૪૭૧. મેણ્ડકપઞ્હજાતકં (૮)

૯૪. યેસં ન કદાચિ ભૂતપુબ્બં, સખ્યં [સક્ખિં (સી. પી.), સખિ (સ્યા.)] સત્તપદમ્પિમસ્મિ લોકે;

જાતા અમિત્તા દુવે સહાયા, પટિસન્ધાય ચરન્તિ કિસ્સ હેતુ.

૯૫. યદિ મે અજ્જ પાતરાસકાલે, પઞ્હં ન સક્કુણેય્યાથ વત્તુમેતં;

રટ્ઠા પબ્બાજયિસ્સામિ વો સબ્બે, ન હિ મત્થો દુપ્પઞ્ઞજાતિકેહિ.

૯૬. મહાજનસમાગમમ્હિ ઘોરે, જનકોલાહલસઙ્ગમમ્હિ જાતે;

વિક્ખિત્તમના અનેકચિત્તા, પઞ્હં ન સક્કુણોમ વત્તુમેતં.

૯૭. એકગ્ગચિત્તાવ એકમેકા, રહસિ ગતા અત્થં નિચિન્તયિત્વા [અત્થાનિ ચિન્તયિત્વા (સ્યા. ક.)];

પવિવેકે સમ્મસિત્વાન ધીરા, અથ વક્ખન્તિ જનિન્દ એતમત્થં.

૯૮. ઉગ્ગપુત્ત-રાજપુત્તિયાનં, ઉરબ્ભસ્સ મંસં પિયં મનાપં;

ન સુનખસ્સ તે અદેન્તિ મંસં, અથ મેણ્ડસ્સ સુણેન સખ્યમસ્સ.

૯૯. ચમ્મં વિહનન્તિ એળકસ્સ, અસ્સપિટ્ઠત્થરસ્સુખસ્સ [અસ્સપિટ્ઠત્થરણસુખસ્સ (સી.)] હેતુ;

ન ચ તે સુનખસ્સ અત્થરન્તિ, અથ મેણ્ડસ્સ સુણેન સખ્યમસ્સ.

૧૦૦. આવેલ્લિતસિઙ્ગિકો હિ મેણ્ડો, ન ચ સુનખસ્સ વિસાણકાનિ અત્થિ;

તિણભક્ખો મંસભોજનો ચ, અથ મેણ્ડસ્સ સુણેન સખ્યમસ્સ.

૧૦૧. તિણમાસિ પલાસમાસિ મેણ્ડો, ન ચ સુનખો તિણમાસિ નો પલાસં;

ગણ્હેય્ય સુણો સસં બિળારં, અથ મેણ્ડસ્સ સુણેન સખ્યમસ્સ.

૧૦૨. અટ્ઠડ્ઢપદો ચતુપ્પદસ્સ, મેણ્ડો અટ્ઠનખો અદિસ્સમાનો;

છાદિયમાહરતી અયં ઇમસ્સ, મંસં આહરતી અયં અમુસ્સ.

૧૦૩. પાસાદવરગતો વિદેહસેટ્ઠો, વિતિહારં અઞ્ઞમઞ્ઞભોજનાનં;

અદ્દક્ખિ [અદ્દસ (સ્યા. ક.)] કિર સક્ખિકં જનિન્દો, બુભુક્કસ્સ પુણ્ણં મુખસ્સ [ભોભુક્ખસ્સ ચ પુણ્ણમુખસ્સ (સી.)] ચેતં.

૧૦૪. લાભા વત મે અનપ્પરૂપા, યસ્સ મેદિસા પણ્ડિતા કુલમ્હિ;

પઞ્હસ્સ ગમ્ભીરગતં નિપુણમત્થં, પટિવિજ્ઝન્તિ સુભાસિતેન ધીરા.

૧૦૫. અસ્સતરિરથઞ્ચ એકમેકં, ફીતં ગામવરઞ્ચ એકમેકં;

સબ્બેસં વો દમ્મિ પણ્ડિતાનં, પરમપ્પતીતમનો સુભાસિતેનાતિ.

મેણ્ડકપઞ્હજાતકં અટ્ઠમં.