૪૮૨. રુરુમિગરાજજાતકં (૯)

૧૧૭. તસ્સ [કસ્સ (સી. પી.)] ગામવરં દમ્મિ, નારિયો ચ અલઙ્કતા;

યો [કો (સી. સ્યા. પી.)] મેતં મિગમક્ખાતિ [મક્ખાસિ (સ્યા. ક.)], મિગાનં મિગમુત્તમં.

૧૧૮. મય્હં ગામવરં દેહિ, નારિયો ચ અલઙ્કતા;

અહં તે મિગમક્ખિસ્સં, મિગાનં મિગમુત્તમં.

૧૧૯. એતસ્મિં વનસણ્ડસ્મિં, અમ્બા સાલા ચ પુપ્ફિતા;

ઇન્દગોપકસઞ્છન્ના, એત્થેસો તિટ્ઠતે મિગો.

૧૨૦. ધનું અદ્વેજ્ઝં [અદેજ્ઝં (સી. પી.), સરજ્જં (ક.)] કત્વાન, ઉસું સન્નય્હુપાગમિ [સન્ધાયુપાગમિ (સી. પી.)];

મિગો ચ દિસ્વા રાજાનં, દૂરતો અજ્ઝભાસથ.

૧૨૧. આગમેહિ મહારાજ, મા મં વિજ્ઝિ રથેસભ;

કો નુ તે ઇદમક્ખાસિ, એત્થેસો તિટ્ઠતે મિગો.

૧૨૨. એસ પાપચરો પોસો, સમ્મ તિટ્ઠતિ આરકા;

સોયં [સો હિ (સી. સ્યા. પી.)] મે ઇદમક્ખાસિ, એત્થેસો તિટ્ઠતે મિગો.

૧૨૩. સચ્ચં કિરેવ માહંસુ, નરા એકચ્ચિયા ઇધ;

કટ્ઠં નિપ્લવિતં સેય્યો, ન ત્વેવેકચ્ચિ યો નરો.

૧૨૪. કિં નુ રુરુ ગરહસિ મિગાનં, કિં પક્ખીનં કિં પન માનુસાનં;

ભયઞ્હિ મં વિન્દતિનપ્પરૂપં, સુત્વાન તં માનુસિં ભાસમાનં.

૧૨૫. યમુદ્ધરિં વાહને વુય્હમાનં, મહોદકે સલિલે સીઘસોતે;

તતોનિદાનં ભયમાગતં મમ, દુક્ખો હવે રાજ અસબ્ભિ સઙ્ગમો.

૧૨૬. સોહં ચતુપ્પત્તમિમં વિહઙ્ગમં, તનુચ્છિદં હદયે ઓસ્સજામિ;

હનામિ તં મિત્તદુબ્ભિં અકિચ્ચકારિં [હનામિ મિત્તદ્દુ’મકિચ્ચકારિં (સી. પી.)], યો તાદિસં કમ્મકતં ન જાને.

૧૨૭. ધીરસ્સ બાલસ્સ હવે જનિન્દ, સન્તો વધં નપ્પસંસન્તિ જાતુ;

કામં ઘરં ગચ્છતુ પાપધમ્મો, યઞ્ચસ્સ ભટ્ઠં તદેતસ્સ દેહિ;

અહઞ્ચ તે કામકરો ભવામિ.

૧૨૮. અદ્ધા રુરુ અઞ્ઞતરો સતં સો [સતં’સે (સી.)], યો દુબ્ભતો [દુબ્ભિનો (સ્યા.), દૂભતો (પી.)] માનુસસ્સ ન દુબ્ભિ;

કામં ઘરં ગચ્છતુ પાપધમ્મો, યઞ્ચસ્સ ભટ્ઠં તદેતસ્સ દમ્મિ;

અહઞ્ચ તે કામચારં દદામિ.

૧૨૯. સુવિજાનં સિઙ્ગાલાનં, સકુણાનઞ્ચવસ્સિતં;

મનુસ્સવસ્સિતં રાજ, દુબ્બિજાનતરં તતો.

૧૩૦. અપિ ચે મઞ્ઞતી પોસો, ઞાતિ મિત્તો સખાતિ વા;

યો પુબ્બે સુમનો હુત્વા, પચ્છા સમ્પજ્જતે દિસો.

૧૩૧. સમાગતા જાનપદા, નેગમા ચ સમાગતા;

મિગા સસ્સાનિ ખાદન્તિ, તં દેવો પટિસેધતુ.

૧૩૨. કામં જનપદો માસિ, રટ્ઠઞ્ચાપિ વિનસ્સતુ;

ન ત્વેવાહં રુરું દુબ્ભે, દત્વા અભયદક્ખિણં.

૧૩૩. મા મે જનપદો આસિ [મા મં જનપદો અહુ (સ્યા.)], રટ્ઠઞ્ચાપિ વિનસ્સતુ;

ન ત્વેવાહં [ન ત્વેવ (ક. સી. ક.)] મિગરાજસ્સ, વરં દત્વા મુસા ભણેતિ.

રુરુમિગરાજજાતકં નવમં.