૯. પાપવગ્ગો

૧૧૬. અભિત્થરેથ કલ્યાણે, પાપા ચિત્તં નિવારયે;

દન્ધઞ્હિ કરોતો પુઞ્ઞં, પાપસ્મિં રમતી મનો.

૧૧૭. પાપઞ્ચે પુરિસો કયિરા, ન નં [ન તં (સી. પી.)] કયિરા પુનપ્પુનં;

ન તમ્હિ છન્દં કયિરાથ, દુક્ખો પાપસ્સ ઉચ્ચયો.

૧૧૮. પુઞ્ઞઞ્ચે પુરિસો કયિરા, કયિરા નં [કયિરાથેતં (સી. સ્યા.), કયિરાથેનં (પી.)] પુનપ્પુનં;

તમ્હિ છન્દં કયિરાથ, સુખો પુઞ્ઞસ્સ ઉચ્ચયો.

૧૧૯. પાપોપિ પસ્સતિ ભદ્રં, યાવ પાપં ન પચ્ચતિ;

યદા ચ પચ્ચતિ પાપં, અથ પાપો પાપાનિ [અથ પાપાનિ (?)] પસ્સતિ.

૧૨૦. ભદ્રોપિ પસ્સતિ પાપં, યાવ ભદ્રં ન પચ્ચતિ;

યદા ચ પચ્ચતિ ભદ્રં, અથ ભદ્રો ભદ્રાનિ [અથ ભદ્રાનિ (?)] પસ્સતિ.

૧૨૧. માવમઞ્ઞેથ [માપ્પમઞ્ઞેથ (સી. સ્યા. પી.)] પાપસ્સ, ન મન્તં [ન મં તં (સી. પી.), ન મત્તં (સ્યા.)] આગમિસ્સતિ;

ઉદબિન્દુનિપાતેન, ઉદકુમ્ભોપિ પૂરતિ;

બાલો પૂરતિ [પૂરતિ બાલો (સી. ક.), આપૂરતિ બાલો (સ્યા.)] પાપસ્સ, થોકં થોકમ્પિ [થોક થોકમ્પિ (સી. પી.)] આચિનં.

૧૨૨. માવમઞ્ઞેથ પુઞ્ઞસ્સ, ન મન્તં આગમિસ્સતિ;

ઉદબિન્દુનિપાતેન, ઉદકુમ્ભોપિ પૂરતિ;

ધીરો પૂરતિ પુઞ્ઞસ્સ, થોકં થોકમ્પિ આચિનં.

૧૨૩. વાણિજોવ ભયં મગ્ગં, અપ્પસત્થો મહદ્ધનો;

વિસં જીવિતુકામોવ, પાપાનિ પરિવજ્જયે.

૧૨૪. પાણિમ્હિ ચે વણો નાસ્સ, હરેય્ય પાણિના વિસં;

નાબ્બણં વિસમન્વેતિ, નત્થિ પાપં અકુબ્બતો.

૧૨૫. યો અપ્પદુટ્ઠસ્સ નરસ્સ દુસ્સતિ, સુદ્ધસ્સ પોસસ્સ અનઙ્ગણસ્સ;

તમેવ બાલં પચ્ચેતિ પાપં, સુખુમો રજો પટિવાતંવ ખિત્તો.

૧૨૬. ગબ્ભમેકે ઉપ્પજ્જન્તિ, નિરયં પાપકમ્મિનો;

સગ્ગં સુગતિનો યન્તિ, પરિનિબ્બન્તિ અનાસવા.

૧૨૭. ન અન્તલિક્ખે ન સમુદ્દમજ્ઝે, ન પબ્બતાનં વિવરં પવિસ્સ [પવિસં (સ્યા.)];

ન વિજ્જતી [ન વિજ્જતિ (ક. સી. પી. ક.)] સો જગતિપ્પદેસો, યત્થટ્ઠિતો [યત્રટ્ઠિતો (સ્યા.)] મુચ્ચેય્ય પાપકમ્મા.

૧૨૮. ન અન્તલિક્ખે ન સમુદ્દમજ્ઝે, ન પબ્બતાનં વિવરં પવિસ્સ;

ન વિજ્જતી સો જગતિપ્પદેસો, યત્થટ્ઠિતં [યત્રટ્ઠિતં (સ્યા.)] નપ્પસહેય્ય મચ્ચુ.

પાપવગ્ગો નવમો નિટ્ઠિતો.