૧૫. કકણ્ટકવગ્ગો

૧૪૧. ગોધજાતકં

૧૪૧. ન પાપજનસંસેવી, અચ્ચન્તસુખમેધતિ;

ગોધાકુલં [ગોધક્કુલં (ક.)] કકણ્ટાવ [કકણ્ટકા (ક.)], કલિં પાપેતિ અત્તનન્તિ.

ગોધજાતકં પઠમં.

૧૪૨. સિઙ્ગાલજાતકં

૧૪૨. એતઞ્હિ તે દુરાજાનં, યં સેસિ મતસાયિકં;

યસ્સ તે કડ્ઢમાનસ્સ, હત્થા દણ્ડો ન મુચ્ચતીતિ.

સિઙ્ગાલજાતકં દુતિયં.

૧૪૩. વિરોચજાતકં

૧૪૩. લસી ચ તે નિપ્ફલિતા, મત્થકો ચ પદાલિતો [વિદાલિતો (સી. પી.)];

સબ્બા તે ફાસુકા ભગ્ગા, અજ્જ ખો ત્વં વિરોચસીતિ.

વિરોચજાતકં તતિયં.

૧૪૪. નઙ્ગુટ્ઠજાતકં

૧૪૪. બહુમ્પેતં અસબ્ભિ [બહુપેતમસબ્ભિ (ક.)] જાતવેદ, યં તં વાલધિનાભિપૂજયામ;

મંસારહસ્સ નત્થજ્જ મંસં, નઙ્ગુટ્ઠમ્પિ ભવં પટિગ્ગહાતૂતિ.

નઙ્ગુટ્ઠજાતકં ચતુત્થં.

૧૪૫. રાધજાતકં

૧૪૫. ન ત્વં રાધ વિજાનાસિ, અડ્ઢરત્તે અનાગતે;

અબ્યયતં [અબ્યાયતં (સી. સ્યા. પી.), અબ્યત્તતં (?)] વિલપસિ, વિરત્તા કોસિયાયનેતિ.

રાધજાતકં પઞ્ચમં.

૧૪૬. સમુદ્દકાકજાતકં

૧૪૬. અપિ નુ હનુકા સન્તા, મુખઞ્ચ પરિસુસ્સતિ;

ઓરમામ ન પારેમ, પૂરતેવ મહોદધીતિ.

સમુદ્દકાકજાતકં છટ્ઠં.

૧૪૭. પુપ્ફરત્તજાતકં

૧૪૭. નયિદં દુક્ખં અદું દુક્ખં, યં મં તુદતિ વાયસો;

યં સામા પુપ્ફરત્તેન, કત્તિકં નાનુભોસ્સતીતિ.

પુપ્ફરત્તજાતકં સત્તમં.

૧૪૮. સિઙ્ગાલજાતકં

૧૪૮. નાહં પુનં ન ચ પુનં, ન ચાપિ અપુનપ્પુનં;

હત્થિબોન્દિં પવેક્ખામિ, તથા હિ ભયતજ્જિતોતિ.

સિઙ્ગાલજાતકં અટ્ઠમં.

૧૪૯. એકપણ્ણજાતકં

૧૪૯. એકપણ્ણો અયં રુક્ખો, ન ભૂમ્યા ચતુરઙ્ગુલો;

ફલેન વિસકપ્પેન, મહાયં કિં ભવિસ્સતીતિ.

એકપણ્ણજાતકં નવમં.

૧૫૦. સઞ્જીવજાતકં

૧૫૦. અસન્તં યો પગ્ગણ્હાતિ, અસન્તં ચૂપસેવતિ;

તમેવ ઘાસં કુરુતે, બ્યગ્ઘો સઞ્જીવકો યથાતિ.

સઞ્જીવજાતકં દસમં.

કકણ્ટક [પાપસેવન (ક.)] વગ્ગો પન્નરસમો.

તસ્સુદ્દાનં –

સુખમેધતિ દણ્ડવરો ચ પુન, લસિ વાલધિ પઞ્ચમરાધવરો;

સમહોદધિ કત્તિક બોન્દિ પુન, ચતુરઙ્ગુલબ્યગ્ઘવરેન દસાતિ.

(ઉપરિમો પણ્ણાસકો.) [( ) સીહળપોત્થકેયેવ દિસ્સતિ]

અથ વગ્ગુદ્દાનં –

અપણ્ણકં સીલવગ્ગકુરુઙ્ગ, કુલાવકં અત્થકામેન પઞ્ચમં;

આસીસો ઇત્થિવરુણં અપાયિ, લિત્તવગ્ગેન તે દસ;

પરોસતં હંચિ કુસનાળિ [હંસિ સરિક્ખં (સબ્બત્થ)], અસમ્પદં કકણ્ટકવગ્ગો.

એકનિપાતમ્હિલઙ્કતન્તિ.

એકકનિપાતં નિટ્ઠિતં.