૪૬૦. યુધઞ્ચયજાતકં (૬)

૭૩. મિત્તામચ્ચપરિબ્યૂળ્હં [પરિબ્બૂળ્હં (સી. પી.)], અહં વન્દે રથેસભં;

પબ્બજિસ્સામહં રાજ [પબ્બજિસ્સં મહારાજ (સી. પી.)], તં દેવો અનુમઞ્ઞતુ.

૭૪. સચે તે ઊનં કામેહિ, અહં પરિપૂરયામિ [અહંવ પૂરયામિ (ક.)] તે;

યો તં હિંસતિ વારેમિ, મા પબ્બજ [પબ્બજિ (પી.)] યુધઞ્ચય [યુધઞ્જય (સી. સ્યા.), યુવઞ્જય (પી.)].

૭૫. ન મત્થિ ઊનં કામેહિ, હિંસિતા મે ન વિજ્જતિ;

દીપઞ્ચ કાતુમિચ્છામિ, યં જરા નાભિકીરતિ.

૭૬. પુત્તો વા પિતરં યાચે, પિતા વા પુત્તમોરસં;

નેગમો તં યાચે [નેગમો યાચતે (સી. સ્યા. પી.)] તાત, મા પબ્બજ યુધઞ્ચય.

૭૭. મા મં દેવ નિવારેહિ, પબ્બજન્તં રથેસભ;

માહં કામેહિ સમ્મત્તો, જરાય વસમન્વગૂ.

૭૮. અહં તં તાત યાચામિ, અહં પુત્ત નિવારયે;

ચિરં તં દટ્ઠુમિચ્છામિ, મા પબ્બજ યુધઞ્ચય.

૭૯. ઉસ્સાવોવ તિણગ્ગમ્હિ, સૂરિયુગ્ગમનં પતિ;

એવમાયુ મનુસ્સાનં, મા મં અમ્મ નિવારય.

૮૦. તરમાનો ઇમં યાનં, આરોપેતુ [તરમાના ઇમં યાનં, આરોપેન્તુ (સી. પી.)] રથેસભ;

મા મે માતા તરન્તસ્સ, અન્તરાયકરા અહુ.

૮૧. અભિધાવથ ભદ્દન્તે, સુઞ્ઞં હેસ્સતિ રમ્મકં;

યુધઞ્ચયો અનુઞ્ઞાતો, સબ્બદત્તેન રાજિના.

૮૨. યોહુ સેટ્ઠો સહસ્સસ્સ [મનુસ્સાનં (સ્યા.), સહસ્સાનં (ક.)], યુવા કઞ્ચનસન્નિભો;

સોયં કુમારો પબ્બજિતો, કાસાયવસનો બલી.

૮૩. ઉભો કુમારા પબ્બજિતા, યુધઞ્ચયો યુધિટ્ઠિલો;

પહાય માતાપિતરો, સઙ્ગં છેત્વાન મચ્ચુનોતિ.

યુધઞ્ચયજાતકં છટ્ઠં.