૪૪૧. ચતુપોસથિયજાતકં (૩)

૨૪. યો કોપનેય્યે ન કરોતિ કોપં, ન કુજ્ઝતિ સપ્પુરિસો કદાચિ;

કુદ્ધોપિ સો નાવિકરોતિ કોપં, તં વે નરં સમણમાહુ [સમણં આહુ (સી.)] લોકે.

૨૫. ઊનૂદરો યો સહતે જિઘચ્છં, દન્તો તપસ્સી મિતપાનભોજનો;

આહારહેતુ ન કરોતિ પાપં, તં વે નરં સમણમાહુ લોકે.

૨૬. ખિડ્ડં રતિં વિપ્પજહિત્વાન સબ્બં, ન ચાલિકં ભાસસિ કિઞ્ચિ લોકે;

વિભૂસટ્ઠાના વિરતો મેથુનસ્મા, તં વે નરં સમણમાહુ લોકે.

૨૭. પરિગ્ગહં લોભધમ્મઞ્ચ સબ્બં, યો વે પરિઞ્ઞાય પરિચ્ચજેતિ;

દન્તં ઠિતત્તં અમમં નિરાસં, તં વે નરં સમણમાહુ લોકે.

૨૮. પુચ્છામ કત્તારમનોમપઞ્ઞં [મનોમપઞ્ઞ (સ્યા. ક.)], કથાસુ નો વિગ્ગહો અત્થિ જાતો;

છિન્દજ્જ કઙ્ખં વિચિકિચ્છિતાનિ, તદજ્જ [તયાજ્જ (સી.)] કઙ્ખં વિતરેમુ સબ્બે.

૨૯. યે પણ્ડિતા અત્થદસા ભવન્તિ, ભાસન્તિ તે યોનિસો તત્થ કાલે;

કથં નુ કથાનં અભાસિતાનં, અત્થં નયેય્યું કુસલા જનિન્દા.

૩૦. કથં હવે ભાસતિ નાગરાજા, ગરુળો પન વેનતેય્યો કિમાહ;

ગન્ધબ્બરાજા પન કિં વદેસિ, કથં પન કુરૂનં રાજસેટ્ઠો.

૩૧. ખન્તિં હવે ભાસતિ નાગરાજા, અપ્પાહારં ગરુળો વેનતેય્યો;

ગન્ધબ્બરાજા રતિવિપ્પહાનં, અકિઞ્ચનં કુરૂનં રાજસેટ્ઠો.

૩૨. સબ્બાનિ એતાનિ સુભાસિતાનિ, ન હેત્થ દુબ્ભાસિતમત્થિ કિઞ્ચિ;

યસ્મિઞ્ચ એતાનિ પતિટ્ઠિતાનિ, અરાવ નાભ્યા સુસમોહિતાનિ;

ચતુબ્ભિ ધમ્મેહિ સમઙ્ગિભૂતં, તં વે નરં સમણમાહુ લોકે.

૩૩. તુવઞ્હિ [તુવં નુ (સી. પી.)] સેટ્ઠો ત્વમનુત્તરોસિ, ત્વં ધમ્મગૂ ધમ્મવિદૂ સુમેધો;

પઞ્ઞાય પઞ્હં સમધિગ્ગહેત્વા, અચ્છેચ્છિ ધીરો વિચિકિચ્છિતાનિ;

અચ્છેચ્છિ કઙ્ખં વિચિકિચ્છિતાનિ, ચુન્દો યથા નાગદન્તં ખરેન.

૩૪. નીલુપ્પલાભં વિમલં અનગ્ઘં, વત્થં ઇદં ધૂમસમાનવણ્ણં;

પઞ્હસ્સ વેય્યાકરણેન તુટ્ઠો, દદામિ તે ધમ્મપૂજાય ધીર.

૩૫. સુવણ્ણમાલં સતપત્તફુલ્લિતં, સકેસરં રત્નસહસ્સમણ્ડિતં;

પઞ્હસ્સ વેય્યાકરણેન તુટ્ઠો, દદામિ તે ધમ્મપૂજાય ધીર.

૩૬. મણિં અનગ્ઘં રુચિરં પભસ્સરં, કણ્ઠાવસત્તં [વસિતં (ક.)] મણિભૂસિતં મે;

પઞ્હસ્સ વેય્યાકરણેન તુટ્ઠો, દદામિ તે ધમ્મપૂજાય ધીર.

૩૭. ગવં સહસ્સં ઉસભઞ્ચ નાગં, આજઞ્ઞયુત્તે ચ રથે દસ ઇમે;

પઞ્હસ્સ વેય્યાકરણેન તુટ્ઠો, દદામિ તે ગામવરાનિ સોળસ.

૩૮. સારિપુત્તો તદા નાગો, સુપણ્ણો પન કોલિતો;

ગન્ધબ્બરાજા અનુરુદ્ધો, રાજા આનન્દ પણ્ડિતો;

વિધુરો બોધિસત્તો ચ, એવં ધારેથ જાતકન્તિ.

ચતુપોસથિયજાતકં તતિયં.