૪૫૨. ભૂરિપઞ્ઞજાતકં (૧૪)

૧૪૫. સચ્ચં કિર ત્વં અપિ [ત્વમ્પિ (સી.), તુવમ્પિ (સ્યા.), ત્વં અસિ (ક.)] ભૂરિપઞ્ઞ, યા તાદિસી સીરિ ધિતી મતી ચ;

ન તાયતેભાવવસૂપનિતં, યો યવકં ભુઞ્જસિ અપ્પસૂપં.

૧૪૬. સુખં દુક્ખેન પરિપાચયન્તો, કાલા કાલં વિચિનં છન્દછન્નો;

અત્થસ્સ દ્વારાનિ અવાપુરન્તો, તેનાહં તુસ્સામિ યવોદનેન.

૧૪૭. કાલઞ્ચ ઞત્વા અભિજીહનાય, મન્તેહિ અત્થં પરિપાચયિત્વા;

વિજમ્ભિસ્સં સીહવિજમ્ભિતાનિ, તાયિદ્ધિયા દક્ખસિ મં પુનાપિ.

૧૪૮. સુખીપિ હેકે [સુખી હિ એકે (સી.), સુખીતિ હેકે (?)] ન કરોન્તિ પાપં, અવણ્ણસંસગ્ગભયા પુનેકે;

પહૂ સમાનો વિપુલત્થચિન્તી, કિંકારણા મે ન કરોસિ દુક્ખં.

૧૪૯. ન પણ્ડિતા અત્તસુખસ્સ હેતુ, પાપાનિ કમ્માનિ સમાચરન્તિ;

દુક્ખેન ફુટ્ઠા ખલિતાપિ સન્તા, છન્દા ચ દોસા ન જહન્તિ ધમ્મં.

૧૫૦. યેન કેનચિ વણ્ણેન, મુદુના દારુણેન વા;

ઉદ્ધરે દીનમત્તાનં, પચ્છા ધમ્મં સમાચરે.

૧૫૧. યસ્સ રુક્ખસ્સ છાયાય, નિસીદેય્ય સયેય્ય વા;

ન તસ્સ સાખં ભઞ્જેય્ય, મિત્તદુબ્ભો હિ પાપકો.

૧૫૨. યસ્સાપિ [યસ્સ હિ (સી. ક.)] ધમ્મં પુરિસો [મનુજો (સી.)] વિજઞ્ઞા, યે ચસ્સ કઙ્ખં વિનયન્તિ સન્તો;

તં હિસ્સ દીપઞ્ચ પરાયનઞ્ચ, ન તેન મેત્તિં જરયેથ પઞ્ઞો.

૧૫૩. અલસો ગિહી કામભોગી ન સાધુ, અસઞ્ઞતો પબ્બજિતો ન સાધુ;

રાજા ન સાધુ અનિસમ્મકારી, યો પણ્ડિતો કોધનો તં ન સાધુ.

૧૫૪. નિસમ્મ ખત્તિયો કયિરા, નાનિસમ્મ દિસમ્પતિ;

નિસમ્મકારિનો રાજ, યસો કિત્તિ ચ વડ્ઢતીતિ.

ભૂરિપઞ્ઞજાતકં ચુદ્દસમં.