૧૩. કુસનાળિવગ્ગો

૧૨૧. કરે સરિક્ખો અથ વાપિ સેટ્ઠો, નિહીનકો વાપિ કરેય્ય એકો;

કરેય્યુમેતે [કરેય્યું તે (સી. પી.)] બ્યસને ઉત્તમત્થં, યથા અહં કુસનાળિ રુચાયન્તિ.

કુસનાળિજાતકં પઠમં.

૧૨૨. યસં લદ્ધાન દુમ્મેધો, અનત્થં ચરતિ અત્તનો;

અત્તનો ચ પરેસઞ્ચ, હિંસાય પટિપજ્જતીતિ.

દુમ્મેધજાતકં દુતિયં.

૧૨૩. અસબ્બત્થગામિં વાચં, બાલો સબ્બત્થ ભાસતિ;

નાયં દધિં વેદિ ન [ન વેદિ (ક.)] નઙ્ગલીસં, દધિપ્પયં [દધિમ્પયં (સી. પી.)] મઞ્ઞતિ નઙ્ગલીસન્તિ.

નઙ્ગલીસજાતકં તતિયં.

૧૨૪. વાયમેથેવ પુરિસો, ન નિબ્બિન્દેય્ય પણ્ડિતો;

વાયામસ્સ ફલં પસ્સ, ભુત્તા અમ્બા અનીતિહન્તિ.

અમ્બજાતકં ચતુત્થં.

૧૨૫. બહુમ્પિ સો વિકત્થેય્ય, અઞ્ઞં જનપદં ગતો;

અન્વાગન્ત્વાન દૂસેય્ય, ભુઞ્જ ભોગે કટાહકાતિ.

કટાહકજાતકં પઞ્ચમં.

૧૨૬. તદેવેકસ્સ [તથેવેકસ્સ (સી. સ્યા. પી. અટ્ઠ. મૂલપાઠો)] કલ્યાણં, તદેવેકસ્સ પાપકં;

તસ્મા સબ્બં ન કલ્યાણં, સબ્બં વાપિ ન પાપકન્તિ.

અસિલક્ખણજાતકં છટ્ઠં.

૧૨૭. તે દેસા તાનિ વત્થૂનિ, અહઞ્ચ વનગોચરો;

અનુવિચ્ચ ખો તં ગણ્હેય્યું, પિવ [પિપ (સી. પી.)] ખીરં કલણ્ડુકાતિ.

કલણ્ડુકજાતકં સત્તમં.

૧૨૮. યો વે ધમ્મં ધજં [ધમ્મધજં (સ્યા. પી. ક.)] કત્વા, નિગૂળ્હો પાપમાચરે;

વિસ્સાસયિત્વા ભૂતાનિ, બિળારં નામ તં વતન્તિ.

બિળારવતજાતકં અટ્ઠમં.

૧૨૯. નાયં સિખા પુઞ્ઞહેતુ, ઘાસહેતુ અયં સિખા;

નાઙ્ગુટ્ઠગણનં યાતિ, અલં તે હોતુ અગ્ગિકાતિ.

અગ્ગિકભારદ્વાજજાતકં નવમં.

૧૩૦. યથા વાચા ચ ભુઞ્જસ્સુ, યથા ભુત્તઞ્ચ બ્યાહર;

ઉભયં તે ન સમેતિ, વાચા ભુત્તઞ્ચ કોસિયેતિ.

કોસિયજાતકં દસમં.

કુસનાળિવગ્ગો [સરિક્ખવગ્ગો (ક.)] તેરસમો.

તસ્સુદ્દાનં –

કુસનાળિસિરિવ્હયનો ચ યસં, દધિ મમ્બ કટાહકપઞ્ચમકો;

અથ પાપક ખીર બિળારવતં, સિખિ કોસિયસવ્હયનેન દસાતિ.