૧૦. લિત્તવગ્ગો

૯૧. લિત્તં પરમેન તેજસા, ગિલમક્ખં પુરિસો ન બુજ્ઝતિ;

ગિલ રે ગિલ પાપધુત્તક, પચ્છા તે કટુકં ભવિસ્સતીતિ.

લિત્તજાતકં પઠમં.

૯૨. ઉક્કટ્ઠે સૂરમિચ્છન્તિ, મન્તીસુ અકુતૂહલં;

પિયઞ્ચ અન્નપાનમ્હિ, અત્થે જાતે ચ પણ્ડિતન્તિ.

મહાસારજાતકં દુતિયં.

૯૩. ન વિસ્સસે અવિસ્સત્થે, વિસ્સત્થેપિ ન વિસ્સસે;

વિસ્સાસા ભયમન્વેતિ, સીહંવ મિગમાતુકાતિ [મિગમાતુયા (ક.)].

વિસાસભોજનજાતકં તતિયં.

૯૪. સોતત્તો સોસિન્દો [સોસીતો (સી. સ્યા. પી.), સોસિનો (ક.)] ચેવ, એકો ભિંસનકે વને;

નગ્ગો ન ચગ્ગિમાસીનો, એસનાપસુતો મુનીતિ.

લોમહંસજાતકં ચતુત્થં.

૯૫. અનિચ્ચા વત સઙ્ખારા, ઉપ્પાદવયધમ્મિનો;

ઉપ્પજ્જિત્વા નિરુજ્ઝન્તિ, તેસં વૂપસમો સુખોતિ.

મહાસુદસ્સનજાતકં પઞ્ચમં.

૯૬. સમતિત્તિકં અનવસેકં, તેલપત્તં યથા પરિહરેય્ય;

એવં સચિત્તમનુરક્ખે, પત્થયાનો દિસં અગતપુબ્બન્તિ.

તેલપત્તજાતકં છટ્ઠં.

૯૭. જીવકઞ્ચ મતં દિસ્વા, ધનપાલિઞ્ચ દુગ્ગતં;

પન્થકઞ્ચ વને મૂળ્હં, પાપકો પુનરાગતોતિ.

નામસિદ્ધિજાતકં સત્તમં.

૯૮. સાધુ ખો પણ્ડિતો નામ, ન ત્વેવ અતિપણ્ડિતો;

અતિપણ્ડિતેન પુત્તેન, મનમ્હિ ઉપકૂળિતોતિ [ઉપકૂલિતોતિ (સી.), ઉપકુટ્ઠિતોતિ (સ્યા.), ઉપકુટિતો (ક.)].

કૂટવાણિજજાતકં અટ્ઠમં.

૯૯. પરોસહસ્સમ્પિ સમાગતાનં, કન્દેય્યું તે વસ્સસતં અપઞ્ઞા;

એકોવ સેય્યો પુરિસો સપઞ્ઞો, યો ભાસિતસ્સ વિજાનાતિ અત્થન્તિ.

પરોસહસ્સજાતકં નવમં.

૧૦૦. અસાતં સાતરૂપેન, પિયરૂપેન અપ્પિયં;

દુક્ખં સુખસ્સ રૂપેન, પમત્તમતિવત્તતીતિ.

અસાતરૂપજાતકં દસમં.

લિત્તવગ્ગો દસમો.

તસ્સુદ્દાનં –

ગિલમક્ખકુતૂહલ માતુકસ્સા, મુનિના ચ અનિચ્ચત પત્તવરં;

ધનપાલિવરો અતિપણ્ડિતકો, સપરોસહસ્સઅસાતદસાતિ.

મજ્ઝિમો પણ્ણાસકો.