૪૫૯. પાનીયજાતકં (૫)

૫૯. મિત્તો મિત્તસ્સ પાનીયં, અદિન્નં પરિભુઞ્જિસં;

તેન પચ્છા વિજિગુચ્છિં, તં પાપં પકતં મયા;

મા પુન અકરં પાપં, તસ્મા પબ્બજિતો અહં.

૬૦. પરદારઞ્ચ દિસ્વાન, છન્દો મે ઉદપજ્જથ [ઉપપજ્જથ (સ્યા. ક.)];

તેન પચ્છા વિજિગુચ્છિં, તં પાપં પકતં મયા;

મા પુન અકરં પાપં, તસ્મા પબ્બજિતો અહં.

૬૧. પિતરં મે મહારાજ, ચોરા અગણ્હુ [અગણ્હું (સી. પી.), અગણ્હિ (ક.)] કાનને;

તેસાહં પુચ્છિતો જાનં, અઞ્ઞથા નં વિયાકરિં.

૬૨. તેન પચ્છા વિજિગુચ્છિં, તં પાપં પકતં મયા;

મા પુન અકરં પાપં, તસ્મા પબ્બજિતો અહં.

૬૩. પાણાતિપાતમકરું, સોમયાગે ઉપટ્ઠિતે;

તેસાહં સમનુઞ્ઞાસિં, તેન પચ્છા વિજિગુચ્છિં.

૬૪. તં પાપં પકતં મયા, મા પુન અકરં પાપં;

તસ્મા પબ્બજિતો અહં.

૬૫. સુરામેરયમાધુકા [મધુકા (સી. સ્યા. પી.)], યે જના પઠમાસુ નો;

બહૂનં તે અનત્થાય, મજ્જપાનમકપ્પયું.

૬૬. તેસાહં સમનુઞ્ઞાસિં, તેન પચ્છા વિજિગુચ્છિં;

તં પાપં પકતં મયા, મા પુન અકરં પાપં;

તસ્મા પબ્બજિતો અહં.

૬૭. ધિરત્થુ સુબહૂ કામે, દુગ્ગન્ધે બહુકણ્ટકે;

યે અહં પટિસેવન્તો, નાલભિં તાદિસં સુખં.

૬૮. મહસ્સાદા સુખા કામા, નત્થિ કામા પરં [કામપરં (સી. પી.)] સુખં;

યે કામે પટિસેવન્તિ, સગ્ગં તે ઉપપજ્જરે.

૬૯. અપ્પસ્સાદા દુખા કામા, નત્થિ કામા પરં દુખં;

યે કામે પટિસેવન્તિ, નિરયં તે ઉપપજ્જરે.

૭૦. અસી યથા સુનિસિતો, નેત્તિંસોવ સુપાયિકો [સુપાસિતો (ક. સી. નિય્ય), સુપાયિતો (ક. અટ્ઠ.)];

સત્તીવ ઉરસિ ખિત્તા, કામા દુક્ખતરા તતો.

૭૧. અઙ્ગારાનંવ જલિતં, કાસું સાધિકપોરિસં;

ફાલંવ દિવસંતત્તં, કામા દુક્ખતરા તતો.

૭૨. વિસં યથા હલાહલં, તેલં પક્કુથિતં [ઉક્કટ્ઠિતં (સી. પી.), પક્કુટ્ઠિતં (સ્યા.)] યથા;

તમ્બલોહ [તમ્પલોહં (સ્યા.)] વિલીનંવ, કામા દુક્ખતરા તતોતિ.

પાનીયજાતકં પઞ્ચમં.