૭. ઇત્થિવગ્ગો

૬૧. અસા લોકિત્થિયો નામ, વેલા તાસં ન વિજ્જતિ;

સારત્તા ચ પગબ્ભા ચ, સિખી સબ્બઘસો યથા;

તા હિત્વા પબ્બજિસ્સામિ, વિવેકમનુબ્રૂહયન્તિ.

અસાતમન્તજાતકં પઠમં.

૬૨. યં બ્રાહ્મણો અવાદેસિ, વીણં સમુખવેઠિતો;

અણ્ડભૂતા ભતા ભરિયા, તાસુ કો જાતુ વિસ્સસેતિ.

અણ્ડભૂતજાતકં દુતિયં.

૬૩. કોધના અકતઞ્ઞૂ ચ, પિસુણા મિત્તભેદિકા [પિસુણા ચ વિભેદિકા (સી. સ્યા. પી.)];

બ્રહ્મચરિયં ચર ભિક્ખુ, સો સુખં ન વિહાહસીતિ [પિહાહિસીતિ (સી. સ્યા. પી.), વિહાયસિ (ક.)].

તક્કપણ્ડિતજાતકં [તક્કજાતકં (સી. સ્યા. પી. અટ્ઠ.)] તતિયં.

૬૪. મા સુ નન્દિ ઇચ્છતિ મં, મા સુ સોચિ ન મિચ્છતિ [ન ઇચ્છતિ (સી. સ્યા. પી.)];

થીનં ભાવો દુરાજાનો, મચ્છસ્સેવોદકે ગતન્તિ.

દુરાજાનજાતકં ચતુત્થં.

૬૫. યથા નદી ચ પન્થો ચ, પાનાગારં સભા પપા;

એવં લોકિત્થિયો નામ, નાસં કુજ્ઝન્તિ પણ્ડિતાતિ.

અનભિરતિજાતકં પઞ્ચમં.

૬૬. એકા ઇચ્છા પુરે આસિ, અલદ્ધા મુદુલક્ખણં;

યતો લદ્ધા અળારક્ખી, ઇચ્છા ઇચ્છં વિજાયથાતિ.

મુદુલક્ખણજાતકં છટ્ઠં.

૬૭. ઉચ્છઙ્ગે દેવ મે પુત્તો, પથે ધાવન્તિયા પતિ;

તઞ્ચ દેસં ન પસ્સામિ, યતો સોદરિયમાનયેતિ [સોદરિયં નયે (ક.)].

ઉચ્છઙ્ગજાતકં સત્તમં.

૬૮. યસ્મિં મનો નિવિસતિ, ચિત્તઞ્ચાપિ [ચિત્તં વાપિ (કત્થચિ)] પસીદતિ;

અદિટ્ઠપુબ્બકે પોસે, કામં તસ્મિમ્પિ વિસ્સસેતિ.

સાકેતજાતકં અટ્ઠમં.

૬૯. ધિરત્થુ તં વિસં વન્તં, યમહં જીવિતકારણા;

વન્તં પચ્ચાવમિસ્સામિ [પચ્ચાહરિસ્સામિ (ક.)], મતં મે જીવિતા વરન્તિ.

વિસવન્તજાતકં નવમં.

૭૦. ન તં જિતં સાધુ જિતં, યં જિતં અવજીયતિ;

તં ખો જિતં સાધુ જિતં, યં જિતં નાવજીયતીતિ.

કુદ્દાલજાતકં દસમં.

ઇત્થિવગ્ગો સત્તમો.

તસ્સુદ્દાનં –

સિખીસબ્બઘસોપિ ચ વીણવરો, પિસુણા મિત્તભેદિકા નન્દી નદી;

મુદુલક્ખણ સોદરિયા ચ મનો, વિસ સાધુજિતેન ભવન્તિ દસાતિ.