૪૭૩. મિત્તામિત્તજાતકં (૧૦)

૧૨૧. કાનિ કમ્માનિ કુબ્બાનં, કથં વિઞ્ઞૂ પરક્કમે;

અમિત્તં જાનેય્ય મેધાવી, દિસ્વા સુત્વા ચ પણ્ડિતો.

૧૨૨. ન નં ઉમ્હયતે દિસ્વા, ન ચ નં પટિનન્દતિ;

ચક્ખૂનિ ચસ્સ [ચક્ખૂનિસ્સ (સ્યા. ક.)] ન દદાતિ, પટિલોમઞ્ચ વત્તતિ.

૧૨૩. અમિત્તે તસ્સ ભજતિ, મિત્તે તસ્સ ન સેવતિ;

વણ્ણકામે નિવારેતિ, અક્કોસન્તે પસંસતિ.

૧૨૪. ગુય્હઞ્ચ તસ્સ નક્ખાતિ, તસ્સ ગુય્હં ન ગૂહતિ;

કમ્મં તસ્સ ન વણ્ણેતિ, પઞ્ઞસ્સ નપ્પસંસતિ.

૧૨૫. અભવે નન્દતિ તસ્સ, ભવે તસ્સ ન નન્દતિ;

અચ્છેરં [અચ્છરિયં (સી. સ્યા. પી.)] ભોજનં લદ્ધા, તસ્સ નુપ્પજ્જતે સતિ;

તતો નં નાનુકમ્પતિ, અહો સોપિ [અહાસોપિ (ક. સી. સ્યા. ક.)] લભેય્યિતો.

૧૨૬. ઇચ્ચેતે સોળસાકારા, અમિત્તસ્મિં પતિટ્ઠિતા;

યેહિ અમિત્તં જાનેય્ય, દિસ્વા સુત્વા ચ પણ્ડિતો.

૧૨૭. કાનિ કમ્માનિ કુબ્બાનં, કથં વિઞ્ઞૂ પરક્કમે;

મિત્તં જાનેય્ય મેધાવી, દિસ્વા સુત્વા ચ પણ્ડિતો.

૧૨૮. પવુત્થં તસ્સ સરતિ, આગતં અભિનન્દતિ;

તતો કેલાયિતો હોતિ, વાચાય પટિનન્દતિ.

૧૨૯. મિત્તે તસ્સેવ ભજતિ, અમિત્તે તસ્સ ન સેવતિ;

અક્કોસન્તે નિવારેતિ, વણ્ણકામે પસંસતિ.

૧૩૦. ગુય્હઞ્ચ તસ્સ અક્ખાતિ, તસ્સ ગુય્હઞ્ચ ગૂહતિ;

કમ્મઞ્ચ તસ્સ વણ્ણેતિ, પઞ્ઞં તસ્સ [પઞ્ઞમસ્સ (સ્યા. ક.)] પસંસતિ.

૧૩૧. ભવે ચ નન્દતિ તસ્સ [ભવે નન્દતિ તસ્સ ચ (ક.)], અભવે તસ્સ ન નન્દતિ;

અચ્છેરં [અચ્છરિયં (સી. સ્યા. પી.)] ભોજનં લદ્ધા, તસ્સ ઉપ્પજ્જતે સતિ;

તતો નં અનુકમ્પતિ, અહો સોપિ [પહાસોપિ (ક. સી. સ્યા. ક.)] લભેય્યિતો.

૧૩૨. ઇચ્ચેતે સોળસાકારા, મિત્તસ્મિં સુપ્પતિટ્ઠિતા;

યેહિ મિત્તઞ્ચ જાનેય્ય [મિત્તં સુજાનેય્ય (પી. ક.)], દિસ્વા સુત્વા ચ પણ્ડિતોતિ.

મિત્તામિત્તજાતકં દસમં.

દ્વાદસકનિપાતં નિટ્ઠિતં.