૧૨. હંચિવગ્ગો

૧૧૧. હંચિ [હંસિ (સી. સ્યા.), હઞ્ચિ (?)] તુવં એવમઞ્ઞસિ સેય્યો, પુત્તેન પિતાતિ રાજસેટ્ઠ;

હન્દસ્સતરસ્સ તે અયં, અસ્સતરસ્સ હિ ગદ્રભો પિતાતિ.

ગદ્રભપઞ્હજાતકં પઠમં.

૧૧૨. યેન સત્તુબિલઙ્ગા ચ, દિગુણપલાસો ચ પુપ્ફિતો;

યેન દદામિ [યેના’દામિ (સી. સ્યા.)] તેન વદામિ, યેન ન દદામિ [યેન ના’દામિ (સી. સ્યા.)] ન તેન વદામિ;

એસ મગ્ગો યવમજ્ઝકસ્સ, એતં છન્નપથં વિજાનાહીતિ.

અમરાદેવીપઞ્હજાતકં દુતિયં.

૧૧૩. સદ્દહાસિ સિઙ્ગાલસ્સ [સિગાલસ્સ (સી. સ્યા. પી.)], સુરાપીતસ્સ બ્રાહ્મણ;

સિપ્પિકાનં સતં નત્થિ, કુતો કંસસતા દુવેતિ.

સિઙ્ગાલજાતકં તતિયં.

૧૧૪. બહુચિન્તી અપ્પચિન્તી, ઉભો જાલે અબજ્ઝરે;

મિતચિન્તી પમોચેસી, ઉભો તત્થ સમાગતાતિ.

મિતચિન્તિજાતકં ચતુત્થં.

૧૧૫. યાયઞ્ઞ [યાયઞ્ઞે (ક.)] મનુસાસતિ, સયં લોલુપ્પચારિની;

સાયં વિપક્ખિકા સેતિ, હતા ચક્કેન સાસિકાતિ [સાલિકાતિ (સી. સ્યા. પી.)].

અનુસાસિકજાતકં પઞ્ચમં.

૧૧૬. અતિકરમકરાચરિય, મય્હમ્પેતં ન રુચ્ચતિ;

ચતુત્થે લઙ્ઘયિત્વાન, પઞ્ચમાયસિ આવુતોતિ.

દુબ્બચજાતકં છટ્ઠં.

૧૧૭. અચ્ચુગ્ગતાતિલપતા [અતિબલતા (સી. સ્યા. પી.), અતિલપકા (કત્થચિ)], અતિવેલં પભાસિતા;

વાચા હનતિ દુમ્મેધં, તિત્તિરંવાતિવસ્સિતન્તિ.

તિત્તિરજાતકં સત્તમં.

૧૧૮. નાચિન્તયન્તો પુરિસો, વિસેસમધિગચ્છતિ;

ચિન્તિતસ્સ ફલં પસ્સ, મુત્તોસ્મિ વધબન્ધનાતિ.

વટ્ટકજાતકં અટ્ઠમં.

૧૧૯. અમાતાપિતરસંવદ્ધો [પિતરિ (સી. પી.), પિતુ (સ્યા.)], અનાચેરકુલે વસં;

નાયં કાલં અકાલં વા, અભિજાનાતિ કુક્કુટોતિ.

અકાલરાવિજાતકં નવમં.

૧૨૦. અબદ્ધા તત્થ બજ્ઝન્તિ, યત્થ બાલા પભાસરે;

બદ્ધાપિ તત્થ મુચ્ચન્તિ, યત્થ ધીરા પભાસરેતિ.

બન્ધનમોક્ખજાતકં દસમં.

હંચિવગ્ગો [હંસિવગ્ગો (સી. સ્યા.)] દ્વાદસમો.

તસ્સુદ્દાનં –

અથ ગદ્રભ સત્તુવ કંસસતં, બહુચિન્તિ સાસિકાયાતિકર;

અતિવેલ વિસેસમનાચરિયોવ, ધીરાપભાસરતેન દસાતિ.