૫૦૦. સિરીમન્તજાતકં (૪)

૮૩. પઞ્ઞાયુપેતં સિરિયા વિહીનં, યસસ્સિનં વાપિ અપેતપઞ્ઞં;

પુચ્છામિ તં સેનક એતમત્થં, કમેત્થ સેય્યો કુસલા વદન્તિ.

૮૪. ધીરા ચ બાલા ચ હવે જનિન્દ, સિપ્પૂપપન્ના ચ અસિપ્પિનો ચ;

સુજાતિમન્તોપિ અજાતિમસ્સ, યસસ્સિનો પેસકરા [પેસ્સકરા (સી. પી.)] ભવન્તિ;

એતમ્પિ દિસ્વાન અહં વદામિ, પઞ્ઞો નિહીનો સિરીમાવ [સિરિમાવ (સી. સ્યા. પી.)] સેય્યો.

૮૫. તુવમ્પિ પુચ્છામિ અનોમપઞ્ઞ, મહોસધ કેવલધમ્મદસ્સિ;

બાલં યસસ્સિં પણ્ડિતં અપ્પભોગં, કમેત્થ સેય્યો કુસલા વદન્તિ.

૮૬. પાપાનિ કમ્માનિ કરોતિ બાલો [કરોન્તિ બાલા (સ્યા. ક.)], ઇધમેવ [ઇદમેવ (સ્યા. ક. અટ્ઠ.), ઇમમેવ (ક.)] સેય્યો ઇતિ મઞ્ઞમાનો [મઞ્ઞમાના (સ્યા. ક.)];

ઇધલોકદસ્સી પરલોકમદસ્સી, ઉભયત્થ બાલો કલિમગ્ગહેસિ;

એતમ્પિ દિસ્વાન અહં વદામિ, પઞ્ઞોવ સેય્યો ન યસસ્સિ બાલો.

૮૭. ન સિપ્પમેતં વિદધાતિ ભોગં, ન બન્ધુવા [ન બન્ધવા (સી. સ્યા. ક.)] ન સરીરવણ્ણો યો [ન સરીરાવકાસો (સી. સ્યા. પી.)];

પસ્સેળમૂગં સુખમેધમાનં, સિરી હિ નં ભજતે ગોરવિન્દં [ગોરિમન્દં (સી. પી.)];

એતમ્પિ દિસ્વાન અહં વદામિ, પઞ્ઞો નિહીનો સિરીમાવ સેય્યો.

૮૮. લદ્ધા સુખં મજ્જતિ અપ્પપઞ્ઞો, દુક્ખેન ફુટ્ઠોપિ પમોહમેતિ;

આગન્તુના દુક્ખસુખેન ફુટ્ઠો, પવેધતિ વારિચરોવ ઘમ્મે;

એતમ્પિ દિસ્વાન અહં વદામિ, પઞ્ઞોવ સેય્યો ન યસસ્સિ બાલો.

૮૯. દુમં યથા સાદુફલં અરઞ્ઞે, સમન્તતો સમભિસરન્તિ [સમભિચરન્તિ (સી. પી.)] પક્ખી;

એવમ્પિ અડ્ઢં સધનં સભોગં, બહુજ્જનો ભજતિ અત્થહેતુ;

એતમ્પિ દિસ્વાન અહં વદામિ, પઞ્ઞો નિહીનો સિરીમાવ સેય્યો.

૯૦. ન સાધુ બલવા બાલો, સાહસા વિન્દતે ધનં;

કન્દન્તમેતં દુમ્મેધં, કડ્ઢન્તિ નિરયં ભુસં;

એતમ્પિ દિસ્વાન અહં વદામિ, પઞ્ઞોવ સેય્યો ન યસસ્સિ બાલો.

૯૧. યા કાચિ નજ્જો ગઙ્ગમભિસ્સવન્તિ, સબ્બાવ તા નામગોત્તં જહન્તિ;

ગઙ્ગા સમુદ્દં પટિપજ્જમાના, ન ખાયતે ઇદ્ધિં પઞ્ઞોપિ લોકે [ઇદ્ધિપરો હિ લોકે (ક. સી. સ્યા.), ઇદ્ધિપરો હિ લોકો (સી. પી. અટ્ઠ.)];

એતમ્પિ દિસ્વાન અહં વદામિ, પઞ્ઞો નિહીનો સિરીમાવ સેય્યો.

૯૨. યમેતમક્ખા ઉદધિં મહન્તં, સવન્તિ નજ્જો સબ્બકાલમસઙ્ખ્યં;

સો સાગરો નિચ્ચમુળારવેગો, વેલં ન અચ્ચેતિ મહાસમુદ્દો.

૯૩. એવમ્પિ બાલસ્સ પજપ્પિતાનિ, પઞ્ઞં ન અચ્ચેતિ સિરી કદાચિ;

એતમ્પિ દિસ્વાન અહં વદામિ, પઞ્ઞોવ સેય્યો ન યસસ્સિ બાલો.

