૪૬૨. સંવરજાતકં (૮)

૯૭. જાનન્તો નો મહારાજ, તવ સીલં જનાધિપો;

ઇમે કુમારે પૂજેન્તો, ન તં કેનચિ મઞ્ઞથ.

૯૮. તિટ્ઠન્તે નો મહારાજે, અદુ [આદુ (સી. પી.), આદૂ (સ્યા.)] દેવે દિવઙ્ગતે;

ઞાતી તં સમનુઞ્ઞિંસુ, સમ્પસ્સં અત્થમત્તનો.

૯૯. કેન સંવરવત્તેન, સઞ્જાતે અભિતિટ્ઠસિ;

કેન તં નાતિવત્તન્તિ, ઞાતિસઙ્ઘા સમાગતા.

૧૦૦. ન રાજપુત્ત ઉસૂયામિ [રાજપુત્ત નુસ્સુય્યામિ (ક.)], સમણાનં મહેસિનં;

સક્કચ્ચં તે નમસ્સામિ, પાદે વન્દામિ તાદિનં.

૧૦૧. તે મં ધમ્મગુણે યુત્તં, સુસ્સૂસમનુસૂયકં;

સમણા મનુસાસન્તિ [સમનુસાસન્તિ (સી. સ્યા. પી.)], ઇસી ધમ્મગુણે રતા.

૧૦૨. તેસાહં વચનં સુત્વા, સમણાનં મહેસિનં;

ન કિઞ્ચિ અતિમઞ્ઞામિ, ધમ્મે મે નિરતો મનો.

૧૦૩. હત્થારોહા અનીકટ્ઠા, રથિકા પત્તિકારકા;

તેસં [તેસુ (પી.)] નપ્પટિબન્ધામિ, નિવિટ્ઠં [નિબદ્ધં (સી. પી.)] ભત્તવેતનં.

૧૦૪. મહામત્તા ચ મે અત્થિ, મન્તિનો પરિચારકા;

બારાણસિં વોહરન્તિ, બહુમંસસુરોદકં.

૧૦૫. અથોપિ વાણિજા ફીતા, નાનારટ્ઠેહિ આગતા;

તેસુ મે વિહિતા રક્ખા, એવં જાનાહુપોસથ.

૧૦૬. ધમ્મેન કિર ઞાતીનં, રજ્જં કારેહિ સંવર;

મેધાવી પણ્ડિતો ચાસિ [ચાપિ (સી. પી.)], અથોપિ ઞાતિનં હિતો.

૧૦૭. તં તં ઞાતિપરિબ્યૂળ્હં, નાનારતનમોચિતં;

અમિત્તા નપ્પસહન્તિ, ઇન્દંવ અસુરાધિપોતિ.

સંવરજાતકં અટ્ઠમં.