૪૫૩. મહામઙ્ગલજાતકં (૧૫)

૧૫૫. કિંસુ નરો જપ્પમધિચ્ચકાલે, કં વા વિજ્જં કતમં વા સુતાનં;

સો મચ્ચો અસ્મિઞ્ચ [અસ્મિંવ (પી.)] પરમ્હિ લોકે, કથં કરો સોત્થાનેન ગુત્તો.

૧૫૬. યસ્સ દેવા પિતરો ચ સબ્બે, સરીસપા [સિરિંસપા (સી. સ્યા. પી.)] સબ્બભૂતાનિ ચાપિ;

મેત્તાય નિચ્ચં અપચિતાનિ હોન્તિ, ભૂતેસુ વે સોત્થાનં તદાહુ.

૧૫૭. યો સબ્બલોકસ્સ નિવાતવુત્તિ, ઇત્થીપુમાનં સહદારકાનં;

ખન્તા દુરુત્તાનમપ્પટિકૂલવાદી, અધિવાસનં સોત્થાનં તદાહુ.

૧૫૮. યો નાવજાનાતિ સહાયમિત્તે [સહાયમત્તે (સી. પી.)], સિપ્પેન કુલ્યાહિ ધનેન જચ્ચા;

રુચિપઞ્ઞો અત્થકાલે મતીમા [મુતીમા (સી. પી.)], સહાયેસુ વે સોત્થાનં તદાહુ.

૧૫૯. મિત્તાનિ વે યસ્સ ભવન્તિ સન્તો, સંવિસ્સત્થા અવિસંવાદકસ્સ;

ન મિત્તદુબ્ભી સંવિભાગી ધનેન, મિત્તેસુ વે સોત્થાનં તદાહુ.

૧૬૦. યસ્સ ભરિયા તુલ્યવયા સમગ્ગા, અનુબ્બતા ધમ્મકામા પજાતા [સજાતા (ક.)];

કોલિનિયા સીલવતી પતિબ્બતા, દારેસુ વે સોત્થાનં તદાહુ.

૧૬૧. યસ્સ રાજા ભૂતપતિ [ભૂતપતી (સી. સ્યા. પી.)] યસસ્સી, જાનાતિ સોચેય્યં પરક્કમઞ્ચ;

અદ્વેજ્ઝતા સુહદયં મમન્તિ, રાજૂસુ વે સોત્થાનં તદાહુ.

૧૬૨. અન્નઞ્ચ પાનઞ્ચ દદાતિ સદ્ધો, માલઞ્ચ ગન્ધઞ્ચ વિલેપનઞ્ચ;

પસન્નચિત્તો અનુમોદમાનો, સગ્ગેસુ વે સોત્થાનં તદાહુ.

૧૬૩. યમરિયધમ્મેન પુનન્તિ વુદ્ધા, આરાધિતા સમચરિયાય સન્તો;

બહુસ્સુતા ઇસયો સીલવન્તો, અરહન્તમજ્ઝે સોત્થાનં તદાહુ.

૧૬૪. એતાનિ ખો સોત્થાનાનિ લોકે, વિઞ્ઞુપ્પસત્થાનિ સુખુદ્રયાનિ [સુખિન્દ્રિયાનિ (પી.)];

તાનીધ સેવેથ નરો સપઞ્ઞો, ન હિ મઙ્ગલે કિઞ્ચનમત્થિ સચ્ચન્તિ.

મહામઙ્ગલજાતકં પન્નરસમં.