૫૦૪. ભલ્લાતિયજાતકં (૮)

૧૮૬. ભલ્લાતિયો [ભલ્લાટિયો (સી. પી.)] નામ અહોસિ રાજા, રટ્ઠં પહાય મિગવં અચારિ સો;

અગમા ગિરિવરં ગન્ધમાદનં, સુપુપ્ફિતં [સમ્પુપ્ફિતં (સી. પી.)] કિમ્પુરિસાનુચિણ્ણં.

૧૮૭. સાળૂરસઙ્ઘઞ્ચ નિસેધયિત્વા, ધનું [ધનુ (સી. સ્યા. પી.)] કલાપઞ્ચ સો નિક્ખિપિત્વા;

ઉપાગમિ વચનં વત્તુકામો, યત્થટ્ઠિતા કિમ્પુરિસા અહેસું.

૧૮૮. હિમચ્ચયે હેમવતાય તીરે, કિમિધટ્ઠિતા મન્તયવ્હો અભિણ્હં;

પુચ્છામિ વો માનુસદેહવણ્ણે, કથં નુ [કથં વો (સી. સ્યા. પી.)] જાનન્તિ મનુસ્સલોકે.

૧૮૯. મલ્લં ગિરિં પણ્ડરકં તિકૂટં, સીતોદકા [સીતોદિયા (સી. પી.), સીતોદિકા (?)] અનુવિચરામ નજ્જો;

મિગા મનુસ્સાવ નિભાસવણ્ણા, જાનન્તિ નો કિમ્પુરિસાતિ લુદ્દ.

૧૯૦. સુકિચ્છરૂપં પરિદેવયવ્હો [પરિદેવથવ્હો (?) મોગ્ગલ્લાનબ્યાકરણે ૬.૩૮ સુત્તં], આલિઙ્ગિતો ચાસિ પિયો પિયાય;

પુચ્છામિ વો માનુસદેહવણ્ણે, કિમિધ વને રોદથ અપ્પતીતા.

૧૯૧. સુકિચ્છરૂપં પરિદેવયવ્હો, આલિઙ્ગિતો ચાસિ પિયો પિયાય;

પુચ્છામિ વો માનુસદેહવણ્ણે, કિમિધ વને વિલપથ અપ્પતીતા.

૧૯૨. સુકિચ્છરૂપં પરિદેવયવ્હો, આલિઙ્ગિતો ચાસિ પિયો પિયાય;

પુચ્છામિ વો માનુસદેહવણ્ણે, કિમિધ વને સોચથ અપ્પતીતા.

૧૯૩. મયેકરત્તં [રત્તિં (પી.)] વિપ્પવસિમ્હ લુદ્દ, અકામકા અઞ્ઞમઞ્ઞં સરન્તા;

તમેકરત્તં અનુતપ્પમાના, સોચામ ‘‘સા રત્તિ પુનં ન હેસ્સતિ’’.

૧૯૪. યમેકરત્તં અનુતપ્પથેતં, ધનં વ નટ્ઠં પિતરં વ પેતં;

પુચ્છામિ વો માનુસદેહવણ્ણે, કથં વિના વાસમકપ્પયિત્થ.

૧૯૫. યમિમં [યયિમં (ક. સી.)] નદિં પસ્સસિ સીઘસોતં, નાનાદુમચ્છાદનં સેલકૂલં [દુમચ્છદનં સેલકૂટં (સી. પી.), દુમસઞ્છન્નં સેલકૂલં (ક.)];

તં મે પિયો ઉત્તરિ વસ્સકાલે, મમઞ્ચ મઞ્ઞં અનુબન્ધતીતિ.

૧૯૬. અહઞ્ચ અઙ્કોલકમોચિનામિ, અતિમુત્તકં સત્તલિયોથિકઞ્ચ;

‘‘પિયો ચ મે હેહિતિ માલભારી, અહઞ્ચ નં માલિની અજ્ઝુપેસ્સં’’.

૧૯૭. અહઞ્ચિદં કુરવકમોચિનામિ, ઉદ્દાલકા પાટલિસિન્ધુવારકા [સિન્ધુવારિતા (સ્યા. પી. ક.)];

‘‘પિયો ચ મે હેહિતિ માલભારી, અહઞ્ચ નં માલિની અજ્ઝુપેસ્સં’’.

