૨. ચક્ખુસુત્તં

૬૧. વુત્તઞ્હેતં ભગવતા, વુત્તમરહતાતિ મે સુતં –

‘‘તીણિમાનિ, ભિક્ખવે, ચક્ખૂનિ. કતમાનિ તીણિ? મંસચક્ખુ, દિબ્બચક્ખુ, પઞ્ઞાચક્ખુ – ઇમાનિ ખો, ભિક્ખવે, તીણિ ચક્ખૂની’’તિ. એતમત્થં ભગવા અવોચ. તત્થેતં ઇતિ વુચ્ચતિ –

‘‘મંસચક્ખુ દિબ્બચક્ખુ, પઞ્ઞાચક્ખુ અનુત્તરં;

એતાનિ તીણિ ચક્ખૂનિ, અક્ખાસિ પુરિસુત્તમો.

‘‘મંસચક્ખુસ્સ ઉપ્પાદો, મગ્ગો દિબ્બસ્સ ચક્ખુનો;

યતો ઞાણં ઉદપાદિ, પઞ્ઞાચક્ખુ અનુત્તરં;

યસ્સ ચક્ખુસ્સ પટિલાભા, સબ્બદુક્ખા પમુચ્ચતી’’તિ.

અયમ્પિ અત્થો વુત્તો ભગવતા, ઇતિ મે સુતન્તિ. દુતિયં.