૮. વરુણવગ્ગો

૭૧. યો પુબ્બે કરણીયાનિ, પચ્છા સો કાતુમિચ્છતિ;

વરુણકટ્ઠ [વરણકટ્ઠ (સી. પી.)] ભઞ્જોવ, સ પચ્છા મનુતપ્પતીતિ.

વરુણજાતકં પઠમં.

૭૨. અકતઞ્ઞુસ્સ પોસસ્સ, નિચ્ચં વિવરદસ્સિનો;

સબ્બં ચે પથવિં [પઠવિં (સી. સ્યા. પી.)] દજ્જા, નેવ નં અભિરાધયેતિ.

સીલવહત્થિજાતકં દુતિયં.

૭૩. સચ્ચં કિરેવમાહંસુ, નરા એકચ્ચિયા ઇધ;

કટ્ઠં નિપ્લવિતં [વિપ્લાવિતં (સી. પી.)] સેય્યો, ન ત્વેવેકચ્ચિયો નરોતિ.

સચ્ચંકિરજાતકં તતિયં.

૭૪. સાધૂ સમ્બહુલા ઞાતી, અપિ રુક્ખા અરઞ્ઞજા;

વાતો વહતિ એકટ્ઠં, બ્રહન્તમ્પિ વનપ્પતિન્તિ.

રુક્ખધમ્મજાતકં ચતુત્થં.

૭૫. અભિત્થનય પજ્જુન્ન, નિધિં કાકસ્સ નાસય;

કાકં સોકાય રન્ધેહિ, મઞ્ચ સોકા પમોચયાતિ.

મચ્છજાતકં પઞ્ચમં.

૭૬. અસઙ્કિયોમ્હિ ગામમ્હિ, અરઞ્ઞે નત્થિ મે ભયં;

ઉજું મગ્ગં સમારૂળ્હો, મેત્તાય કરુણાય ચાતિ.

અસઙ્કિયજાતકં છટ્ઠં.

૭૭. ઉસભા રુક્ખા ગાવિયો ગવા ચ, અસ્સો કંસો સિઙ્ગાલી [સિગાસી (સી. સ્યા. પી.)] ચ કુમ્ભો;

પોક્ખરણી ચ અપાકચન્દનં, લાબૂનિ સીદન્તિ સિલા પ્લવન્તિ.

મણ્ડૂકિયો કણ્હસપ્પે ગિલન્તિ, કાકં સુપણ્ણા પરિવારયન્તિ;

તસા વકા એળકાનં ભયાહિ, વિપરિયાસો [વિપરિયાયો (સ્યા. ક.)] વત્તતિ નયિધ મત્થીતિ.

મહાસુપિનજાતકં સત્તમં.

૭૮. ઉભો ખઞ્જા ઉભો કુણી, ઉભો વિસમચક્ખુકા [ચક્ખુલા (સી. પી.)];

ઉભિન્નં પિળકા [પીળકા (સ્યા.)] જાતા, નાહં પસ્સામિ ઇલ્લિસન્તિ.

ઇલ્લિસજાતકં અટ્ઠમં.

૭૯. યતો વિલુત્તા ચ હતા ચ ગાવો, દડ્ઢાનિ ગેહાનિ જનો ચ નીતો;

અથાગમા પુત્તહતાય પુત્તો, ખરસ્સરં ડિણ્ડિમં [દેણ્ડિમં (સી. સ્યા. પી.), ડિન્દિમં (ક.)] વાદયન્તોતિ.

ખરસ્સરજાતકં નવમં.

૮૦. યં તે પવિકત્થિતં પુરે, અથ તે પૂતિસરા સજન્તિ પચ્છા;

ઉભયં ન સમેતિ ભીમસેન, યુદ્ધકથા ચ ઇદઞ્ચ તે વિહઞ્ઞન્તિ.

ભીમસેનજાતકં દસમં.

વરુણવગ્ગો [વરણવગ્ગો (સી. પી.)] અટ્ઠમો.

તસ્સુદ્દાનં –

વરુણા અકતઞ્ઞૂવરે તુ સચ્ચવરં, સવનપ્પતિના ચ અભિત્થનય;

કરુણાય સિલાપ્લવ ઇલ્લિસતો, પુન ડિણ્ડિમપૂતિસરેન દસાતિ.