૪૯૯. સિવિજાતકં (૩)

૫૨. દૂરે અપસ્સં થેરોવ, ચક્ખું યાચિતુમાગતો;

એકનેત્તા ભવિસ્સામ, ચક્ખું મે દેહિ યાચિતો.

૫૩. કેનાનુસિટ્ઠો ઇધ માગતોસિ, વનિબ્બક [વણિબ્બક (સી.)] ચક્ખુપથાનિ યાચિતું;

સુદુચ્ચજં યાચસિ ઉત્તમઙ્ગં, યમાહુ નેત્તં પુરિસેન દુચ્ચજં.

૫૪. યમાહુ દેવેસુ સુજમ્પતીતિ, મઘવાતિ નં આહુ મનુસ્સલોકે;

તેનાનુસિટ્ઠો ઇધ માગતોસ્મિ, વનિબ્બકો ચક્ખુપથાનિ યાચિતું.

૫૫. વનિબ્બતો [વનિબ્બકો (સ્યા. પી.)] મય્હ વનિં [વનં (ક.), વણિં (સી. સ્યા. પી.)] અનુત્તરં, દદાહિ તે ચક્ખુપથાનિ યાચિતો;

દદાહિ મે ચક્ખુપથં અનુત્તરં, યમાહુ નેત્તં પુરિસેન દુચ્ચજં.

૫૬. યેન અત્થેન આગચ્છિ [આગઞ્છિ (સી. પી.)], યમત્થમભિપત્થયં;

તે તે ઇજ્ઝન્તુ સઙ્કપ્પા, લભ ચક્ખૂનિ બ્રાહ્મણ.

૫૭. એકં તે યાચમાનસ્સ, ઉભયાનિ દદામહં;

સ ચક્ખુમા ગચ્છ જનસ્સ પેક્ખતો, યદિચ્છસે ત્વં તદતે સમિજ્ઝતુ.

૫૮. મા નો દેવ અદા ચક્ખું, મા નો સબ્બે પરાકરિ [પરક્કરિ (સ્યા. ક. અટ્ઠ.), પરિક્કરિ (ક.) પરિ + આ + કરિ = પરાકરિ];

ધનં દેહિ મહારાજ, મુત્તા વેળુરિયા બહૂ.

૫૯. યુત્તે દેવ રથે દેહિ, આજાનીયે ચલઙ્કતે;

નાગે દેહિ મહારાજ, હેમકપ્પનવાસસે.

૬૦. યથા તં સિવયો [સીવિયો (સ્યા.)] સબ્બે, સયોગ્ગા સરથા સદા;

સમન્તા પરિકિરેય્યું [પરિકરેય્યું (સ્યા. પી.)], એવં દેહિ રથેસભ.

૬૧. યો વે દસ્સન્તિ વત્વાન, અદાને કુરુતે મનો;

ભૂમ્યં [ભૂમ્યા (સી. પી.)] સો પતિતં પાસં, ગીવાયં પટિમુઞ્ચતિ.

૬૨. યો વે દસ્સન્તિ વત્વાન, અદાને કુરુતે મનો;

પાપા પાપતરો હોતિ, સમ્પત્તો યમસાધનં.

૬૩. યઞ્હિ યાચે તઞ્હિ દદે, યં ન યાચે ન તં દદે;

સ્વાહં તમેવ દસ્સામિ, યં મં યાચતિ બ્રાહ્મણો.

૬૪. આયું નુ વણ્ણં નુ સુખં બલં નુ, કિં પત્થયાનો નુ જનિન્દ દેસિ;

કથઞ્હિ રાજા સિવિનં અનુત્તરો, ચક્ખૂનિ દજ્જા પરલોકહેતુ.

૬૫. ન વાહમેતં યસસા દદામિ, ન પુત્તમિચ્છે ન ધનં ન રટ્ઠં;

સતઞ્ચ ધમ્મો ચરિતો પુરાણો, ઇચ્ચેવ દાને રમતે મનો મમ [મમં (સી. પી.)].

૬૬. સખા ચ મિત્તો ચ મમાસિ સીવિક [સીવક (સી. પી.)], સુસિક્ખિતો સાધુ કરોહિ મે વચો;

ઉદ્ધરિત્વા [ઉદ્ધત્વ (સી.), લદ્ધ ત્વં (પી.)] ચક્ખૂનિ મમં જિગીસતો, હત્થેસુ ઠપેહિ [આવેસિ (સી.)] વનિબ્બકસ્સ.

