૩. નિસ્સરણિયસુત્તં

૭૨. વુત્તઞ્હેતં ભગવતા, વુત્તમરહતાતિ મે સુતં –

‘‘તિસ્સો ઇમા, ભિક્ખવે, નિસ્સરણિયા [નિસ્સારણીયા (અ. નિ. ૫.૨૦૦)] ધાતુયો. કતમા તિસ્સો? કામાનમેતં નિસ્સરણં યદિદં નેક્ખમ્મં, રૂપાનમેતં નિસ્સરણં યદિદં આરુપ્પં, યં ખો પન કિઞ્ચિ ભૂતં સઙ્ખતં પટિચ્ચસમુપ્પન્નં નિરોધો તસ્સ નિસ્સરણં – ઇમા ખો, ભિક્ખવે, તિસ્સો નિસ્સરણિયા ધાતુયો’’તિ. એતમત્થં ભગવા અવોચ. તત્થેતં ઇતિ વુચ્ચતિ –

‘‘કામનિસ્સરણં ઞત્વા, રૂપાનઞ્ચ અતિક્કમં;

સબ્બસઙ્ખારસમથં, ફુસં આતાપિ સબ્બદા.

‘‘સ વે સમ્મદ્દસો ભિક્ખુ, યતો તત્થ વિમુચ્ચતિ;

અભિઞ્ઞાવોસિતો સન્તો, સ વે યોગાતિગો મુની’’તિ.

અયમ્પિ અત્થો વુત્તો ભગવતા, ઇતિ મે સુતન્તિ. તતિયં.