૯૪. અસઞ્ઞતો ચેપિ પરેસમત્થં, ભણાતિ સન્ધાનગતો [સણ્ઠાનગતો (સ્યા. પી.), સન્થાનગતો (સી.)] યસસ્સી;

તસ્સેવ તં રૂહતિ ઞાતિમજ્ઝે, સિરી હિ નં [સિરિહીનં (સી. ક.), સિરીહીનં (સ્યા. પી.)] કારયતે ન પઞ્ઞા [ન પઞ્ઞો (સી.), ન પઞ્ઞં (સ્યા. ક.)];

એતમ્પિ દિસ્વાન અહં વદામિ, પઞ્ઞો નિહીનો સિરીમાવ સેય્યો.

૯૫. પરસ્સ વા અત્તનો વાપિ હેતુ, બાલો મુસા ભાસતિ અપ્પપઞ્ઞો;

સો નિન્દિતો હોતિ સભાય મજ્ઝે, પચ્છાપિ [પેચ્ચમ્પિ (સી. પી.), પેચ્ચાપિ (?)] સો દુગ્ગતિગામી હોતિ;

એતમ્પિ દિસ્વાન અહં વદામિ, પઞ્ઞોવ સેય્યો ન યસસ્સિ બાલો.

૯૬. અત્થમ્પિ ચે ભાસતિ ભૂરિપઞ્ઞો, અનાળ્હિયો [અનાલયો (પી.)] અપ્પધનો દલિદ્દો;

ન તસ્સ તં રૂહતિ ઞાતિમજ્ઝે, સિરી ચ પઞ્ઞાણવતો ન હોતિ;

એતમ્પિ દિસ્વાન અહં વદામિ, પઞ્ઞો નિહીનો સિરીમાવ સેય્યો.

૯૭. પરસ્સ વા અત્તનો વાપિ હેતુ, ન ભાસતિ અલિકં ભૂરિપઞ્ઞો;

સો પૂજિતો હોતિ સભાય મજ્ઝે, પચ્છાપિ સો સુગ્ગતિગામી હોતિ;

એતમ્પિ દિસ્વાન અહં વદામિ, પઞ્ઞોવ સેય્યો ન યસસ્સિ બાલો.

૯૮. હત્થી ગવસ્સા મણિકુણ્ડલા ચ, થિયો ચ ઇદ્ધેસુ કુલેસુ જાતા;

સબ્બાવ તા ઉપભોગા ભવન્તિ, ઇદ્ધસ્સ પોસસ્સ અનિદ્ધિમન્તો;

એતમ્પિ દિસ્વાન અહં વદામિ, પઞ્ઞો નિહીનો સિરીમાવ સેય્યો.

૯૯. અસંવિહિતકમ્મન્તં, બાલં દુમ્મેધમન્તિનં;

સિરી જહતિ દુમ્મેધં, જિણ્ણંવ ઉરગો તચં;

એતમ્પિ દિસ્વાન અહં વદામિ, પઞ્ઞોવ સેય્યો ન યસસ્સિ બાલો.

૧૦૦. પઞ્ચ પણ્ડિતા મયં ભદ્દન્તે, સબ્બે પઞ્જલિકા ઉપટ્ઠિતા;

ત્વં નો અભિભુય્ય ઇસ્સરોસિ, સક્કોવ ભૂતપતિ દેવરાજા;

એતમ્પિ દિસ્વાન અહં વદામિ, પઞ્ઞો નિહીનો સિરીમાવ સેય્યો.

૧૦૧. દાસોવ પઞ્ઞસ્સ યસસ્સિ બાલો, અત્થેસુ જાતેસુ તથાવિધેસુ;

યં પણ્ડિતો નિપુણં સંવિધેતિ, સમ્મોહમાપજ્જતિ તત્થ બાલો;

એતમ્પિ દિસ્વાન અહં વદામિ, પઞ્ઞોવ સેય્યો ન યસસ્સિ બાલો.

૧૦૨. અદ્ધા હિ પઞ્ઞાવ સતં પસત્થા, કન્તા સિરી ભોગરતા મનુસ્સા;

ઞાણઞ્ચ બુદ્ધાનમતુલ્યરૂપં, પઞ્ઞં ન અચ્ચેતિ સિરી કદાચિ.

૧૦૩. યં તં અપુચ્છિમ્હ અકિત્તયી નો, મહોસધ કેવલધમ્મદસ્સી;

ગવં સહસ્સં ઉસભઞ્ચ નાગં, આજઞ્ઞયુત્તે ચ રથે દસ ઇમે;

પઞ્હસ્સ વેય્યાકરણેન તુટ્ઠો, દદામિ તે ગામવરાનિ સોળસાતિ.

સિરીમન્તજાતકં [સિરિમન્દજાતકં (સી. સ્યા. પી.)] ચતુત્થં.