૪૭૨. મહાપદુમજાતકં (૯)

૧૦૬. નાદટ્ઠા [નાદિટ્ઠા (ક. સી. સ્યા. ક.)] પરતો દોસં, અણું થૂલાનિ સબ્બસો;

ઇસ્સરો પણયે દણ્ડં, સામં અપ્પટિવેક્ખિય.

૧૦૭. યો ચ અપ્પટિવેક્ખિત્વા, દણ્ડં કુબ્બતિ ખત્તિયો;

સકણ્ટકં સો ગિલતિ, જચ્ચન્ધોવ સમક્ખિકં.

૧૦૮. અદણ્ડિયં દણ્ડયતિ [દણ્ડિયતિ (સ્યા. પી.)], દણ્ડિયઞ્ચ અદણ્ડિયં [અદણ્ડિય (નિય્ય), ન દણ્ડયે (?)];

અન્ધોવ વિસમં મગ્ગં, ન જાનાતિ સમાસમં.

૧૦૯. યો ચ એતાનિ ઠાનાનિ, અણું થૂલાનિ સબ્બસો;

સુદિટ્ઠમનુસાસેય્ય, સ વે વોહરિતુ [વોહાતુ (પી.)] મરહતિ.

૧૧૦. નેકન્તમુદુના સક્કા, એકન્તતિખિણેન વા;

અત્તં મહન્તે [મહત્તે (સ્યા. ક.)] ઠપેતું [ઠાપેતું (સી. સ્યા. પી.)], તસ્મા ઉભયમાચરે.

૧૧૧. પરિભૂતો મુદુ હોતિ, અતિતિક્ખો ચ વેરવા;

એતઞ્ચ ઉભયં ઞત્વા, અનુમજ્ઝં સમાચરે.

૧૧૨. બહુમ્પિ રત્તો ભાસેય્ય, દુટ્ઠોપિ બહુ ભાસતિ;

ન ઇત્થિકારણા રાજ, પુત્તં ઘાતેતુમરહસિ.

૧૧૩. સબ્બોવ [સબ્બો ચ (ક. સી. પી.)] લોકો એકતો [એકન્તો (સી. પી.)], ઇત્થી ચ અયમેકિકા;

તેનાહં પટિપજ્જિસ્સં, ગચ્છથ પક્ખિપથેવ [પક્ખિપેથ (સ્યા. અટ્ઠ.)] તં.

૧૧૪. અનેકતાલે નરકે, ગમ્ભીરે ચ સુદુત્તરે [ગમ્ભીરે સુદુરુત્તરે (પી. ક.)];

પાતિતો ગિરિદુગ્ગસ્મિં, કેન ત્વં તત્થ નામરિ.

૧૧૫. નાગો જાતફણો તત્થ, થામવા ગિરિસાનુજો;

પચ્ચગ્ગહિ મં ભોગેહિ, તેનાહં તત્થ નામરિં.

૧૧૬. એહિ તં પટિનેસ્સામિ, રાજપુત્ત સકં ઘરં;

રજ્જં કારેહિ [કારેસિ (સી.)] ભદ્દન્તે, કિં અરઞ્ઞે કરિસ્સસિ.

૧૧૭. યથા ગિલિત્વા બળિસં, ઉદ્ધરેય્ય સલોહિતં;

ઉદ્ધરિત્વા સુખી અસ્સ, એવં [સુખં (પી. ક.)] પસ્સામિ અત્તનં [અત્તનિ (પી. ક.), અત્તના (સ્યા.), એવં અહમ્પિ પુન સોત્થિભાવપ્પત્તં ગિલિતબળિસં પુરિસમિવ અત્તાનં પસ્સામીતિ (અટ્ઠ. સંવણ્ણના)].

૧૧૮. કિં નુ ત્વં બળિસં બ્રૂસિ, કિં ત્વં બ્રૂસિ સલોહિતં;

કિં નુ ત્વં ઉબ્ભતં બ્રૂસિ, તં મે અક્ખાહિ પુચ્છિતો.

૧૧૯. કામાહં બળિસં બ્રૂમિ, હત્થિઅસ્સં સલોહિતં;

ચત્તાહં ઉબ્ભતં બ્રૂમિ, એવં જાનાહિ ખત્તિય.

૧૨૦. ચિઞ્ચામાણવિકા માતા, દેવદત્તો ચ મે પિતા;

આનન્દો પણ્ડિતો નાગો, સારિપુત્તો ચ દેવતા;

રાજપુત્તો અહં આસિં [અહં તદા રાજપુત્તો (સી. સ્યા. પી.)], એવં ધારેથ જાતકન્તિ.

મહાપદુમજાતકં નવમં.