૪૪૦. કણ્હજાતકં (૨)

૧૧. કણ્હો વતાયં પુરિસો, કણ્હં ભુઞ્જતિ ભોજનં;

કણ્હે ભૂમિપદેસસ્મિં, ન મય્હં મનસો પિયો.

૧૨. ન કણ્હો તચસા હોતિ, અન્તોસારો હિ બ્રાહ્મણો;

યસ્મિં પાપાનિ કમ્માનિ, સ વે કણ્હો સુજમ્પતિ.

૧૩. એતસ્મિં તે સુલપિતે, પતિરૂપે સુભાસિતે;

વરં બ્રાહ્મણ તે દમ્મિ, યં કિઞ્ચિ મનસિચ્છસિ.

૧૪. વરઞ્ચે મે અદો સક્ક, સબ્બભૂતાનમિસ્સર;

સુનિક્કોધં સુનિદ્દોસં, નિલ્લોભં વુત્તિમત્તનો;

નિસ્નેહમભિકઙ્ખામિ, એતે મે ચતુરો વરે.

૧૫. કિં નુ કોધે વા [કોધેવ (સી. પી.)] દોસે વા, લોભે સ્નેહે ચ બ્રાહ્મણ;

આદીનવં ત્વં પસ્સસિ [સમ્પસ્સસિ (સી. પી.)], તં મે અક્ખાહિ પુચ્છિતો.

૧૬. અપ્પો હુત્વા બહુ હોતિ, વડ્ઢતે સો અખન્તિજો;

આસઙ્ગી બહુપાયાસો, તસ્મા કોધં ન રોચયે.

૧૭. દુટ્ઠસ્સ ફરુસા [પઠમા (પી. સી. નિય્ય)] વાચા, પરામાસો અનન્તરા;

તતો પાણિ તતો દણ્ડો, સત્થસ્સ પરમા ગતિ [પરામસતિ (ક.)];

દોસો કોધસમુટ્ઠાનો, તસ્મા દોસં ન રોચયે.

૧૮. આલોપસાહસાકારા [સહસાકારા (સી. સ્યા. પી.)], નિકતી વઞ્ચનાનિ ચ;

દિસ્સન્તિ લોભધમ્મેસુ, તસ્મા લોભં ન રોચયે.

૧૯. સ્નેહસઙ્ગથિતા [સઙ્ગધિતા (ક.), સઙ્ગન્તિતા (સ્યા.)] ગન્થા, સેન્તિ મનોમયા પુથૂ;

તે ભુસં ઉપતાપેન્તિ, તસ્મા સ્નેહં ન રોચયે.

૨૦. એતસ્મિં તે સુલપિતે, પતિરૂપે સુભાસિતે;

વરં બ્રાહ્મણ તે દમ્મિ, યં કિઞ્ચિ મનસિચ્છસિ.

૨૧. વરઞ્ચે મે અદો સક્ક, સબ્બભૂતાનમિસ્સર;

અરઞ્ઞે મે વિહરતો, નિચ્ચં એકવિહારિનો;

આબાધા મા [ન (સ્યા. પી.)] ઉપ્પજ્જેય્યું, અન્તરાયકરા ભુસા.

૨૨. એતસ્મિં તે સુલપિતે, પતિરૂપે સુભાસિતે;

વરં બ્રાહ્મણ તે દમ્મિ, યં કિઞ્ચિ મનસિચ્છસિ.

૨૩. વરઞ્ચે મે અદો સક્ક, સબ્બભૂતાનમિસ્સર;

ન મનો વા સરીરં વા, મં-કતે સક્ક કસ્સચિ;

કદાચિ ઉપહઞ્ઞેથ, એતં સક્ક વરં વરેતિ.

કણ્હજાતકં દુતિયં.