતવે [યાચિતુયે (ક.)] તુવમ્પિ.

૨૩૬. રમસ્સુ ભિક્ખાચરિયાય પુત્ત, નિસમ્મ ધમ્મેસુ પરિબ્બજસ્સુ;

સબ્બેસુ ભૂતેસુ નિધાય દણ્ડં, અનિન્દિતો બ્રહ્મમુપેહિ ઠાનં.

૨૩૭. અચ્છેર [અચ્છરિય (સી. સ્યા. પી.)] રૂપં વત યાદિસઞ્ચ, દુક્ખિતં મં દુક્ખાપયસે સુધમ્મે;

યાચસ્સુ પુત્તં ઇતિ વુચ્ચમાના, ભિય્યોવ ઉસ્સાહયસે કુમારં.

૨૩૮. યે વિપ્પમુત્તા અનવજ્જભોગિનો [ભોજિનો (સી. સ્યા. પી.)], પરિનિબ્બુતા લોકમિમં ચરન્તિ;

તમરિયમગ્ગં પટિપજ્જમાનં, ન ઉસ્સહે વારયિતું કુમારં.

૨૩૯. અદ્ધા હવે સેવિતબ્બા સપઞ્ઞા, બહુસ્સુતા યે બહુઠાનચિન્તિનો;

યેસાયં સુત્વાન સુભાસિતાનિ, અપ્પોસ્સુક્કા વીતસોકા સુધમ્માતિ.

સોમનસ્સજાતકં નવમં.