૫૦૧. રોહણમિગજાતકં (૫)

૧૦૪. એતે યૂથા પતિયન્તિ, ભીતા મરણસ્સ [મરણા (સ્યા. પી.), મરણ (ક.)] ચિત્તક;

ગચ્છ તુવમ્પિ માકઙ્ખિ, જીવિસ્સન્તિ તયા સહ.

૧૦૫. નાહં રોહણ [રોહન્ત (સી. પી.), રોહન (સ્યા.)] ગચ્છામિ, હદયં મે અવકસ્સતિ;

ન તં અહં જહિસ્સામિ, ઇધ હિસ્સામિ જીવિતં.

૧૦૬. તે હિ નૂન મરિસ્સન્તિ, અન્ધા અપરિણાયકા;

ગચ્છ તુવમ્પિ માકઙ્ખિ, જીવિસ્સન્તિ તયા સહ.

૧૦૭. નાહં રોહણ ગચ્છામિ, હદયં મે અવકસ્સતિ;

ન તં બદ્ધં [બન્ધં (ક.)] જહિસ્સામિ, ઇધ હિસ્સામિ જીવિતં.

૧૦૮. ગચ્છ ભીરુ પલાયસ્સુ, કૂટે બદ્ધોસ્મિ આયસે;

ગચ્છ તુવમ્પિ માકઙ્ખિ, જીવિસ્સન્તિ તયા સહ.

૧૦૯. નાહં રોહણ ગચ્છામિ, હદયં મે અવકસ્સતિ;

ન તં અહં જહિસ્સામિ, ઇધ હિસ્સામિ જીવિતં.

૧૧૦. તે હિ નૂન મરિસ્સન્તિ, અન્ધા અપરિણાયકા;

ગચ્છ તુવમ્પિ માકઙ્ખિ, જીવિસ્સન્તિ તયા સહ.

૧૧૧. નાહં રોહણ ગચ્છામિ, હદયં મે અવકસ્સતિ;

ન તં બદ્ધં જહિસ્સામિ, ઇધ હિસ્સામિ જીવિતં.

૧૧૨. અયં સો લુદ્દકો એતિ, લુદ્દરૂપો [રુદ્દરૂપો (સી. પી.)] સહાવુધો;

યો નો વધિસ્સતિ અજ્જ, ઉસુના સત્તિયા અપિ [મપિ (સી. સ્યા. પી.)].

૧૧૩. સા મુહુત્તં પલાયિત્વા, ભયટ્ટા [ભયટ્ઠા (પી.)] ભયતજ્જિતા;

સુદુક્કરં અકરા ભીરુ, મરણાયૂપનિવત્તથ.

૧૧૪. કિન્નુ તેમે મિગા હોન્તિ, મુત્તા બદ્ધં ઉપાસરે;

ન તં ચજિતુમિચ્છન્તિ, જીવિતસ્સપિ કારણા.

૧૧૫. ભાતરો હોન્તિ મે લુદ્દ, સોદરિયા એકમાતુકા;

ન મં ચજિતુમિચ્છન્તિ, જીવિતસ્સપિ કારણા.

૧૧૬. તે હિ નૂન મરિસ્સન્તિ, અન્ધા અપરિણાયકા;

પઞ્ચન્નં જીવિતં દેહિ, ભાતરં મુઞ્ચ લુદ્દક.

૧૧૭. સો વો અહં પમોક્ખામિ, માતાપેત્તિભરં મિગં;

નન્દન્તુ માતાપિતરો, મુત્તં દિસ્વા મહામિગં.

૧૧૮. એવં લુદ્દક નન્દસ્સુ, સહ સબ્બેહિ ઞાતિભિ;

યથાહમજ્જ નન્દામિ, મુત્તં દિસ્વા મહામિગં.

૧૧૯. કથં ત્વં પમોક્ખો [કથં પમોક્ખો (સી. પી.), કથં તે પરોક્ખો (?)] આસિ, ઉપનીતસ્મિ જીવિતે;

કથં પુત્ત અમોચેસિ, કૂટપાસમ્હ લુદ્દકો.

૧૨૦. ભણં કણ્ણસુખં વાચં, હદયઙ્ગં હદયસ્સિતં;

સુભાસિતાહિ વાચાહિ, ચિત્તકો મં અમોચયિ.

૧૨૧. ભણં કણ્ણસુખં વાચં, હદયઙ્ગં હદયસ્સિતં;

સુભાસિતાહિ વાચાહિ, સુતના મં અમોચયિ.

૧૨૨. સુત્વા કણ્ણસુખં વાચં, હદયઙ્ગં હદયસ્સિતં;

સુભાસિતાનિ સુત્વાન, લુદ્દકો મં અમોચયિ.

૧૨૩. એવં આનન્દિતો હોતુ, સહ દારેહિ લુદ્દકો;

યથા મયજ્જ નન્દામ, દિસ્વા રોહણમાગતં.

૧૨૪. નનુ ત્વં અવચ [અવચા (સી. પી.)] લુદ્દ, ‘‘મિગચમ્માનિ આહરિં’’;

અથ કેન નુ વણ્ણેન, મિગચમ્માનિ નાહરિ.

૧૨૫. આગમા ચેવ હત્થત્થં, કૂટપાસઞ્ચ સો મિગો;

અબજ્ઝિ તં [અબજ્ઝિ તઞ્ચ (પી.)] મિગરાજં, તઞ્ચ મુત્તા ઉપાસરે.

૧૨૬. તસ્સ મે અહુ સંવેગો, અબ્ભુતો લોમહંસનો;

ઇમઞ્ચાહં મિગં હઞ્ઞે, અજ્જ હિસ્સામિ જીવિતં.

૧૨૭. કીદિસા તે મિગા લુદ્દ, કીદિસા ધમ્મિકા મિગા;

કથંવણ્ણા કથંસીલા, બાળ્હં ખો ને પસંસસિ.

૧૨૮. ઓદાતસિઙ્ગા સુચિવાળા, જાતરૂપતચૂપમા;

પાદા લોહિતકા તેસં, અઞ્જિતક્ખા મનોરમા.

૧૨૯. એદિસા તે મિગા દેવ, એદિસા ધમ્મિકા મિગા;

માતાપેત્તિભરા દેવ, ન તે સો અભિહારિતું [અભિહારયું (ક. સી.), અભિહારયિં (સ્યા.), અભિહારયં (પી.)].

૧૩૦. દમ્મિ નિક્ખસતં લુદ્દ, થૂલઞ્ચ મણિકુણ્ડલં;

ચતુસ્સદઞ્ચ [ચતુરસ્સઞ્ચ (સ્યા. ક.)] પલ્લઙ્કં, ઉમાપુપ્ફસરિન્નિભં [ઉમ્માપુપ્ફસિરિન્નિભં (સી. સ્યા. પી. ક.)].

૧૩૧. દ્વે ચ સાદિસિયો ભરિયા, ઉસભઞ્ચ ગવં સતં;

ધમ્મેન રજ્જં કારેસ્સં, બહુકારો મેસિ લુદ્દક.

૧૩૨. કસિવાણિજ્જા [કસી વણિજ્જા (સી. સ્યા. પી.)] ઇણદાનં, ઉઞ્છાચરિયા ચ લુદ્દક;

એતેન દારં પોસેહિ, મા પાપં અકરી પુનાતિ [અકરા પુનન્તિ (ક. સી. પી.)].

રોહણમિગજાતકં [રોહન્તમિગજાતકં (સી. પી.)] પઞ્ચમં.