૪૬૧. દસરથજાતકં (૭)

૮૪. એથ લક્ખણ સીતા ચ, ઉભો ઓતરથોદકં;

એવાયં ભરતો આહ, ‘‘રાજા દસરથો મતો’’.

૮૫. કેન રામપ્પભાવેન, સોચિતબ્બં ન સોચસિ;

પિતરં કાલકતં [કાલઙ્કતં (ક.)] સુત્વા, ન તં પસહતે દુખં.

૮૬. યં ન સક્કા નિપાલેતું, પોસેન લપતં બહું;

સ કિસ્સ વિઞ્ઞૂ મેધાવી, અત્તાનમુપતાપયે.

૮૭. દહરા ચ હિ વુદ્ધા ચ [યે વુદ્ધા (સી. અટ્ઠ.), યે વુડ્ઢા (સ્યા.)], યે બાલા યે ચ પણ્ડિતા;

અડ્ઢા ચેવ દલિદ્દા ચ, સબ્બે મચ્ચુપરાયણા.

૮૮. ફલાનમિવ પક્કાનં, નિચ્ચં પતનતો ભયં;

એવં જાતાન મચ્ચાનં, નિચ્ચ મરણતો ભયં.

૮૯. સાયમેકે ન દિસ્સન્તિ, પાતો દિટ્ઠા બહુજ્જના;

પાતો એકે ન દિસ્સન્તિ, સાયં દિટ્ઠા બહુજ્જના.

૯૦. પરિદેવયમાનો ચે, કિઞ્ચિદત્થં ઉદબ્બહે;

સમ્મૂળ્હો હિંસમત્તાનં, કયિરા તં વિચક્ખણો.

૯૧. કિસો વિવણ્ણો ભવતિ, હિંસમત્તાનમત્તનો [મત્તના (સી. અટ્ઠ. સુ. નિ. ૫૯૦)];

ન તેન પેતા પાલેન્તિ, નિરત્થા પરિદેવના.

૯૨. યથા સરણમાદિત્તં, વારિના પરિનિબ્બયે [વારિનાવનિબ્બાપયે (સ્યા. ક.)];

એવમ્પિ ધીરો સુતવા, મેધાવી પણ્ડિતો નરો;

ખિપ્પમુપ્પતિતં સોકં, વાતો તૂલંવ ધંસયે.

૯૩. મચ્ચો એકોવ [એકોવ મચ્ચો (સી. સ્યા. પી.)] અચ્ચેતિ, એકોવ જાયતે કુલે;

સંયોગપરમાત્વેવ, સમ્ભોગા સબ્બપાણિનં.

૯૪. તસ્મા હિ ધીરસ્સ બહુસ્સુતસ્સ, સમ્પસ્સતો લોકમિમં પરઞ્ચ;

અઞ્ઞાય ધમ્મં હદયં મનઞ્ચ, સોકા મહન્તાપિ ન તાપયન્તિ.

૯૫. સોહં દસ્સઞ્ચ ભોક્ખઞ્ચ, ભરિસ્સામિ ચ [સોહં યસઞ્ચ ભોગઞ્ચ, ભરિયાપિ ચ (સ્યા. ક.)] ઞાતકે;

સેસઞ્ચ પાલયિસ્સામિ, કિચ્ચમેતં [કિચ્ચમેવં (પી.)] વિજાનતો.

૯૬. દસ વસ્સસહસ્સાનિ, સટ્ઠિ વસ્સસતાનિ ચ;

કમ્બુગીવો મહાબાહુ, રામો રજ્જમકારયીતિ.

દસરથજાતકં સત્તમં.