૫૦૩. સત્તિગુમ્બજાતકં (૭)

૧૫૯. મિગલુદ્દો મહારાજા, પઞ્ચાલાનં રથેસભો;

નિક્ખન્તો સહ સેનાય, ઓગણો વનમાગમા.

૧૬૦. તત્થદ્દસા અરઞ્ઞસ્મિં, તક્કરાનં કુટિં કતં;

તસ્સા [તસ્મા (સ્યા. પી. ક.)] કુટિયા નિક્ખમ્મ, સુવો લુદ્દાનિ ભાસતિ.

૧૬૧. સમ્પન્નવાહનો પોસો, યુવા સમ્મટ્ઠકુણ્ડલો [કુણ્ડલી (સ્યા. ક.)];

સોભતિ લોહિતુણ્હીસો, દિવા સૂરિયોવ ભાસતિ.

૧૬૨. મજ્ઝન્હિકે [મજ્ઝન્તિકે (સબ્બત્થ)] સમ્પતિકે, સુત્તો રાજા સસારથિ;

હન્દસ્સાભરણં સબ્બં, ગણ્હામ સાહસા [સહસા (સી. સ્યા. પી.)] મયં.

૧૬૩. નિસીથેપિ રહો દાનિ, સુત્તો રાજા સસારથિ;

આદાય વત્થં મણિકુણ્ડલઞ્ચ, હન્ત્વાન સાખાહિ અવત્થરામ.

૧૬૪. કિન્નુ ઉમ્મત્તરૂપોવ, સત્તિગુમ્બ પભાસસિ;

દુરાસદા હિ રાજાનો, અગ્ગિ પજ્જલિતો યથા.

૧૬૫. અથ ત્વં પતિકોલમ્બ, મત્તો થુલ્લાનિ ગજ્જસિ;

માતરિ મય્હં નગ્ગાય, કિન્નુ ત્વં વિજિગુચ્છસે.

૧૬૬. ઉટ્ઠેહિ સમ્મ તરમાનો, રથં યોજેહિ સારથિ;

સકુણો મે ન રુચ્ચતિ, અઞ્ઞં ગચ્છામ અસ્સમં.

૧૬૭. યુત્તો રથો મહારાજ, યુત્તો ચ બલવાહનો;

અધિતિટ્ઠ મહારાજ, અઞ્ઞં ગચ્છામ અસ્સમં.

૧૬૮. કો નુમેવ ગતા [ક્વ નુ’મે’પગતા (?)] સબ્બે, યે અસ્મિં પરિચારકા;

એસ ગચ્છતિ પઞ્ચાલો, મુત્તો તેસં અદસ્સના.

૧૬૯. કોદણ્ડકાનિ ગણ્હથ, સત્તિયો તોમરાનિ ચ;

એસ ગચ્છતિ પઞ્ચાલો, મા વો મુઞ્ચિત્થ જીવતં [જીવિતં (બહૂસુ)].

૧૭૦. અથાપરો પટિનન્દિત્થ, સુવો લોહિતતુણ્ડકો;

સ્વાગતં તે મહારાજ, અથો તે અદુરાગતં;

ઇસ્સરોસિ અનુપ્પત્તો, યં ઇધત્થિ પવેદય.

૧૭૧. તિન્દુકાનિ પિયાલાનિ, મધુકે કાસુમારિયો;

ફલાનિ ખુદ્દકપ્પાનિ, ભુઞ્જ રાજ વરં વરં.

૧૭૨. ઇદમ્પિ પાનીયં સીતં, આભતં ગિરિગબ્ભરા;

તતો પિવ મહારાજ, સચે ત્વં અભિકઙ્ખસિ.

૧૭૩. અરઞ્ઞં ઉઞ્છાય ગતા, યે અસ્મિં પરિચારકા;

સયં ઉટ્ઠાય ગણ્હવ્હો, હત્થા મે નત્થિ દાતવે.

૧૭૪. ભદ્દકો વતયં પક્ખી, દિજો પરમધમ્મિકો;

અથેસો ઇતરો પક્ખી, સુવો લુદ્દાનિ ભાસતિ.

૧૭૫. ‘‘એતં હનથ બન્ધથ, મા વો મુઞ્ચિત્થ જીવતં’’;

ઇચ્ચેવં વિલપન્તસ્સ, સોત્થિં [સોત્થી (સ્યા.)] પત્તોસ્મિ અસ્સમં.

૧૭૬. ભાતરોસ્મ મહારાજ, સોદરિયા એકમાતુકા;

એકરુક્ખસ્મિં સંવડ્ઢા, નાનાખેત્તગતા ઉભો.

૧૭૭. સત્તિગુમ્બો ચ ચોરાનં, અહઞ્ચ ઇસીનં ઇધ;

અસતં સો, સતં અહં, તેન ધમ્મેન નો વિના.

૧૭૮. તત્થ વધો ચ બન્ધો ચ, નિકતી વઞ્ચનાનિ ચ;

આલોપા સાહસાકારા, તાનિ સો તત્થ સિક્ખતિ.

૧૭૯. ઇધ સચ્ચઞ્ચ ધમ્મો ચ, અહિંસા સંયમો દમો;

આસનૂદકદાયીનં, અઙ્કે વદ્ધોસ્મિ ભારધ [ભારત (સી. સ્યા. પી.)].

૧૮૦. યં યઞ્હિ રાજ ભજતિ, સન્તં વા યદિ વા અસં;

સીલવન્તં વિસીલં વા, વસં તસ્સેવ ગચ્છતિ.

૧૮૧. યાદિસં કુરુતે મિત્તં, યાદિસં ચૂપસેવતિ;

સોપિ તાદિસકો હોતિ, સહવાસો હિ [સહવાસોપિ (સ્યા. ક.)] તાદિસો.

૧૮૨. સેવમાનો સેવમાનં, સમ્ફુટ્ઠો સમ્ફુસં પરં;

સરો દિદ્ધો કલાપંવ, અલિત્તમુપલિમ્પતિ;

ઉપલેપભયા [ઉપલિમ્પભયા (સ્યા. ક.)] ધીરો, નેવ પાપસખા સિયા.

૧૮૩. પૂતિમચ્છં કુસગ્ગેન, યો નરો ઉપનય્હતિ;

કુસાપિ પૂતિ [પૂતી (સી. પી.)] વાયન્તિ, એવં બાલૂપસેવના.

૧૮૪. તગરઞ્ચ પલાસેન, યો નરો ઉપનય્હતિ;

પત્તાપિ સુરભિ [સુરભી (સી. સ્યા. પી.)] વાયન્તિ, એવં ધીરૂપસેવના.

૧૮૫. તસ્મા પત્તપુટસ્સેવ [ફલપુટસ્સેવ (સી. પી.), પલપુટસ્સેવ (ક. અટ્ઠ.), પલાસપુટસ્સેવ (સ્યા. ક.)], ઞત્વા સમ્પાકમત્તનો;

અસન્તે નોપસેવેય્ય, સન્તે સેવેય્ય પણ્ડિતો;

અસન્તો નિરયં નેન્તિ, સન્તો પાપેન્તિ સુગ્ગતિન્તિ.

સત્તિગુમ્બજાતકં સત્તમં.