૧૧. પરોસતવગ્ગો

૧૦૧. પરોસતં ચેપિ સમાગતાનં, ઝાયેય્યું તે વસ્સસતં અપઞ્ઞા;

એકોવ સેય્યો પુરિસો સપઞ્ઞો, યો ભાસિતસ્સ વિજાનાતિ અત્થન્તિ.

પરોસતજાતકં પઠમં.

૧૦૨. યો દુક્ખફુટ્ઠાય ભવેય્ય તાણં, સો મે પિતા દુબ્ભિ [દૂભિ (સી. પી.)] વને કરોતિ;

સા કસ્સ કન્દામિ વનસ્સ મજ્ઝે, યો તાયિતા સો સહસં [સહસા (સી. સ્યા. પી.)] કરોતીતિ.

પણ્ણિકજાતકં દુતિયં.

૧૦૩. યત્થ વેરી નિવિસતિ [નિવસતિ (સી. ક.)], ન વસે તત્થ પણ્ડિતો;

એકરત્તં દિરત્તં વા, દુક્ખં વસતિ વેરિસૂતિ.

વેરિજાતકં તતિયં.

૧૦૪. ચતુબ્ભિ અટ્ઠજ્ઝગમા, અટ્ઠાહિપિ ચ સોળસ;

સોળસાહિ ચ બાત્તિંસ [બત્તિંસ (સી. સ્યા. પી.)], અત્રિચ્છં ચક્કમાસદો;

ઇચ્છાહતસ્સ પોસસ્સ, ચક્કં ભમતિ મત્થકેતિ.

મિત્તવિન્દકજાતકં ચતુત્થં.

૧૦૫. બહુમ્પેતં વને કટ્ઠં, વાતો ભઞ્જતિ દુબ્બલં;

તસ્સ ચે ભાયસી નાગ, કિસો નૂન ભવિસ્સસીતિ.

દુબ્બલકટ્ઠજાતકં પઞ્ચમં.

૧૦૬. સુખં વત મં જીવન્તં [સુખકં વત જીવં (ક.)], પચમાના ઉદઞ્ચની;

ચોરી જાયપ્પવાદેન, તેલં લોણઞ્ચ યાચતીતિ.

ઉદઞ્ચનીજાતકં છટ્ઠં.

૧૦૭. સાધુ ખો સિપ્પકં નામ, અપિ યાદિસ કીદિસં;

પસ્સ ખઞ્જપ્પહારેન, લદ્ધા ગામા ચતુદ્દિસાતિ.

સાલિત્તકજાતકં સત્તમં.

૧૦૮. સિક્ખેય્ય સિક્ખિતબ્બાનિ, સન્તિ તચ્છન્દિનો [સચ્છન્દિનો (સી. પી.)] જના;

બાહિયા હિ [પિ (સી. સ્યા. પી.)] સુહન્નેન, રાજાનમભિરાધયીતિ.

બાહિયજાતકં અટ્ઠમં.

૧૦૯. યથન્નો પુરિસો હોતિ, તથન્ના તસ્સ દેવતા;

આહરેતં કુણ્ડપૂવં [કણં પૂવં (સી. પી.)], મા મે ભાગં વિનાસયાતિ.

કુણ્ડપૂવજાતકં નવમં.

૧૧૦. સબ્બસંહારકો [સબ્બસાહારકો (ક.)] નત્થિ, સુદ્ધં કઙ્ગુ પવાયતિ;

અલિકં ભાયતિયં ધુત્તી, સચ્ચમાહ મહલ્લિકાતિ.

સબ્બસંહારકપઞ્હજાતકં દસમં.

પરોસતવગ્ગો એકાદસમો.

તસ્સુદ્દાનં –

સપરોસત તાયિત વેરી પુન, ભમચક્કથ નાગસિરિવ્હયનો;

સુખકઞ્ચ વત સિપ્પક બાહિયા, કુણ્ડપૂવ મહલ્લિકકા ચ દસાતિ.