૫૦૨. ચૂળહંસજાતકં (૬)

૧૩૩. એતે હંસા પક્કમન્તિ, વક્કઙ્ગા ભયમેરિતા;

હરિત્તચ હેમવણ્ણ, કામં સુમુખ પક્કમ.

૧૩૪. ઓહાય મં ઞાતિગણા, એકં પાસવસં ગતં;

અનપેક્ખમાના [નાપેક્ખમાના (ક.)] ગચ્છન્તિ, કિં એસો અવહિય્યસિ.

૧૩૫. પતેવ પતતં સેટ્ઠ, નત્થિ બદ્ધે સહાયતા [સહાયકા (સ્યા.)];

મા અનીઘાય હાપેસિ, કામં સુમુખ પક્કમ.

૧૩૬. નાહં ‘‘દુક્ખપરેતો’’તિ [દુક્ખપરેતોપિ (ક.)], ધતરટ્ઠ તુવં [તવં (સી. પી.)] જહે;

જીવિતં મરણં વા મે, તયા સદ્ધિં ભવિસ્સતિ.

૧૩૭. એતદરિયસ્સ કલ્યાણં, યં ત્વં સુમુખ ભાસસિ;

તઞ્ચ વીમંસમાનોહં, ‘‘પતતેતં’’ અવસ્સજિં.

૧૩૮. અપદેન પદં યાતિ, અન્તલિક્ખચરો [અન્તલિક્ખે ચરો (સી. પી.)] દિજો;

આરા પાસં ન બુજ્ઝિ ત્વં, હંસાનં પવરુત્તમ [પવરુત્તમો (ક. સી. પી.)].

૧૩૯. યદા પરાભવો હોતિ, પોસો જીવિતસઙ્ખયે;

અથ જાલઞ્ચ પાસઞ્ચ, આસજ્જાપિ ન બુજ્ઝતિ.

૧૪૦. એતે હંસા પક્કમન્તિ, વક્કઙ્ગા ભયમેરિતા;

હરિત્તચ હેમવણ્ણ, ત્વઞ્ઞેવ [ત્વઞ્ચ તં (સી.), ત્વઞ્ચ (પી.)] અવહિય્યસિ.

૧૪૧. એતે ભુત્વા ચ પિત્વા ચ, પક્કમન્તિ વિહઙ્ગમા;

અનપેક્ખમાના વક્કઙ્ગા, ત્વઞ્ઞેવેકો ઉપાસસિ.

૧૪૨. કિન્નુ ત્યાયં [તાયં (સી. સ્યા. પી.)] દિજો હોતિ, મુત્તો બદ્ધં ઉપાસસિ;

ઓહાય સકુણા યન્તિ, કિં એકો અવહિય્યસિ.

૧૪૩. રાજા મે સો દિજો મિત્તો, સખા પાણસમો ચ મે;

નેવ નં વિજહિસ્સામિ, યાવ કાલસ્સ પરિયાયં.

૧૪૪. યો ચ ત્વં સખિનો હેતુ, પાણં ચજિતુમિચ્છસિ;

સો તે સહાયં મુઞ્ચામિ, હોતુ રાજા તવાનુગો.

૧૪૫. એવં લુદ્દક નન્દસ્સુ, સહ સબ્બેહિ ઞાતિભિ;

યથાહમજ્જ નન્દામિ, દિસ્વા મુત્તં દિજાધિપં.

૧૪૬. કચ્ચિન્નુ ભોતો કુસલં, કચ્ચિ ભોતો અનામયં;

કચ્ચિ રટ્ઠમિદં ફીતં, ધમ્મેન મનુસાસસિ.

૧૪૭. કુસલઞ્ચેવ મે હંસ, અથો હંસ અનામયં;

અથો રટ્ઠમિદં ફીતં, ધમ્મેન મનુસાસહં.

૧૪૮. કચ્ચિ ભોતો અમચ્ચેસુ, દોસો કોચિ ન વિજ્જતિ;

કચ્ચિ આરા અમિત્તા તે, છાયા દક્ખિણતોરિવ.

૧૪૯. અથોપિ મે અમચ્ચેસુ, દોસો કોચિ ન વિજ્જતિ;

અથો આરા અમિત્તા મે, છાયા દક્ખિણતોરિવ.

૧૫૦. કચ્ચિ તે સાદિસી ભરિયા, અસ્સવા પિયભાણિની;

પુત્તરૂપયસૂપેતા, તવ છન્દવસાનુગા.

૧૫૧. અથો મે સાદિસી ભરિયા, અસ્સવા પિયભાણિની;

પુત્તરૂપયસૂપેતા, મમ છન્દવસાનુગા.

૧૫૨. કચ્ચિ તે બહવો પુત્તા, સુજાતા રટ્ઠવડ્ઢન;

પઞ્ઞાજવેન સમ્પન્ના, સમ્મોદન્તિ તતો તતો.

૧૫૩. સતમેકો ચ મે પુત્તા, ધતરટ્ઠ મયા સુતા;

તેસં ત્વં કિચ્ચમક્ખાહિ, નાવરુજ્ઝન્તિ [નાવરજ્ઝન્તિ (ક. સી. પી.)] તે વચો.

૧૫૪. ઉપપન્નોપિ ચે હોતિ, જાતિયા વિનયેન વા;

અથ પચ્છા કુરુતે યોગં, કિચ્છે [કિચ્ચે (સી. સ્યા. પી.)] આપાસુ [આવાસુ (સ્યા.), આપદાસુ (ક.)] સીદતિ.

૧૫૫. તસ્સ સંહીરપઞ્ઞસ્સ, વિવરો જાયતે મહા;

રત્તિમન્ધોવ [નત્તમન્ધોવ (સી. પી.)] રૂપાનિ, થૂલાનિ મનુપસ્સતિ.

૧૫૬. અસારે સારયોગઞ્ઞૂ, મતિં ન ત્વેવ વિન્દતિ;

સરભોવ ગિરિદુગ્ગસ્મિં, અન્તરાયેવ સીદતિ.

૧૫૭. હીનજચ્ચોપિ ચે હોતિ, ઉટ્ઠાતા ધિતિમા નરો;

આચારસીલસમ્પન્નો, નિસે અગ્ગીવ ભાસતિ.

૧૫૮. એતં મે ઉપમં કત્વા, પુત્તે વિજ્જાસુ વાચય [ઠાપસ (સ્યા. ક.)];

સંવિરૂળ્હેથ મેધાવી, ખેત્તે બીજંવ [ખેત્તબીજંવ (સી. પી.)] વુટ્ઠિયાતિ.

ચૂળહંસજાતકં છટ્ઠં.