૬. આસીસવગ્ગો

૫૧. આસીસેથેવ [આસિંસેથેવ (સી. સ્યા. પી.)] પુરિસો, ન નિબ્બિન્દેય્ય પણ્ડિતો;

પસ્સામિ વોહં અત્તાનં, યથા ઇચ્છિં તથા અહૂતિ.

મહાસીલવજાતકં પઠમં.

૫૨. વાયમેથેવ પુરિસો, ન નિબ્બિન્દેય્ય પણ્ડિતો;

પસ્સામિ વોહં અત્તાનં, ઉદકા થલમુબ્ભતન્તિ.

ચૂળજનકજાતકં દુતિયં.

૫૩. તથેવ પુણ્ણા પાતિયો, અઞ્ઞાયં વત્તતે કથા;

આકારણેન [આકારકેન (સી. સ્યા. પી.)] જાનામિ, ન ચાયં ભદ્દિકા સુરાતિ.

પુણ્ણપાતિજાતકં તતિયં.

૫૪. નાયં રુક્ખો દુરારુહો, નપિ ગામતો આરકા;

આકારણેન જાનામિ, નાયં સાદુફલો દુમોતિ.

કિંફલજાતકં ચતુત્થં.

૫૫. યો અલીનેન ચિત્તેન, અલીનમનસો નરો;

ભાવેતિ કુસલં ધમ્મં, યોગક્ખેમસ્સ પત્તિયા;

પાપુણે અનુપુબ્બેન, સબ્બસંયોજનક્ખયન્તિ.

પઞ્ચાવુધજાતકં પઞ્ચમં.

૫૬. યો પહટ્ઠેન ચિત્તેન, પહટ્ઠમનસો નરો;

ભાવેતિ કુસલં ધમ્મં, યોગક્ખેમસ્સ પત્તિયા;

પાપુણે અનુપુબ્બેન, સબ્બસંયોજનક્ખયન્તિ.

કઞ્ચનક્ખન્ધજાતકં છટ્ઠં.

૫૭. યસ્સેતે ચતુરો ધમ્મા, વાનરિન્દ યથા તવ;

સચ્ચં ધમ્મો ધિતિ [ધિતી (સી. પી.)] ચાગો, દિટ્ઠં સો અતિવત્તતીતિ.

વાનરિન્દજાતકં સત્તમં.

૫૮. યસ્સેતે ચ [યસ્સ એતે (સી. પી.)] તયો ધમ્મા, વાનરિન્દ યથા તવ;

દક્ખિયં સૂરિયં પઞ્ઞા, દિટ્ઠં સો અતિવત્તતીતિ.

તયોધમ્મજાતકં અટ્ઠમં.

૫૯. ધમે ધમે નાતિધમે, અતિધન્તઞ્હિ પાપકં;

ધન્તેન હિ સતં લદ્ધં, અતિધન્તેન નાસિતન્તિ.

ભેરિવાદકજાતકં નવમં.

૬૦. ધમે ધમે નાતિધમે, અતિધન્તઞ્હિ પાપકં;

ધન્તેનાધિગતા ભોગા, તે તાતો વિધમી ધમન્તિ.

સઙ્ખધમજાતકં દસમં.

આસીસવગ્ગો છટ્ઠો.

તસ્સુદ્દાનં –

યથા ઇચ્છિં તથાહુદકા થલા, સુર સાદુફલો ચ અલીનમનો;

સમ્પહટ્ઠમનો ચતુરો ચ તયો, સતલદ્ધક ભોગધનેન દસાતિ.