૫. અત્થકામવગ્ગો

૪૧. યો અત્થકામસ્સ હિતાનુકમ્પિનો, ઓવજ્જમાનો ન કરોતિ સાસનં;

અજિયા પાદમોલમ્બ [પાદમોલુમ્બ (સી. સ્યા. પી.)], મિત્તકો વિય સોચતીતિ.

લોસકજાતકં પઠમં.

૪૨. યો અત્થકામસ્સ હિતાનુકમ્પિનો, ઓવજ્જમાનો ન કરોતિ સાસનં;

કપોતકસ્સ વચનં અકત્વા, અમિત્તહત્થત્થગતોવ સેતીતિ.

કપોતજાતકં દુતિયં.

૪૩. યો અત્થકામસ્સ હિતાનુકમ્પિનો, ઓવજ્જમાનો ન કરોતિ સાસનં;

એવં સો નિહતો સેતિ, વેળુકસ્સ યથા પિતાતિ.

વેળુકજાતકં તતિયં.

૪૪. સેય્યો અમિત્તો મતિયા ઉપેતો, ન ત્વેવ મિત્તો મતિવિપ્પહીનો;

મકસં વધિસ્સન્તિ હિ એળમૂગો, પુત્તો પિતુ અબ્ભિદા ઉત્તમઙ્ગન્તિ.

મકસજાતકં ચતુત્થં.

૪૫. સેય્યો અમિત્તો મેધાવી, યઞ્ચે બાલાનુકમ્પકો;

પસ્સ રોહિણિકં જમ્મિં, માતરં હન્ત્વાન સોચતીતિ.

રોહિણિજાતકં પઞ્ચમં.

૪૬. ન વે અનત્થકુસલેન, અત્થચરિયા સુખાવહા;

હાપેતિ અત્થં દુમ્મેધો, કપિ આરામિકો યથાતિ.

આરામદૂસકજાતકં છટ્ઠં.

૪૭. ન વે અનત્થકુસલેન, અત્થચરિયા સુખાવહા;

હાપેતિ અત્થં દુમ્મેધો, કોણ્ડઞ્ઞો વારુણિં યથાતિ.

વારુણિદૂસકજાતકં સત્તમં.

૪૮. અનુપાયેન યો અત્થં, ઇચ્છતિ સો વિહઞ્ઞતિ;

ચેતા હનિંસુ વેદબ્બં [વેદબ્ભં (સી. પી.)], સબ્બે તે બ્યસનમજ્ઝગૂતિ.

વેદબ્બ [વેદબ્ભ (સી. પી.)] જાતકં અટ્ઠમં.

૪૯. નક્ખત્તં પટિમાનેન્તં, અત્થો બાલં ઉપચ્ચગા;

અત્થો અત્થસ્સ નક્ખત્તં, કિં કરિસ્સન્તિ તારકાતિ.

નક્ખત્તજાતકં નવમં.

૫૦. દુમ્મેધાનં સહસ્સેન, યઞ્ઞો મે ઉપયાચિતો;

ઇદાનિ ખોહં યજિસ્સામિ, બહુ [બહૂ (સી. પી.), બહું (ક.)] અધમ્મિકો જનોતિ.

દુમ્મેધજાતકં દસમં.

અત્થકામવગ્ગો પઞ્ચમો.

તસ્સુદ્દાનં –

અથ મિત્તક માતુ કપોતવરો, તથા વેળૂક એળમૂગો રોહિણી;

કપિ વારુણિ ચેતચરા ચ પુન, તથા તારક યઞ્ઞવરેન દસાતિ.

પઠમો પણ્ણાસકો.