૪૮૧. તક્કારિયજાતકં (૮)

૧૦૪. અહમેવ દુબ્ભાસિતં ભાસિ બાલો, ભેકોવરઞ્ઞે અહિમવ્હાયમાનો [મવ્હયાનો (સી. પી.)];

તક્કારિયે સોબ્ભમિમં [સોબ્ભમ્હિ અહં (ક.)] પતામિ, ન કિરેવ સાધુ અતિવેલભાણી [સાધૂત્યતિવેલભાણી (ક.)].

૧૦૫. પપ્પોતિ મચ્ચો અતિવેલભાણી, બન્ધં વધં સોકપરિદ્દવઞ્ચ;

અત્તાનમેવ ગરહાસિ એત્થ, આચેર યં તં નિખણન્તિ સોબ્ભે.

૧૦૬. કિમેવહં તુણ્ડિલમનુપુચ્છિં, કરેય્ય સં [કરેય્યાસં (સ્યા.), કરેય્ય સ (ક.), ભરેય્ય સં (?)] ભાતરં કાળિકાયં [કાળિકાય (સ્યા. ક.)];

નગ્ગોવહં [નગ્ગોચ’હં (?)] વત્થયુગઞ્ચ જીનો, અયમ્પિ અત્થો બહુતાદિસોવ.

૧૦૭. યો યુજ્ઝમાનાનમયુજ્ઝમાનો [યુજ્ઝમાનેન અયુજ્ઝમાનો (ક.)], મેણ્ડન્તરં અચ્ચુપતી કુલિઙ્ગો;

સો પિંસિતો મેણ્ડસિરેહિ તત્થ, અયમ્પિ અત્થો બહુતાદિસોવ.

૧૦૮. ચતુરો જના પોત્થકમગ્ગહેસું, એકઞ્ચ પોસં અનુરક્ખમાના;

સબ્બેવ તે ભિન્નસિરા સયિંસુ, અયમ્પિ અત્થો બહુતાદિસોવ.

૧૦૯. અજા યથા વેળુગુમ્બસ્મિં બદ્ધા [બન્ધં (સ્યા. ક.)], અવક્ખિપન્તી અસિમજ્ઝગચ્છિ;

તેનેવ તસ્સા ગલકાવકન્તં [ગલયા વિકન્તું (ક.), ગલકં વિકન્તા (સ્યા.)], અયમ્પિ અત્થો બહુતાદિસોવ.

૧૧૦. ઇમે ન દેવા ન ગન્ધબ્બપુત્તા, મિગા ઇમે અત્થવસં ગતા મે [અત્થવસાભતા ઇમે (સી. સ્યા. પી.)];

એકઞ્ચ નં સાયમાસે પચન્તુ, એકં પુનપ્પાતરાસે [એકઞ્ચ નં પાતરાસે (ક. સી. પી.)] પચન્તુ.

૧૧૧. સતં સહસ્સાનિ દુભાસિતાનિ, કલમ્પિ નાગ્ઘન્તિ સુભાસિતસ્સ;

દુબ્ભાસિતં સઙ્કમાનો કિલેસો [કિલિસ્સતિ (?)], તસ્મા તુણ્હી કિમ્પુરિસા [કિંપુરિસો (સી. સ્યા.)] ન બાલ્યા.

૧૧૨. યા મેસા બ્યાહાસિ [બ્યાકાસિ (સી. સ્યા. પી.)] પમુઞ્ચથેતં, ગિરિઞ્ચ નં [ગિરિં વરં (ક.)] હિમવન્તં નયન્તુ;

ઇમઞ્ચ ખો દેન્તુ મહાનસાય, પાતોવ નં પાતરાસે પચન્તુ.

૧૧૩. પજ્જુન્નનાથા પસવો, પસુનાથા અયં પજા;

ત્વં નાથોસિ [ત્વં-નાથો’સ્મિ (સી. સ્યા. પી.)] મહારાજ, નાથોહં ભરિયાય મે [અમ્હ-નાથા મમ ભરિયા (ક. સી. સ્યા.)];

દ્વિન્નમઞ્ઞતરં ઞત્વા, મુત્તો ગચ્છેય્ય પબ્બતં.

૧૧૪. ન વે નિન્દા સુપરિવજ્જયેથ [સુપરિવજ્જયાથ (સ્યા.)], નાના જના સેવિતબ્બા જનિન્દ;

યેનેવ એકો લભતે પસંસં, તેનેવ અઞ્ઞો લભતે નિન્દિતારં.

૧૧૫. સબ્બો લોકો પરિચિત્તો અતિચિત્તો [પરચિત્તેન અતિચિત્તો (સી. સ્યા.), પરચિત્તેન અચિત્તો (સી. અટ્ઠ.)], સબ્બો લોકો ચિત્તવા સમ્હિ ચિત્તે;

પચ્ચેકચિત્તા પુથુ સબ્બસત્તા, કસ્સીધ ચિત્તસ્સ વસે ન વત્તે.

૧૧૬. તુણ્હી અહૂ કિમ્પુરિસો સભરિયો [અભાણી (ક.)], યો દાનિ બ્યાહાસિ ભયસ્સ ભીતો;

સો દાનિ મુત્તો સુખિતો અરોગો, વાચાકિરેવત્તવતી નરાનન્તિ.

તક્કારિયજાતકં અટ્ઠમં.