૧૯૮. અહઞ્ચ સાલસ્સ સુપુપ્ફિતસ્સ, ઓચેય્ય પુપ્ફાનિ કરોમિ માલં;

‘‘પિયો ચ મે હેહિતિ માલભારી, અહઞ્ચ નં માલિની અજ્ઝુપેસ્સં’’.

૧૯૯. અહઞ્ચ સાલસ્સ સુપુપ્ફિતસ્સ, ઓચેય્ય પુપ્ફાનિ કરોમિ ભારં;

ઇદઞ્ચ નો હેહિતિ સન્થરત્થં, યત્થજ્જિમં [યત્થજ્જમં (સી. પી.)] વિહરિસ્સામ [વિહરિસ્સામુ (પી.)] રત્તિં.

૨૦૦. અહઞ્ચ ખો અગળું [અગ્ગલુ (સ્યા. ક.), અકલું (પી.)] ચન્દનઞ્ચ, સિલાય પિંસામિ પમત્તરૂપા;

‘‘પિયો ચ મે હેહિતિ રોસિતઙ્ગો, અહઞ્ચ નં રોસિતા અજ્ઝુપેસ્સં’’.

૨૦૧. અથાગમા સલિલં સીઘસોતં, નુદં સાલે સલળે કણ્ણિકારે;

આપૂરથ [અપૂરથ (સી. પી.), આપૂરથે (સ્યા.)] તેન મુહુત્તકેન, સાયં નદી આસિ મયા સુદુત્તરા.

૨૦૨. ઉભોસુ તીરેસુ મયં તદા ઠિતા, સમ્પસ્સન્તા ઉભયો અઞ્ઞમઞ્ઞં;

સકિમ્પિ રોદામ સકિં હસામ, કિચ્છેન નો આગમા [અગમા (સી. સ્યા. પી.)] સંવરી સા.

૨૦૩. પાતોવ [પાતો ચ (સી. સ્યા. પી.)] ખો ઉગ્ગતે સૂરિયમ્હિ, ચતુક્કં નદિં ઉત્તરિયાન લુદ્દ;

આલિઙ્ગિયા અઞ્ઞમઞ્ઞં મયં ઉભો, સકિમ્પિ રોદામ સકિં હસામ.

૨૦૪. તીહૂનકં સત્તસતાનિ લુદ્દ, યમિધ મયં વિપ્પવસિમ્હ પુબ્બે;

વસ્સેકિમં [વાસેકિમં (સી. પી.)] જીવિતં ભૂમિપાલ, કો નીધ કન્તાય વિના વસેય્ય.

૨૦૫. આયુઞ્ચ વો કીવતકો નુ સમ્મ, સચેપિ જાનાથ વદેથ આયું;

અનુસ્સવા વુડ્ઢતો આગમા વા, અક્ખાથ મે તં અવિકમ્પમાના.

૨૦૬. આયુઞ્ચ નો વસ્સસહસ્સં લુદ્દ, ન ચન્તરા પાપકો અત્થિ રોગો;

અપ્પઞ્ચ [અપ્પંવ (સ્યા. ક.)] દુક્ખં સુખમેવ ભિય્યો, અવીતરાગા વિજહામ જીવિતં.

૨૦૭. ઇદઞ્ચ સુત્વાન અમાનુસાનં, ભલ્લાતિયો ઇત્તર જીવિતન્તિ;

નિવત્તથ ન મિગવં અચરિ, અદાસિ દાનાનિ અભુઞ્જિ ભોગે.

૨૦૮. ઇદઞ્ચ સુત્વાન અમાનુસાનં, સમ્મોદથ મા કલહં અકત્થ;

મા વો તપી અત્તકમ્માપરાધો, યથાપિ તે કિમ્પુરિસેકરત્તં.

૨૦૯. ઇદઞ્ચ સુત્વાન અમાનુસાનં, સમ્મોદથ મા વિવાદં અકત્થ;

મા વો તપી અત્તકમ્માપરાધો, યથાપિ તે કિમ્પુરિસેકરત્તં.

૨૧૦. વિવિધં [વિવિધ (સી. સ્યા.)] અધિમના સુણોમહં, વચનપથં તવ અત્થસંહિતં;

મુઞ્ચં [મુઞ્ચ (સી. પી.)] ગિરં નુદસેવ મે દરં, સમણ સુખાવહ જીવ મે ચિરન્તિ.

ભલ્લાતિયજાતકં અટ્ઠમં.