૪૫૪. ઘટપણ્ડિતજાતકં (૧૬)

૧૬૫. ઉટ્ઠેહિ કણ્હ કિં સેસિ, કો અત્થો સુપનેન તે;

યોપિ તુય્હં [તાયં (પી.)] સકો ભાતા, હદયં ચક્ખુ ચ [ચક્ખુંવ (પી.)] દક્ખિણં;

તસ્સ વાતા બલીયન્તિ, ઘટો જપ્પતિ [સસં જપ્પતિ (?)] કેસવ.

૧૬૬. તસ્સ તં વચનં સુત્વા, રોહિણેય્યસ્સ કેસવો;

તરમાનરૂપો વુટ્ઠાસિ, ભાતુસોકેન અટ્ટિતો.

૧૬૭. કિં નુ ઉમ્મત્તરૂપોવ, કેવલં દ્વારકં ઇમં;

સસો સસોતિ લપસિ, કો નુ તે સસમાહરિ.

૧૬૮. સોવણ્ણમયં મણીમયં, લોહમયં અથ રૂપિયામયં;

સઙ્ખસિલાપવાળમયં, કારયિસ્સામિ તે સસં.

૧૬૯. સન્તિ અઞ્ઞેપિ સસકા, અરઞ્ઞે વનગોચરા;

તેપિ તે આનયિસ્સામિ, કીદિસં સસમિચ્છસિ.

૧૭૦. ન ચાહમેતે [ન ચાહમેતં (સી.), ન વાહમેતે (સ્યા.), ન વાહમેતં (પી.)] ઇચ્છામિ, યે સસા પથવિસ્સિતા [પઠવિંસિતા (સી. સ્યા. પી.)];

ચન્દતો સસમિચ્છામિ, તં મે ઓહર કેસવ.

૧૭૧. સો નૂન મધુરં ઞાતિ, જીવિતં વિજહિસ્સસિ;

અપત્થિયં યો પત્થયસિ, ચન્દતો સસમિચ્છસિ.

૧૭૨. એવં ચે કણ્હ જાનાસિ, યદઞ્ઞમનુસાસસિ;

કસ્મા પુરે મતં પુત્તં, અજ્જાપિ મનુસોચસિ.

૧૭૩. યં ન લબ્ભા મનુસ્સેન, અમનુસ્સેન વા પુન [પન (પે. વ. ૨૧૫)];

જાતો મે મા મરી પુત્તો, કુતો લબ્ભા અલબ્ભિયં.

૧૭૪. ન મન્તા મૂલભેસજ્જા, ઓસધેહિ ધનેન વા;

સક્કા આનયિતું કણ્હ, યં પેતમનુસોચસિ.

૧૭૫. યસ્સ એતાદિસા અસ્સુ, અમચ્ચા પુરિસપણ્ડિતા;

યથા નિજ્ઝાપયે અજ્જ, ઘટો પુરિસપણ્ડિતો.

૧૭૬. આદિત્તં વત મં સન્તં, ઘતસિત્તંવ પાવકં;

વારિના વિય ઓસિઞ્ચં, સબ્બં નિબ્બાપયે દરં.

૧૭૭. અબ્બહી વત મે સલ્લં, યમાસિ હદયસ્સિતં;

યો મે સોકપરેતસ્સ, પુત્તસોકં અપાનુદિ.

૧૭૮. સોહં અબ્બૂળ્હસલ્લોસ્મિ, વીતસોકો અનાવિલો;

ન સોચામિ ન રોદામિ, તવ સુત્વાન માણવ [ભાતિક (પે. વ. ૨૨૪)].

૧૭૯. એવં કરોન્તિ સપ્પઞ્ઞા, યે હોન્તિ અનુકમ્પકા;

નિવત્તયન્તિ સોકમ્હા, ઘટો જેટ્ઠંવ ભાતરન્તિ.

ઘટપણ્ડિતજાતકં સોળસમં.

દસકનિપાતં નિટ્ઠિતં.