૬૭. ચોદિતો સિવિરાજેન, સિવિકો વચનઙ્કરો;

રઞ્ઞો ચક્ખૂનુદ્ધરિત્વા [ચક્ખૂનિ ઉદ્ધત્વા (સી. પી.)], બ્રાહ્મણસ્સૂપનામયિ;

સચક્ખુ બ્રાહ્મણો આસિ, અન્ધો રાજા ઉપાવિસિ.

૬૮. તતો સો કતિપાહસ્સ, ઉપરૂળ્હેસુ ચક્ખુસુ;

સૂતં આમન્તયી રાજા, સિવીનં રટ્ઠવડ્ઢનો.

૬૯. યોજેહિ સારથિ યાનં, યુત્તઞ્ચ પટિવેદય;

ઉય્યાનભૂમિં ગચ્છામ, પોક્ખરઞ્ઞો વનાનિ ચ.

૭૦. સો ચ પોક્ખરણીતીરે [પોક્ખરણિયા તીરે (સી. પી.)], પલ્લઙ્કેન ઉપાવિસિ;

તસ્સ સક્કો પાતુરહુ, દેવરાજા સુજમ્પતિ.

૭૧. સક્કોહમસ્મિ દેવિન્દો, આગતોસ્મિ તવન્તિકે;

વરં વરસ્સુ રાજીસિ, યં કિઞ્ચિ મનસિચ્છસિ.

૭૨. પહૂતં મે ધનં સક્ક, બલં કોસો ચનપ્પકો;

અન્ધસ્સ મે સતો દાનિ, મરણઞ્ઞેવ રુચ્ચતિ.

૭૩. યાનિ સચ્ચાનિ દ્વિપદિન્દ, તાનિ ભાસસ્સુ ખત્તિય;

સચ્ચં તે ભણમાનસ્સ, પુન ચક્ખુ ભવિસ્સતિ.

૭૪. યે મં યાચિતુમાયન્તિ, નાનાગોત્તા વનિબ્બકા;

યોપિ મં યાચતે તત્થ, સોપિ મે મનસો પિયો;

એતેન સચ્ચવજ્જેન, ચક્ખુ મે ઉપપજ્જથ.

૭૫. યં મં સો યાચિતું આગા, દેહિ ચક્ખુન્તિ બ્રાહ્મણો;

તસ્સ ચક્ખૂનિ પાદાસિં, બ્રાહ્મણસ્સ વનિબ્બતો [વણિબ્બિનો (સી.), વનિબ્બિનો (પી.)].

૭૬. ભિય્યો મં આવિસી પીતિ, સોમનસ્સઞ્ચનપ્પકં;

એતેન સચ્ચવજ્જેન, દુતિયં મે ઉપપજ્જથ.

૭૭. ધમ્મેન ભાસિતા ગાથા, સિવીનં રટ્ઠવડ્ઢન;

એતાનિ તવ નેત્તાનિ, દિબ્બાનિ પટિદિસ્સરે.

૭૮. તિરોકુટ્ટં તિરોસેલં, સમતિગ્ગય્હ પબ્બતં;

સમન્તા યોજનસતં, દસ્સનં અનુભોન્તુ તે.

૭૯. કો નીધ વિત્તં ન દદેય્ય યાચિતો, અપિ વિસિટ્ઠં સુપિયમ્પિ અત્તનો;

તદિઙ્ઘ સબ્બે સિવયો સમાગતા, દિબ્બાનિ નેત્તાનિ મમજ્જ પસ્સથ.

૮૦. તિરોકુટ્ટં તિરોસેલં, સમતિગ્ગય્હ પબ્બતં;

સમન્તા યોજનસતં, દસ્સનં અનુભોન્તિ મે.

૮૧. ન ચાગમત્તા પરમત્થિ કિઞ્ચિ, મચ્ચાનં ઇધ જીવિતે;

દત્વાન માનુસં [દત્વા માનુસકં (સી.)] ચક્ખું, લદ્ધં મે [મે ઇતિ પદં નત્થિ સી. પોત્થકે] ચક્ખું અમાનુસં.

૮૨. એતમ્પિ દિસ્વા સિવયો, દેથ દાનાનિ ભુઞ્જથ;

દત્વા ચ ભુત્વા ચ યથાનુભાવં, અનિન્દિતા સગ્ગમુપેથ ઠાનન્તિ.

સિવિજાતકં તતિયં.