૪૮૩. સરભમિગજાતકં (૧૦)

૧૩૪. આસીસેથેવ [આસિંસેથેવ (સી. સ્યા. પી.)] પુરિસો, ન નિબ્બિન્દેય્ય પણ્ડિતો;

પસ્સામિ વોહં અત્તાનં, યથા ઇચ્છિં તથા અહુ.

૧૩૫. આસીસેથેવ પુરિસો, ન નિબ્બિન્દેય્ય પણ્ડિતો;

પસ્સામિ વોહં અત્તાનં, ઉદકા થલમુબ્ભતં.

૧૩૬. વાયમેથેવ પુરિસો, ન નિબ્બિન્દેય્ય પણ્ડિતો;

પસ્સામિ વોહં અત્તાનં, યથા ઇચ્છિં તથા અહુ.

૧૩૭. વાયમેથેવ પુરિસો, ન નિબ્બિન્દેય્ય પણ્ડિતો;

પસ્સામિ વોહં અત્તાનં, ઉદકા થલમુબ્ભતં.

૧૩૮. દુક્ખૂપનીતોપિ નરો સપઞ્ઞો, આસં ન છિન્દેય્ય સુખાગમાય;

બહૂ હિ ફસ્સા અહિતા હિતા ચ, અવિતક્કિતા મચ્ચમુપબ્બજન્તિ [મચ્ચુમુપબ્બજન્તિ (ક. સી. પી.), મચ્ચુમુપપજ્જન્તિ (સ્યા. ક.) એત્થ ‘‘અવિતક્કિતાપિ ફસ્સો મચ્ચં જનં ઉપગચ્છન્તી’’તિ અત્થો].

૧૩૯. અચિન્તિતમ્પિ ભવતિ, ચિન્તિતમ્પિ વિનસ્સતિ;

ન હિ ચિન્તામયા ભોગા, ઇત્થિયા પુરિસસ્સ વા.

૧૪૦. સરભં ગિરિદુગ્ગસ્મિં, યં ત્વં અનુસરી પુરે;

અલીનચિત્તસ્સ તુવં, વિક્કન્તમનુજીવસિ [તવ, વિક્કન્તં જીવિતં લભિ (ક.)].

૧૪૧. યો તં વિદુગ્ગા નરકા સમુદ્ધરિ, સિલાય યોગ્ગં સરભો કરિત્વા;

દુક્ખૂપનીતં મચ્ચુમુખા પમોચયિ, અલીનચિત્તં તં મિગં [તમેવ (સ્યા. ક.)] વદેસિ.

૧૪૨. કિં ત્વં નુ [તુવન્નુ (સી. પી.)] તત્થેવ તદા અહોસિ, ઉદાહુ તે કોચિ નં [તં (ક.)] એતદક્ખા;

વિવટ્ટચ્છદ્દો નુસિ સબ્બદસ્સી, ઞાણં નુ તે બ્રાહ્મણ ભિંસરૂપં.

૧૪૩. ન ચેવહં તત્થ તદા અહોસિં, ન ચાપિ મે કોચિ નં [તં (ક.)] એતદક્ખા;

ગાથાપદાનઞ્ચ સુભાસિતાનં, અત્થં તદાનેન્તિ જનિન્દ ધીરા.

૧૪૪. આદાય પત્તિં [પત્તં (સ્યા.), પટ્ટિં (ક.)] પરવિરિયઘાતિં, ચાપે સરં કિં વિચિકિચ્છસે તુવં;

નુન્નો [નુણ્ણો (ક. સી. સ્યા.), તુણ્ણો (ક.)] સરો સરભં હન્તુ ખિપ્પં, અન્નઞ્હિ એતં વરપઞ્ઞ રઞ્ઞો.

૧૪૫. અદ્ધા પજાનામિ અહમ્પિ એતં, અન્નં મિગો બ્રાહ્મણ ખત્તિયસ્સ;

પુબ્બે કતઞ્ચ [પુબ્બે ચ કતં (ક.)] અપચાયમાનો, તસ્મા મિગં સરભં નો હનામિ.

૧૪૬. નેસો મિગો મહારાજ, અસુરેસો દિસમ્પતિ;

એતં હન્ત્વા મનુસ્સિન્દ, ભવસ્સુ અમરાધિપો.

૧૪૭. સચે ચ રાજા [રાજ (સી. સ્યા. પી.)] વિચિકિચ્છસે તુવં, હન્તું મિગં સરભં સહાયકં [સહાયકં મે (સી. પી.)];

સપુત્તદારો નરવીરસેટ્ઠ [નરવિરિયસેટ્ઠ (સી. પી.)], ગન્ત્વા [ગન્તા (સી. પી. અટ્ઠ.)] તુવં વેતરણિં યમસ્સ.

૧૪૮. કામં અહં જાનપદા ચ સબ્બે, પુત્તા ચ દારા ચ સહાયસઙ્ઘા;

ગચ્છેમુ તં વેતરણિં યમસ્સ, ન ત્વેવ હઞ્ઞો મમ પાણદો યો [પાણદ’સ્સ (સી. સ્યા. પી.)].

૧૪૯. અયં મિગો કિચ્છગતસ્સ મય્હં, એકસ્સ કત્તા વિવનસ્મિ ઘોરે;

તં તાદિસં પુબ્બકિચ્ચં સરન્તો, જાનં મહાબ્રહ્મે કથં હનેય્યં.

૧૫૦. મિત્તાભિરાધી ચિરમેવ જીવ, રજ્જં ઇમં ધમ્મગુણે [રજ્જમ્પિમં ચસ્સ ગણે (ક.)] પસાસ;

નારીગણેહિ પરિચારિયન્તો, મોદસ્સુ રટ્ઠે તિદિવેવ વાસવો.

૧૫૧. અક્કોધનો નિચ્ચપસન્નચિત્તો, સબ્બાતિથી યાચયોગો ભવિત્વા [પાહુનકે કરિત્વા (સ્યા.), યાચયોગો વિદિત્વા (ક.)];

દત્વા ચ ભુત્વા ચ યથાનુભાવં, અનિન્દિતો સગ્ગમુપેહિ ઠાનન્તિ.

સરભમિગજાતકં દસમં.

તેરસકનિપાતં નિટ્ઠિતં.